អន្សម ជានំខ្មែរមួយប្រភេទដែលបងប្អូនប្រជាជនខ្មែរចូលចិត្តនិយមទទួលទាន ជាពិសេសនៅក្នុងរដូវមានបុណ្យទានផ្សេងៗ ដែលគេវេចសម្រាប់ដាក់សែន យកទៅប្រគេនព្រះសង្ឃនៅឯវត្ត ឬសម្រាប់ហូបចួបជុំគ្រួសារផងដែរ ដែលធ្វើឱ្យមុខរបរវេចនំអន្សមលក់នេះទទួលបានការគាំទ្រច្រើនពីអតិថិជន។

នំអន្សម ត្បិតថាមានមនុស្សជាច្រើនចូលចិត្តនិយមទទួលទានក៏ពិតមែន ប៉ុន្តែមិនមែនគ្រប់គ្នាសុទ្ធតែចេះវេច និងមានពេលវេលាគ្រប់គ្រាន់ក្នុងការរៀបចំចម្អិននោះទេ ដោយសារការវេចខ្ចប់ និងចម្អិនត្រូវចំណាយពេលយូរ ហើយក៏មិនសូវមានអ្នកចេះជំនាញវេចខ្ចប់អន្សមច្រើននោះដែរ។

ក្នុងនោះ អ្នកស្រី ណាន លាងឆាយ ជាអ្នកវេចនំខ្មែរលក់ជាលក្ខណៈគ្រួសារ ជាពិសេសនៅពេលរដូវបុណ្យទានផ្សេងៗនៅក្នុងខេត្តត្បូងឃ្មុំ បានមានប្រសាសន៍ឱ្យដឹងថា អ្នកស្រីចេះពីវិធីវេចនំខ្មែរ និងការផ្សំរសជាតិពីម្ដាយដែលមានជំនាញវេចនំខ្មែរស្ទើរគ្រប់ប្រភេទ ហើយបន្តរហូតមកដល់ជំនាន់អ្នកស្រីក៏បន្តវេចហូបក្នុងគ្រួសារផង និងលក់ឱ្យអ្នកក្នុងតំបន់ដែលដឹងពីរសជាតិ និងកម្ម៉ង់ទិញចែកបងប្អូនឱ្យតែមានបុណ្យទានម្ដងៗ។

អ្នកស្រីបញ្ជាក់ថា៖

«សម្រាប់សែនក្បាលទឹកនេះ ខ្ញុំវេចនំអន្សមជ្រូក និងនំបត់ ដែលអតិថិជនភាគច្រើនជាអ្នករស់នៅក្នុងតំបន់ ទិញយកទៅដាក់សែន ឬយកទៅវត្ត ហើយក៏មានអ្នកខ្លះទិញយកទៅផ្ញើបងប្អូននៅតាមបណ្តាខេត្តផ្សេងៗ និងចែកអ្នកភ្នំពេញផងដែរ។ ហើយនំអន្សមរបស់ខ្ញុំអាចមានរសជាតិខុសពីនំរបស់អ្នកដទៃ ដោយសារតែនំដែលខ្ញុំវេចប្រើសណ្ដែកឆ្អិន ឬហៅថាបាយសណ្ដែក ដែលយើងដាំឱ្យឆ្អិន រួចលាយគ្រឿងជាមុនសិន មុននឹងយកទៅវេច ទើបធ្វើឱ្យនំនីមួយៗមានរស់ជាតិឈ្ងុយឆ្ងាញ់ ទុកបានយូរថ្ងៃក៏មិនជូរផ្អូម ជាពិសេសគឺការលាយអង្ករ និងការផ្សំគ្រឿងលើស្នូលនំ ដែលនំរបស់យើងមានទាំងរសជាតិ និងគុណភាពគេនិយមទិញគ្រប់ៗគ្នា»។

