ប៉ារីស ៖ ប្រមុខដឹកនាំរាជរដ្ឋាភិបាលកម្ពុជាមានប្រសាសន៍ថា ក្នុងរយៈពេល ៤២ខែ អំឡុងពេលបញ្ហាជំងឺកូវីដ១៩ រាជរដ្ឋាភិបាលបានចំណាយថវិកាអស់ជិត ១ ៣០០ លានដុល្លារ (១,៣ពាន់លានដុល្លារ) ដើម្បីជួយដល់ប្រជាពលរដ្ឋជាង ៧០ ម៉ឺនគ្រួសារ គិតជាចំនួនប្រជាជនជិត ២ លាន ៧ សែននាក់ ដែលទទួលបានផលពីការឧបត្ថម្ភផ្ទាល់របស់រាជរដ្ឋាភិបាល។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូច្នេះ នាឱកាសជួបសំណេះសំណាលបងប្អូនសហគមន៍ខ្មែរនៅទ្វីបអឺរ៉ុប នៅទីក្រុងប៉ារីស​ ប្រទេសបារាំង ល្ងាចថ្ងៃអាទិត្យ ទី១៤ ខែមករា ឆ្នាំ២០២៤។

សម្តេចធិបតី ហ៊ុន ម៉ាណែត បានមានប្រសាន៍ដូច្នេះថា រាជរដ្ឋាភិបាលបានចេញគោលការដើម្បីជួយទៅដល់ប្រជាពលរដ្ឋ ក្នុងនោះក្នុងរយៈពេល ៤២ ខែ ដែលយើងអនុវត្តចាប់តាំងពីឆ្នាំ២០២០ មក ការឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះក្នុងកំឡុងពេលកូវីដ១៩ ក្រោយមកក៏បានពង្រីកដល់ក្មេងៗ អាយុពីកើតដល់ ៥ឆ្នាំ និងផ្សេងៗទៀត និងអ្នកមានផ្ទុកមេរោគអេដស៍ផ្សេងៗ។

សម្តេចធិបតី បានថ្លែងបន្តថា ៖

“ក្នុងរយៈពេល ៤២ខែនេះ រាជរដ្ឋាភិបាលបានចំណាយអស់ជិត ១៣០០លានដុល្លារអាមេរិក ដើម្បីជួយដល់ប្រជាពលរដ្ឋជាង ៧០ម៉ឺនគ្រួសារ គិតជាប្រពលរដ្ឋ ២លាន ៧សែននាក់ បានទទួលផលពីជួយឧបត្ថម្ភសាច់ប្រាក់ជូនទៅគាត់តែម្តង ហើយនេះជាកាទទួលខុសត្រូវរបស់រាជរដ្ឋាភិបាល”។

សម្តចធិបតី បានលើកឡើងថា ក្រោយពីវិបត្តិជំងឺកូវីដ១៩ ពិភពលោកបន្តជួបវិបត្តិថាមពលមួយផ្សេងទៀត ដែលកើតចេញពីវិបត្តិសង្គ្រាមរុស្ស៊ី និងអ៊ុយក្រែន និងសង្គ្រាមនៅមជ្ឈឹមបូព៌ា។ ក្នុងឆ្នាំនេះ ប្រទេសទាំងអស់កំពុងព្យាកររឿង អ៊ែនីញូ (El Nino) ស្រូវឡើងថ្លៃធ្វើឱ្យប្រជាកសិករសប្បាយចិត្ត តែអ្នកប្រើប្រាស់កំពុងព្រួយបារម្ភរឿងអង្ករឡើងថ្លៃ ហើយរាជរដ្ឋាភិបាលក៏បានត្រៀមវិធានការដើម្បីដោះស្រាយក្នុងកម្រិតណាមួយផងដែរ។ នៅពេលនេះ នៅកម្ពុជាកន្លែងខ្លះគឺកំពុងព្យាករមើលលើការប្រើប្រាស់ទឹករវាងការធ្វើស្រែ ជាមួយនឹងទឹកសម្រាប់ប្រជាពលរដ្ឋប្រើប្រាស់ ហើយកន្លែងខ្លះរដ្ឋបាលខេត្តបានចេញគោលការណ៍ណែនាំរួចហើយឱ្យមានការផ្អាកធ្វើស្រែប្រាំង ដើម្បីកុំឱ្យជួយបញ្ហា ហើយដែលបញ្ហានេះមិនមែនកើតមានតែនៅកម្ពុជាទេ នៅប្រទេសបារាំង អូស្ត្រាលី និងប្រទេសផ្សេងៗទៀត នៅពេលតែដល់ខែស្ងួតខ្លាំង គឺនឹងមានការណែនាំក្នុងការប្រើប្រាស់ទឹកដោយសន្សំសំចៃផងដែរ។

អំឡុងពេលពេលជួបសំណេះសំណាលនេះដែរ សម្តេចធិបតីក៏បានលើកឡើងពីសំពាធអតិផរណាដែលបានប៉ះពាល់ដល់សេដ្ឋកិច្ចលើពិភពលោក រួមទាំងកម្ពុជាក៏ទទួលរងផលប៉ះពាល់ផងដែរ។ រាជរដ្ឋាភិបាលបានដាក់ចេញគោលការឧបត្ថម្ភសាច់ប្រាក់បន្ថែមទៀត សម្រាប់គ្រួសារងាយរងហានិភ័យ ដោយសំពាធអតិផរណា ដែលរដ្ឋាភិបាលបានអនុវត្តពីចុងឆ្នាំ២០២២ មកដល់ពេលនេះអ្នកដែលបានផលប្រយោជន៍ពីការជួយនេះមានជាង ៤៩ម៉ឺនគ្រួសារ គិតជាប្រជាពលរដ្ឋ ១លាន ៨សែននាក់ ហើយនឹងមានបន្ថែមតទៅទៀត ដើម្បូជួយដល់ប្រជាពលរដ្ឋក្នុងពេលលំបាក ដែលនេះជាអ្វីដែលរាជរដ្ឋាភិបាលត្រូវជួយដល់ប្រជាពលរដ្ឋ។

សម្តេចធិបតី ហ៊ុន ម៉ាណែត បានបញ្ជាក់ដូច្នេះថា នៅពេលប្រជាពលរដ្ឋជួបការលំបាក ដាច់ខាត រាជរដ្ឋាភិបាល យកចិត្តទុកដាក់គ្រប់ពេលវេលា និងបានចំណាយទុនច្រើនណាស់ដើម្បីជួយប្រជាពលរដ្ឋ ទោះបីជារដ្ឋមានទុនតិច តែបើគិតពីអ្វីដែលរដ្ឋបានចេញរួចហើយនេះគឺមានច្រើនហើយ តែទោះយ៉ាងណាការចំណាយទុនគឺជាការចាំបាច់ដើម្បីជួយដល់ប្រជាពលរដ្ឋ ទោះជាការចំណាយប៉ុន្មានក៏រដ្ឋត្រូវតែធ្វើផងដែរ៕