សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមច្បាប់ស្តីពីការរៀបចំដែនដី នគរូបនីយកម្ម និងសំណង់ និងអនុក្រឹត្យស្តីពីលិខិតអនុញ្ញាតសាងសង់រាល់ការសាងសង់សំណង់ណាមួយ ត្រូវមានការអនុញ្ញាតពីអាជ្ញាធរមានសមត្ថកិច្ចវៀរលែងតែសំណង់មួយចំនួនដែលមិនតម្រូវឱ្យសុំលិខិតអនុញ្ញាតដូចជា សំណង់ជាប្រភេទលំនៅឋានប្រជាពលរដ្ឋដែលស្ថិតនៅជនបទ ឬឆ្ងាយពីផ្លូវជាតិ និងឆ្ងាយពីតំបន់រមណីយដ្ឋានទេសចរណ៍ តំបន់បេតិកភណ្ឌជាតិ និងតំបន់រក្សាការពារជាដើម ។
ចំពោះអ្នកអភិវឌ្ឍន៍អចលនវត្ថុដែលគេស្គាល់ភាគច្រើនជាម្ចាស់គម្រោងផ្ទះល្វែង បុរី ឬ ខុនដូ នោះ ត្រូវតែស្នើសុំអាជ្ញាបណ្ណអភិវឌ្ឍន៍អចលនវត្ថុទៅតាមប្រភេទ ឬទំហំនៃការអភិវឌ្ឍអចលនវត្ថុពីក្រុមការងារអន្តរក្រសួងដែលស្ថិតក្រោមឱវាទក្រសួងសេដ្ឋកិច្ច និងហិរញ្ញវត្ថុ ។ បុគ្គលអភិវឌ្ឍន៍អចលនវត្ថុនេះត្រូវតែមានអាជ្ញាប័ណ្ណអភិវឌ្ឍន៍អចលនវត្ថុទើបមានសិទ្ធិស្របច្បាប់ក្នុងការប្រកាសលក់ផ្ទះ ឬសំណង់អគាររបស់ខ្លួនបាន ។
ដើម្បីទទួលបានលិខិតអនុញ្ញាតសាងសង់ ម្ចាស់សំណង់ត្រូវដាក់ពាក្យស្នើសុំអនុញ្ញាតសាងសង់ ហើយពាក្យស្នើសុំនេះត្រូវមានឯកសារ និងប្លង់ចាំបាច់ ។ ឯកសារ និងប្លង់ចាំបាច់សម្រាប់ភ្ជាប់ពាក្យសុំអនុញ្ញាតសាងសង់សំណង់ធំៗ ត្រូវរៀបចំដោយស្ថាបត្យករខ្មែរមានសញ្ញាបត្រ ឬជនណាដែលមានការទទួលស្គាល់ពីស្ថាប័នមានសមត្ថកិច្ច ។ ពាក្យស្នើសុំអនុញ្ញាតសាងសង់ត្រូវយកមកដាក់សុំដោយម្ចាស់កម្មសិទ្ធិដី ឬអ្នកបានទទួលសិទ្ធិពីម្ចាស់កម្មសិទ្ធិ ។ ពាក្យសុំអនុញ្ញាតនេះត្រូវមានភ្ជាប់មកជាមួយផងនូវឯកសារបញ្ជាក់អំពីកម្មសិទ្ធិរបស់ម្ចាស់ដី។ ពាក្យសុំលិខិតអនុញ្ញាតសាងសង់ និងបណ្តាប្លង់ត្រូវចុះហត្ថលេខាដោយម្ចាស់ដី និងអ្នកធ្វើគម្រោង ។ កាលណាអ្នកសុំពុំមែនជាម្ចាស់កម្មសិទ្ធិអ្នកសុំដែលទទួលសិទ្ធិពីម្ចាស់កម្មសិទ្ធិក៏ត្រូវចុះហត្ថលេខាលើសំណុំលិខិតពាក្យស្នើសុំលិខិតអនុញ្ញាតសាងសង់ដែរ។
