ភ្នំពេញ ៖ របាយការណ៍ស្តីពីស្ថានភាពឥណទាននៅកម្ពុជាដែលបានចេញផ្សាយកាលពីពេលថ្មីៗនេះបានបង្ហាញថា  អត្រានៃការសង​ត្រឡប់យឺតលើសពី៩០ថ្ងៃ មានចំនួន ៦.០៣% ត្រឹមចុងឆ្នាំ២០២៤។ ក្នុងនោះខេត្តដែលមានអត្រានៃការសងត្រឡប់យឺតលើសពី៩០ថ្ងៃ ទាបជាងគេមាន ខេត្តស្វាយរៀង (៣.៥១%) ខេត្តព្រៃវែង (៤.៨៤%) ខេត្តតាកែវ (៥.០០%) ខេត្តកែប (៥.១១%) និងខេត្តកំពង់ចាម (៥.៤៥%)។

របាយការណ៍ដដែលបានបញ្ជាក់ថា ខេត្ត និងរាជធានី ដែលមានការប្រើប្រាស់កម្ចីច្រើនជាងគេ(៦០%) មានអត្រានៃអ្នកសងត្រឡប់យឺតលើសពី ៩០ថ្ងៃ ជាមធ្យម ៥.៧៣% នៅតាមបណ្តាខេត្តមួយចំនួន ដូចជា ខេត្តកំពង់ស្ពឺ(៦.៨៩%) ខេត្តកំពង់ធំ(៦.៦៨%) ខេត្តព្រះវិហារ(៦,០១%) ខេត្តព្រះសីហនុ (៥.៥៧%) និងខេត្តស្វាយរៀង (៣,៥១%)។

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌី ប្យូរ៉ូ ខេមបូឌា បានបញ្ជាក់អំពីមូលហេតុនៃការសងត្រឡប់យឺតនេះថា ភាគច្រើនគឺបណ្តាលមកពីកំណើនសេដ្ឋកិច្ចយឺត ដែលជាកត្តាចម្បងជាងគេ សម្រាប់ការកើនឡើងនៃឥណទានសងយឺតយ៉ាវចាប់ពី៩០ថ្ងៃ (90+DPD) ក្នុងឆ្នាំ២០២៤។

លោកថា ៖

«ដោយសារក្នុងវិស័យសេដ្ឋកិច្ចទាំងមូល មានវិស័យមួយចំនួនដែលមានកំណើនសេដ្ឋកិច្ចទាប និងវិស័យមួយចំនួនទៀតមានកំណើនខ្ពស់ ដែលជារួមធ្វើឱ្យមានការកើនឡើងនៃការសងយឺតយ៉ាវ។ តួលេខនៃឥណទានសងយឺតយ៉ាវចាប់ពី ៩០ថ្ងៃ (90+DPD) នឹងប្រសើរឡើង ខណៈពេលដែលមានការព្យាករណ៍កំណើនសេដ្ឋកិច្ច និងវិធានការនានាដែលបានដាក់ចេញដោយធនាគារជាតិនៃកម្ពុជា»។

ពាក់ព័ន្ធនឹងការសងត្រឡប់យឺតនេះ លោក អឿ សុធារ័ត្ន បានផ្តល់ជាទស្សនទានដល់គ្រឹះស្ថានធនាគារ និងហិរញ្ញវត្ថុ ប្រើប្រាស់សេវាវិភាគទិន្នន័យ ដើម្បីគ្រប់គ្រងហានិភ័យឥណទានកាន់តែប្រសើរ។ ទន្ទឹមនឹងនេះ លោកក៏បានណែនាំឱ្យអតិថិជនដែលប្រើប្រាស់ឥណទាន ត្រូវតែតាមដានសុខភាពហិរញ្ញវត្ថុរបស់ខ្លួនឱ្យបានជាប់លាប់ ដើម្បីដឹងពីស្ថានភាពហិរញ្ញវត្ថុរបស់ខ្លួន និងភាពត្រឹមត្រូវនៃព័ត៌មានដែលត្រូវបានកត់ត្រាក្នុងប្រវត្តិឥណទានផ្ទាល់ខ្លួន។

គួរបញ្ជាក់ថា រូបវន្តបុគ្គល និងក្រុមហ៊ុន ឬសហគ្រាសមានប្រហែល ៧៦% ដែលមានកម្ចីជាមួយគ្រឹះ​ស្ថានធនាគារ និងហិរញ្ញវត្ថុតែ១ នៅទូទាំងប្រទេស។ អតិថិជនលក្ខណៈបុគ្គល និងក្រុមហ៊ុន ឬសហគ្រាសមានទំនាក់ទំនងខ្ចីជាមួយ ២ស្ថាប័នមានអត្រាប្រមាណ ២០% ហើយ​ជាមួយ ៣ស្ថាប័នមានប្រហែល ៤១%។

ជារួម ចំពោះទិដ្ឋភាពទូទាំងប្រទេស ចំនួនប្រជាជនដែលប្រើប្រាស់ឥណទាន សរុបបមានចំនួន ៥.០៤លាននាក់ នៅក្នុង ២៥ រាជធានី / ខេត្ត ជាមួយនឹងកម្ចីសរុបចំនួន ២៣៦.៤២៩.២៦៦ លានរៀល ចំណែកទំហំទីផ្សារឥណទានទូទាំងប្រទេសវិញ គឺមានអត្រាអ្នកប្រើប្រាស់ចំនួន ៥១១% បើធៀបនឹងប្រជាជនសរុប (១៨ឆ្នាំឡើង)។ ចំណែកឯគុណភាពឥណទានវិញ គឺមានអត្រាយឺតយ៉ាវក្នុងការសងត្រឡប់លើសពី៩០ថ្ងៃ មានអត្រា ៦.០៣% ភាគច្រើន(៧៦%)ខ្ចីប្រាក់ពីស្ថាប័នតែមួយ៕ វិន ឈុនហ៊ាត