ភ្នំពេញ ៖ ធនាគារពិភពលោក (World Bank) បានព្យាករថា កំណើនសេដ្ឋកិច្ចកម្ពុជាក្នុងឆ្នាំ២០២៥ មានត្រឹម ៤,០% និង ៤,៥% ក្នុងឆ្នាំ២០២៦ ដោយសារតែកត្តាគួបផ្សំរវាងភាពប្រឈម និងស្ថានភាពមិនប្រាកដប្រជាសកល, ការផ្លាស់ប្តូរគោលនយោបាយពាណិជ្ជកម្ម, ភាពជាប់គាំងក្នុងវិស័យអចលនទ្រព្យ និងការរឹតបន្តឹងនៃវដ្តឥណទាន។

នៅក្នុងរបាយការណ៍ចេញផ្សាយនៅថ្ងៃ១១ ខែមិថុនា ឆ្នាំ២០២៥ ធនាគារពិភពលោក បានផ្តល់ជាអនុសសន៍ថា ការនាំចេញដ៏ស្វាហាប់​ និងការងើបឡើងវិញជាបណ្តើរៗនៃការប្រើប្រាស់ឯកជន បាន​រួមចំណែក​ច្រើន​ធ្វើ​ឱ្យ​សេដ្ឋកិច្ចកម្ពុជារក្សា​បាន​ភាពធន់បើទោះបីជាមានភាពមិនប្រាកដ​ប្រជា​សកលកើនឡើងក៏ដោយ។ ដើម្បីរក្សាបាន​កំណើននៅ​ក្នុង​បរិការណ៍នេះ កម្ពុជាចាំបាច់ត្រូវ​ផ្តោតលើការ​ប្រឹង​ប្រែង​ធ្វើ​ឱ្យ​សេដ្ឋកិច្ចកាន់តែមានភាពសម្បូរបែប​​ និងការបង្កើតបរិយាកាសអំណោយផលសម្រាប់វិស័យឯកជនវិនិយោគ និងបង្កើតការងារ។

​នៅ​ក្នុង​របាយការណ៍បច្ចុប្បន្នភាពសេដ្ឋកិច្ចកម្ពុជា​ «ពុះពារភាព​មិន​ប្រាកដប្រជា​» លោកស្រី Tania Meyer ប្រធាន​គ្រប់គ្រងធនាគារពិភពលោកប្រចាំកម្ពុជាបានថ្លែងថា៖

«ការធ្វើពិពិធកម្មសេដ្ឋកិច្ចមានសារៈសំខាន់សម្រាប់កម្ពុជាក្នុងការរក្សាកំណើនឱ្យ​មាន​ចីរភាព​ និងការបង្កើតការងារចំពេលមានភាពមិនប្រាកដប្រជា ជាពិសេសដោយ​ពង្រីក​មូលដ្ឋាន​សេដ្ឋកិច្ច​ឱ្យ​ហួសពីការពឹងផ្អែកលើវិស័យ​សំណង់ និងការនាំចេញសម្លៀកបំពាក់ ព្រមទាំងជំរុញ​ការផលិត និងសេវាកម្មតម្លៃបន្ថែមខ្ពស់ថែមទៀត»។

លោកស្រីបានបន្ថែមថា៖

«កំណែទម្រង់ប្រាក់ចំណូលអាចជួយ​គាំទ្រដល់ការធ្វើ​ឱ្យ​បរិយាកាសអាជីវកម្មមាន​ភាពកាន់តែ​ប្រសើរឡើង ហើយបង្កើតលំហ​សារពើពន្ធមួយ​សម្រាប់ការវិនិយោគសំខាន់ៗទៅលើ​មូលធន​មនុស្ស និងហេដ្ឋារចនាសម្ព័ន្ធ»។

