សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការអភិវឌ្ឍតែងមានផលប៉ះពាល់ ហើយដើម្បីឱ្យផែនការអភិវឌ្ឍនោះកាន់តែប្រសើរ ក្រុមហ៊ុនក៏ដូចជាអ្នកអភិវឌ្ឍន៍មិនថារដ្ឋ ឬឯកជននោះទេ ត្រូវផ្ដល់សំណងផលប៉ះពាល់ទៅដល់ប្រជាពលរដ្ឋ។ យ៉ាងណាក្ដី គម្រោងអភិវឌ្ឍន៍ខ្លះគ្រាន់តែថ្លៃចំណាយលើផលប៉ះពាល់ច្រើនជាងទឹកប្រាក់ក្នុងការចំណាយលើការសាងសង់ទៅទៀត ជាក់ស្ដែងគម្រោងផ្លូវក្រវ៉ាត់ទី៣ ទឹកប្រាក់ចំណាយលើការដោះស្រាយផលប៉ះពាល់ច្រើនជាងថ្លៃវិនិយោគទៅទៀត។ នេះបើតាមសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាមានប្រសាសន៍នៅក្នុងពិធីសម្ពោធអគារសម្ភពនៃមន្ទីរពេទ្យជាតិកុមារកាលពីព្រឹកថ្ងៃទី២០ ខែមេសា ឆ្នាំ២០២៣ ។
សម្ដេចតេជោ ហ៊ុន សែន បានលើកឡើងថា តម្លៃដោះស្រាយផលប៉ះពាល់ទៅលើផ្ទៃដីអាស្រ័យផល ក៏ដូចជាដីកម្មសិទ្ធិរបស់ប្រជាជនមានទំហំទឹកប្រាក់ច្រើនជាងតម្លៃសាងសង់ផ្លូវទៅទៀត។ មិនមែនមានតែផ្លូវក្រវ៉ាត់ក្រុងទី៣នោះទេដែលប្រើប្រាស់ទឹកប្រាក់ដោះស្រាយផលប៉ះពាល់ច្រើនជាងតម្លៃសាងសង់ សូម្បីតែគម្រោងសាងសង់ និងលើកកម្រិតគុណភាពផ្លូវជាតិលេខ១ ក៏ប្រើប្រាស់ទឹកប្រាក់សម្រាប់ដោះស្រយាយផលប៉ះពាល់ច្រើនជាងតម្លៃសាងសង់ដែរ។
សម្ដេចបានមានប្រសាសន៍ថា ៖
“ផ្លូវជាតិលេខ១នៅកន្លែងមួយនោះជប៉ុនជួយថវិកាសម្រាប់សង់ផ្លូវត្រឹមតែ ៩លានដុល្លារអាមេរិក ប៉ុន្តែកម្ពុជាប្រើប្រាស់ថវិកាសម្រាប់ដោះស្រាយផលប៉ះពាល់រហូតដល់ទៅ១៣លានដុល្លារអាមេរិក។ តាមពិតទៅយើងបានកំណត់យកចំណីផ្លូវរួចហើយ ប៉ុន្តែដោយសាររដ្ឋាភិបាលយោគយល់ដល់ពលរដ្ឋដែលមកអាស្រ័យផល និងធ្វើអាជីវកម្មតាមបណ្ដោយផ្លូវទាំងនោះ ហើយនៅពេលពួកគេប្រកបរបរធូរធាគាត់ក៏សង់ផ្ទះធំរឹងមាំលើដីរបស់រដ្ឋតែម្ដង ។ នៅពេលរដ្ឋត្រូវការពង្រីកផ្លូវក៏ប៉ះពាល់ដល់អាជីវកម្ម និងផ្ទះរបស់ពួកគាត់ ដូច្នេះយើងក៏ផ្ដល់ជាសំណងដល់ពួកគាត់”
គួររំលឹកថា គម្រោងផ្លូវក្រវ៉ាត់ក្រុងទី៣ គ្រោងចំណាយទឹកប្រាក់សរុបជិត ៣០០លានដុល្លារអាមេរិក ក្នុងនោះថវិកា ២៧៣លានដុល្លារអាមេរិក ជាហិរញ្ញប្បទានពីប្រទេសចិន ហើយនៅសេសសល់ទាំងប៉ុន្មានជាហិរញ្ញប្បទានពីរាជរដ្ឋាភិបាលកម្ពុជា។
បើតាមឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ផងដែរថា គម្រោងផ្លូវក្រវ៉ាត់ក្រុងទី៣នេះ គ្រោងនឹងបញ្ចប់នៅអំឡុងខែឧសភា ឆ្នាំ២០២៣ខាងមុខនេះ ហើយជាផ្លូវដ៏សំខាន់ក្នុងការបញ្ចៀសការកកស្ទះចរាចរណ៍នៅរាជធានីភ្នំពេញដោយពលរដ្ឋធ្វើដំណើរពីខេត្តមួយទៅខេត្តមួយ មិនចាំបាច់ឆ្លងកាត់រាជធានីភ្នំពេញនោះឡើយ ។
ក្រៅពីការជួយរំដោះចរាចរណ៍មិនឱ្យកកស្ទះនៅរាជធានីភ្នំពេញហើយនោះ ផ្លូវក្រវ៉ាត់ក្រុងទី៣នេះដែរ ក៏បានជួយជំរុញការវិនិយោគ និងជំរុញតម្លៃដីធ្លីនៅតាមបណ្ដោយផ្លូវនេះមួយកម្រិតផងដែរ ជាក់ស្ដែងនាពេលបច្ចុប្បន្ននេះ នៅតាមបណ្ដោយផ្លូវក្រវ៉ាត់ក្រុងទី៣ឃើញមានគម្រោងវិនិយោគជាបន្តបន្ទាប់ចាប់ផ្ដើមអនុវត្តន៍ជាហូរហែហើយដែរ៕
Account
Security
Favourite Content