ចំពោះប្រភេទនំវិញ ជាទូទៅគេវេចនំអន្សមជ្រូក និងនំបត់ តាមការកម្ម៉ង់របស់អតិថិជន ហើយបរិមាណអង្ករដំណើបសម្រាប់វេចនំ ប្រមាណ ១០គីឡូក្រាម ដែលអាចវេចអន្សមជ្រូកបាន ៦០នំ និងអាចចំណេញបានប្រមាណ៦-៧ ម៉ឺនរៀលក្នុងមួយថ្ងៃគ្រាន់នឹងរួចថ្លៃម្ហូបប្រចាំថ្ងៃ។ សម្រាប់នំខ្មែរដែលចម្អិនរួចរាល់ត្រូវបានលក់ក្នុងតម្លៃសមរម្យ ដូចជា នំអន្សមជ្រូកមួយមានតម្លៃ ៤០០០រៀល នំបត់ ៣០០រៀល ដែលគេមកយកដល់ផ្ទះខ្លះ និងយកទីលក់នៅផ្សារក្នុងភូមិខ្លះ។

ទាក់ទងនឹងគ្រឿងផ្សំសម្រាប់ធ្វើនំរួមមាន អង្ករដំណើប សណ្ដែក សាច់ជ្រូក ដូង ម្រេច ស្ករ អំបិល បង្គាក្រៀម ក្រៅពីនេះមាន ស្លឹកចេក ខ្សែក្រចៅសម្រាប់ចង ។  ឯរបៀបធ្វើនំអន្សមជ្រូកវិញ ដំបូងគេយកអង្ករទៅតាំទឹករយៈពេលប្រមាណជាង១ម៉ោងរួចលាងឱ្យស្អាត និងទុកឱ្យស្រស់ទឹក លាយជាមួយខ្ទិះដូង និងគ្រឿង។ យកសណ្ដែកលឿងទៅលាង និងដាំបាយសណ្ដែកឱ្យឆ្អិនល្អជាមុនសិន ទើបយកបាយសណ្ដែកទៅឆាលាយគ្រឿង និងដាក់ម្រេច រីឯផ្នែកស្នូលសាច់ជ្រូក ត្រូវលាងឱ្យស្អាតរួចហាន់វែងៗលាយជាមួយនឹងខ្ទឹមសបុក ម្រេច ស្ករ និង បង្គាក្រៀមបុកឱ្យម៉ដ្ឋផងដែរ។

ពាក់ព័ន្ធនឹងបច្ចេកទេសនៃការវេចខ្ចប់ផងដែរថា សម្រាប់ប្រភេទនំអន្សមជ្រូក ពេលវេចត្រូវដាក់អង្ករ សណ្ដែក និងសាច់ លុះពេលចង ត្រូវចងចំណងខ្សែកណ្ដាល ឬហៅថាខ្សែចង្កេះនំឱ្យជាប់ល្អ ទើបយកធាងចេកបុកអង្ករឱ្យហាប់ ទើបបត់កាច់ក្បាល និងចងចេញរាងស្អាត។ ការចងទៀតសោត ត្រូវប្រើខ្សែក្រចៅ ហើយត្រូវចងឱ្យបានណែនល្អទើបនំអន្សមមិនចូលទឹក និងអាចទុកបានយូរ។ ចុងក្រោយ នៅពេលចម្អិន ដាំទឹកឱ្យពុះ ហើយដាក់ស្ងោរក្នុងរយៈពេលប្រមាណ៧ម៉ោងទើបឆ្អិនល្អ ។

ជាចុងក្រោយ អាជីវករលក់នំខ្មែររូបនេះក៏មានមិតដែរថា ការវេចនំមិនពិបាកពេកនោះទេ គ្រាន់តែអង្គុយយូរឈឺចង្កេះបន្តិច តែអាចរកចំណូលបន្ថែមបានគ្រាន់នឹងទិញម្ហូបបាន ហើយនៅថ្ងៃខាងមុខ អ្នកស្រីនៅតែបន្តអាជីពជាអ្នកវេចនំលក់ ដែលក្រៅពីអាចទទួលបានចំណូល ក៏បានចូលរួមចំណែកថែរក្សាប្រភេទនំខ្មែរ ហើយអាចបន្តជំនាញផ្នែកវេចនំខ្មែរនេះទៅអ្នកជំនាន់ក្រោយៗទៀត៕