ការនាំចេញរបស់កម្ពុជា ជាពិសេសសម្លៀកបំពាក់ ទំនិញធ្វើដំណើរ ស្បែកជើង និងកង់ បានកើនឡើង ១១,៦% នៅក្នុងត្រីមាសទីមួយនៃឆ្នាំនេះ ធៀប​ទៅនឹង​រយៈពេលដូចគ្នា​ក្នុង​ឆ្នាំមុន​។ សេវាកម្មទេសចរណ៍បានកើនឡើង ១៦,១%សម្រាប់ការមកដល់របស់ភ្ញៀវអន្តរជាតិ ទោះបីជាចំនួននេះនៅតែទាបជាងកម្រិត​នៅ​ក្នុង​ឆ្នាំ២០១៩ ក៏ដោយ។ ទន្ទឹមនឹងនេះ ការប្រើប្រាស់ឯកជនបានងើបឡើងវិញដូចមាន​ជា​ភស្តុតាងស្រាប់​នូវការកើនឡើងនៃការនាំចូលទំនិញប្រើប្រាស់ រួមមានគ្រឿងឧបភោគបរិភោគ សម្លៀកបំពាក់ រថយន្ត និងម៉ូតូ ជាដើម។

ដោយឡែក នៅពីខាងក្រៅវិញ ការកើនឡើងនៃប្រាក់បញ្ញើរពីបរទេស និងចំណូលពីទេសចរណ៍ បានជួយ​ទូទាត់ប៉ះប៉ូវ​ដល់​ឱន​ភាពពាណិជ្ជកម្មដែលកំពុងកើនឡើង​ ដោយទុនបម្រុងបានកើនដល់ ២៤,៧ពាន់លានដុល្លារអាម៉េរិក។ កំណើនសាច់​ប្រាក់កំពុង​ចរាចរ បានកើនឡើងដល់ ១៩,០% ពីមួយឆ្នាំទៅមួយឆ្នាំ ដោយ​សារលក្ខខណ្ឌរូបិយវត្ថុមាន​អំណោយផល។ អតិផរណាបានកើនឡើងបន្តិច ដល់ ៣,៧% ភាគច្រើនដោយសារតម្លៃអាហារក្នុងពេល​ដែលគុណភាពទ្រព្យសកម្ម​ក្នុង​វិស័យហិរញ្ញវត្ថុបានធ្លាក់ចុះ ហើយ​កម្ចីមិនដំណើរការកើន​​សមាមាត្រ​កាន់​តែ​ខ្ពស់ជាង​មុន​។

ធនាគារពិភពលោកបានពិនិត្យមើលឃើញថា ការ​កំណែទម្រង់ពន្ធដារអាចធ្វើ​បាន​ក្នុងរូបភាពបែបណា​ខ្លះដើម្បីអាចជួយជំរុញ​​ឱ្យ​បរិយា​កាសធុរកិច្ចកាន់​តែ​មាន​អំណោយផលដល់កំណើនសេដ្ឋកិច្ច​ ហើយ​ស្របគ្នានោះ បង្កើតឱ្យ​មាន​លំហសារពើពន្ធសម្រាប់ការវិនិយោគសំខាន់ៗទៅលើមូលធនមនុស្ស និងហេដ្ឋារចនាសម្ព័ន្ធ ដែលជាគន្លឹះសម្រាប់​ឈាន​ទៅ​សម្រេចបាននូវ​ចក្ខុវិស័យរបស់កម្ពុជា ក្នុងការក្លាយជាប្រទេសមានចំណូលខ្ពស់ត្រឹមឆ្នាំ២០៥០។ របាយ​ការណ៍បាន​លើកឡើងនូវទិដ្ឋភាពប្រទាក់​ក្រឡាគ្នាបីយ៉ាង ដែលបញ្ជាក់ពីសារៈសំខាន់នៃកំណែទម្រង់គ្រប់​ជ្រុង​ជ្រោយ​។ ទិដ្ឋភាព​ទាំងនោះ​រួមមាន​៖ ទី១ ការកៀរគរធនធានឱ្យ​បាន​គ្រប់គ្រាន់ដើម្បីឆ្លើយតប​សេចក្តី​ត្រូវ​ការវិនិយោគអភិវឌ្ឍន៍សំខាន់ៗ , ទី២ ការពង្រឹងបរិយាកាសធុរកិច្ចតាមរយៈប្រព័ន្ធពន្ធដារដែលមានប្រសិទ្ធផល និងអាចព្យាករបានកាន់តែល្អជាង​បច្ចុប្បន្ន, និងទី៣ ការលើកកម្ពស់សមធម៌ដោយធានាឱ្យ​មាន​ការបែងចែកបន្ទុកពន្ធដារប្រកបដោយយុត្តិធម៌ និងការដោះស្រាយផលប៉ះពាល់សង្គម និងបរិស្ថាន៕