ភ្នំពេញ ៖ ក្នុងឱកាសសំណេះសំណាលជាមួយបងប្អូនសហគមន៍ខ្មែររស់នៅក្នុងទ្វីបអឺរ៉ុបជាង ២ ៥០០នាក់ កាលពីល្ងាចថ្ងៃចុងសប្ដាហ៍កន្លងទៅនៅប្រទេសបារាំង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា វត្តមានរបស់សម្តេចនៅក្រៅប្រទេស ជាការទាក់ទាញវិនិយោគិន ដើម្បីទៅវិនិយោគនៅកម្ពុជា ជាពិសេសក្នុងវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីស ។

សម្តេចធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់ថា កម្មវិធីច្រើន ហើយមមាញឹកបែបនេះ តែដោយសារការសម្រេចចិត្តរបស់សម្តេចផ្ទាល់តែម្តង ពីព្រោះថា បើជំនួបរបស់ សម្តេចជាមួយដៃគូអន្តរជាតិត្រឹម១៥នាទី អាចទាក់ទាញការវិនិ​យោគរបស់ពួកគាត់នៅកម្ពុជា នោះសម្តេចត្រូវតែចំណាយពេលជួបដោយមិនខ្វល់ពីការនឿយហត់ គឺភារកិច្ចតែមួយ ធ្វើយ៉ាងណាដើម្បីគោះទ្វារដើម្បីចាប់ដៃ ដើម្បីបង្ហាញទាំងថ្នាក់ដឹកនាំនយោបាយ អង្គការ ក៏ដូចជាធុរកិច្ច ទៅលើពិភពលោកអំពីកម្ពុជា ដោយវត្តមាននៅអឺរ៉ុប៦ថ្ងៃនេះ សម្តេចមានកម្មវិធីប្រជុំប្រមាណ៤០ ។

ពិធីសំណេះសំណាលរវាងសម្ដេចធិបតី នាយករដ្ឋមន្ត្រី និងពលរដ្ឋនាថ្ងៃនោះ គឺបានបន្តយ៉ាងខ្ជាប់ខ្ជួនពីសម្តេចតេជោ ហ៊ុន សែន អតីតនាយករដ្ឋមន្ត្រី ដែលតែងបានផ្តល់ពេលវេលាដើម្បីជួបជាមួយបងប្អូនសហគមន៍រស់នៅតាមបណ្តាក្រៅប្រទេស ហើយក្នុងនោះតំបន់អឺរ៉ុប ក៏ត្រូវបានរៀបចំជាបន្តបន្ទាប់។ គោលបំណងសំខាន់ក្នុងការជួបជុំ គឺដើម្បីសាកសួរសុខទុក្ខ និងផ្តល់នូវការសំណេះសំណាលប្រកបដោយស្មារតីខ្មែរតែមួយ ជាពិសេសក៏បានឆ្លៀតឱកាសក្នុងការធ្វើបច្ចុប្បន្នភាពអំពីស្ថានភាពសុខសន្តិភាព ការអភិវឌ្ឍ និងសេចក្តីសុខសាន្តរបស់កម្ពុជា។

សម្តេចនាយករដ្ឋមន្ត្រី បានលើកឡើងដែរថា វេទិកាសេដ្ឋកិច្ចពិភពលោក គឺជាវេទិកាមួយដែលបណ្ដុំថ្នាក់ដឹកនាំកំពូល ទាំងនយោបាយ ទាំងសេដ្ឋកិច្ច ទាំងធុរកិច្ច មកប្រមូលគ្នា ហើយសម្តេចតេជោ ហ៊ុន សែន តែងតែចូលជាប្រចាំ ហើយការចូលរួមវេទិកានេះ ដើម្បីបង្ហាញអំពីគោលនយោបាយរបស់កម្ពុជាមួយចំនួន ពាក់ព័ន្ធទៅនឹងស្ថានភាពសេដ្ឋកិច្ច ធុរកិច្ចពិភពលោក ក្នុងនាមជាប្រមុខរាជរដ្ឋាភិបាលកម្ពុជា និងជំហររបស់កម្ពុជា។