ចំពោះសមត្ថកិច្ចដែលចេញលិខិតអនុញ្ញាតគឺមានសាលាខេត្ត និងសាលាក្រុងសម្រាប់ការសាងសង់សំណង់ដែលមានផ្ទៃក្រឡាកម្រាស់តិចជាងពី ៣ ០០០ ម៉ែត្រការ៉េ ។ ចំពោះបណ្តាសំណង់ដែលមានផ្ទៃក្រឡាកម្រាស់លើសពី ៣ ០០០ ម៉ែត្រការ៉េគឺជាសមត្ថកិច្ចរបស់ ក្រសួងរៀបចំដែនដីនគរូបនីយកម្ម និងសំណង់។
សំណុំលិខិតសុំការអនុញ្ញាតសាងសង់ចំពោះក្រុងភ្នំពេញ និងទីក្រុងដទៃទៀតត្រូវដាក់នៅការិយាល័យសុំលិខិតអនុញ្ញាតសាងសង់ (មន្ទីររៀបចំក្រុង និងសំណង់) ហើយចំពោះខេត្តត្រូវដាក់នៅសាលាស្រុក ឬសាលាខេត្ត (មន្ទីរសំណង់)។
អ្នកស្នើសុំលិខិតអនុញ្ញាតសាងសង់ ត្រូវមានពាក្យសុំលិខិតអនុញ្ញាតសាងសង់ដែលត្រូវធ្វើលើគំរូលិខិតជាផ្លូវការ ហើយត្រូវមានភ្ជាប់សំណុំលិខិតមួយចំនួនដែលចាំបាច់ដូចដូចជា ១.វិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណសម្គាល់សិទ្ធិកាន់កាប់ប្រើប្រាស់អចលនវត្ថុ ឬលិខិតកាន់កាប់ដីបណ្តោះអាសន្ន ២.សលាកបត្រដីឡូត៍និងប្លង់ទីតាំងអគារក្នុងដីឡូត៍ ៤.ប្លង់ គម្រោង ស្ថាបត្យកម្ម និងវិស្វកម្ម ៥. អត្តសញ្ញាណបណ្ណសម្គាល់ជាជនជាតិខ្មែររបស់អ្នកស្នើសុំ ៦. ពាក្យសុំលិខិតអនុញ្ញាតសាងសង់ដោយមានហត្ថលេខារបស់ម្ចាស់ដី និងអ្នកធ្វើគម្រោង ។ អាជ្ញាធរមានសមត្ថកិច្ចអាចតម្រូវបន្ថែមនូវឯកសារមួយចំនួនទៀតទៅតាមទំហំ ឬផលប៉ះពាល់នៃគម្រោងអគារ ។
ក្រោយពេលដាក់ពាក្យស្នើសុំលិខិតអនុញ្ញាតសាងសង់រួចហើយ អ្នកសាងសង់ត្រូវរង់ចាំ អាជ្ញាធរមានសមត្ថកិច្ច ត្រួតពិនិត្យសំណុំលិខិតសុំលិខិតអនុញ្ញាតសាងសង់ និងសម្រេចក្នុងរយៈពេល ៤៥ថ្ងៃ នៃថ្ងៃធ្វើការ។ រយៈពេលនេះ គិតចាប់ពីថ្ងៃដែលរាល់លិខិតស្នាមភ្ជាប់ជាមួយនឹងពាក្យស្នើសុំលិខិតអនុញ្ញាតសាងសង់បានបំពេញសព្វគ្រប់។ ក្នុងករណីគ្មានចម្លើយណាមួយពីអាជ្ញាធរនោះត្រូវចាត់ទុកបានចម្លើយជាវិជ្ជមាន។ ដោយឡែក អ្វីដែលអ្នកសាងសង់ចង់ដឹងនោះ គឺតម្លៃនៃការបង់ថ្លៃក្នុងការស្នើសុំ ដោយតម្លៃគឺគិតទៅលើទំហំផ្ទៃក្រឡា និងប្រភេទគម្រោងសាងសង់នោះ។ រាល់សំណង់ដែលសាងសង់ដោយគ្មានលិខិតអនុញ្ញាត សំណង់នោះនឹងត្រូវចាត់ទុកជាសំណង់ខុសច្បាប់ (បទល្មើស) ហើយការដ្ឋានសាងសង់នឹងត្រូវបានបញ្ឈប់ជាបន្ទាន់ ៕
Account
Security
Favourite Content