សម្តេចធិបតី ហ៊ុន ម៉ាណែត បានបញ្ជាក់បន្ថែមថា ការចូលរួមពិភពលោកសេដ្ឋកិច្ចនេះ ដើម្បីទៅផ្សព្វផ្សាយអំពីគោលនយោបាយរបស់កម្ពុជា ក្នុងការចូលរួមជាមួយបណ្ដាធុរកិច្ចផ្សេងៗ ដើម្បីបង្កើតទំនាក់ទំនងសេដ្ឋកិច្ច ដែលនៅទីនេះកិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោក ធ្វើឡើងក្រោមមូលបទ «ការកសាងឡើងវិញនូវទំនុកចិត្ត» ដោយផ្តោតលើគោលការណ៍ជាមូលដ្ឋាន ដែលជំរុញឱ្យមានទំនុកចិត្ត រួមទាំងតម្លាភាព សង្គតិភាព និងគណ​នេយ្យភាព។

សម្តេចធិបតី ហ៊ុន ម៉ាណែត បានលើកឡើងថា គោលនយោបាយរបស់កម្ពុជា គឺធ្វើយ៉ាងណាឱ្យកម្ពុជាអាចរស់ដោយខ្លួនឯង ពិសេសគោលដៅរបស់រដ្ឋាភិបាលថ្មី គឺធ្វើយ៉ាងណាត្រូវឱ្យអត្រាក្រីក្រធ្លាក់ចុះនៅក្រោម១០ភាគរយ តាមរយៈគោលនយោបាយបញ្ចកោណ និងត្រូវធ្វើឱ្យប្រទេសកម្ពុជាមានចំណូលមធ្យមកម្រិតខ្ពស់ឆ្នាំ២០៣០ និងក្លាយជាប្រទេសអ្នកមានឆ្នាំ២០៥០។

សូមបញ្ជាក់ថា ដំណើរ​ទស្សនកិច្ច​របស់សម្តេច​ធិបតី ហ៊ុន ម៉ាណែត ​នៅបារាំង ​គឺកម្ពុជាបាន​វាយតម្លៃ​ខ្ពស់​ទៅលើ​តួនាទី​របស់​បារាំង​ក្នុង​ការកសាង​សន្តិភាព​ និង​អភិវឌ្ឍ​នៅ​កម្ពុជា​ស្ទើរ​គ្រប់​វិស័យ ​ដែលជា​កត្តា​សំខាន់​ធ្វើឱ្យ​សេដ្ឋកិច្ច និង​សង្គម​កម្ពុ​ជាមាន​ការរីក​ចម្រើន​ខ្លាំង ​និងជាកិច្ច​​លើកកម្ពស់​កិច្ចសហប្រតិបត្តិការលើ​ព​ហុ​វិស័យ​ ពាណិជ្ជកម្ម សេដ្ឋកិច្ច និង​សង្គមបន្ថែមទៀត​ដល់​កម្ពុជា ក៏ដូចជា​ជំរុញ​ការវិនិយោគ និង​អ្នក​ទេសចរ​បារាំង​បន្ថែមទៀត​មក​កម្ពុជា​​។​

ដោយឡែកលោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំនៅកម្ពុជា បានថ្លែង​​​ក្នុង​សន្និសីទសារព័ត៌មាន ​ដោយគូស​បញ្ជាក់​ថា ​​ទោះជាយ៉ាងណា ក៏មានមានក្រុមហ៊ុន និងសហគ្រាសបារាំងជាង ២០០ កំពុងវិនិយោគនៅក្នុងប្រទេសកម្ពុជា ស្ថាន​ទូតធ្វើយ៉ាងណា​ជួយ​ជំរុញ​ឱ្យ​ធុរកិច្ច​​បារាំងមកវិនិយោគឱ្យបានច្រើន​ថែមទៀត។

សូមបញ្ជាក់ថា ដោយយោងតាមទិន្នន័យសភាពាណិជ្ជកម្មបារាំងប្រចាំនៅកម្ពុជា ចំនួននេះនៅតិតតួច ដែលគួរតែមានការវិនិយោគច្រើនជាងនេះ ហើយមូលហេតុ​ដែលក្រុមហ៊ុន​បារាំងហាក់​មិន​សូវ​មក​វិនិយោគ​​នៅ​ប្រទេស​កម្ពុជាដោយសារមាន​​កត្តារាំងស្ទះ​​មួយ​ចំនួន រួមមាន កង្វះ​​ព័ត៌មាន​ពី​ស្ថានភាព​​វិនិយោគ​នៅ​ប្រទេស​កម្ពុជា កង្វះខាត​ផ្នែក​ឡូជីស្ទីក និង​កម្លាំង​ពលកម្ម រួម​ទាំង​បញ្ហា​ពន្ធ​ក៏​ពាក់ព័ន្ធ​ផងដែរដល់​ឱកាស​ទាក់​ទាញ​វិនិយោគ​បារាំង​នៅ​កម្ពុជា៕