សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កាលពីថ្ងៃចន្ទសប្តាហ៍កន្លងមកនេះ អង្គការសហប្រជាជាតិ ហៅកាត់ថា យូអិន បានបង្ហាញនូវរបាយការណ៍ចុងក្រោយមួយស្តីអំពីការឆបោកតាមប្រព័ន្ធអនឡាញ ឬ Cyberscam ដោយបង្ហាញការព្រួយបារម្ភថា វាកំពុងរីករាលដាលស្ទើរពាសពាញសកលលោកប្រៀបដូចទៅនឹងជំងឺមហារីកមួយដែលពិបាកព្យាបាលយ៉ាងដូច្នោះដែរ។
របាយការណ៍ដដែលបានបង្ហាញថា ឧស្សាហកម្មបោកប្រាស់តាមប្រព័ន្ធអនឡាញនេះបានកើនឡើងក្នុងទំហំដល់ទៅរាប់សិបពាន់លានដុល្លារជារៀងរាល់ឆ្នាំ និងស្ទើរគ្រប់ទីកន្លែង ទាំងនៅអាមេរិកខាងត្បូងនៅតំបន់អាហ្វ្រិក និងនៅអាស៊ីអាគ្នេយ៍ផងដែរ។
លោក Benedikt Hofmann តំណាងការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) ប្រចាំតំបន់អាស៊ីអាគ្នេយ៍ និងប៉ាស៊ីហ្វិកបានមានប្រសាសន៍ថា ៖ Cyberscam បានរីករាលដាលដូចជាជំងឺមហារីក។ អាជ្ញាធរតាមប្រទេសនីមួយៗអាចកត់សំគាល់វាបានយ៉ាងងាយស្រួល ប៉ុន្តែលំបាកក្នុងការលុបបំបាត់សកម្មភាពនេះខ្លាំងណាស់។
ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) បានសរសេរថា ការប៉ាន់ប្រមាណមានប្រភពបោកប្រាស់ទ្រង់ទ្រាយធំរាប់រយនៅជុំវិញពិភពលោក ហើយដែលអាចបង្កើតប្រាក់ចំណេញប្រចាំឆ្នាំជាច្រើនរហូតដល់រាប់សិបពាន់លានដុល្លារ។ UNODC បានអំពាវនាវឱ្យប្រទេសនានាធ្វើការរួមគ្នា និងបង្កើនកិច្ចខិតខំប្រឹងប្រែងដើម្បីអាចរំខានដល់ការផ្តល់ហិរញ្ញប្បទានរបស់ក្រុមបទល្មើសទាំងនោះផងដែរ។
ដោយឡែក លោក John Wojcik អ្នកវិភាគប្រចាំតំបន់ជាមួយ UNODC មានប្រសាសន៍ថា ៖ ឧស្សាហកម្មក្លែងបន្លំតាមអនឡាញក្នុងតំបន់ បានវ៉ាដាច់បញ្ហាឧក្រិដ្ឋកម្មឆ្លងដែនផ្សេងទៀត ដោយសារវាងាយស្រួលធ្វើសកម្មភាព និងអាចទាក់ទងជាមួយជនរងគ្រោះដែលជាអតិថិជនរាប់លាននាក់បានងាយៗតាមរយៈបណ្ដាញអ៊ីនធឺណិត ដោយមិនចាំបាច់ផ្លាស់ទី ឬចរាចរទំនិញខុសច្បាប់ដូចជាការឆ្លងកាត់ព្រំដែននោះឡើយ។
គួរឲ្យដឹងដែរថា មិនមែនតែប្រទេសតួចតាច ឬរីកចម្រើននោះទេ សូម្បីតែសហរដ្ឋអាមេរិកក៏បានរាយការណ៍ពីការខាតបង់ទំហំថវិកាច្រើនជាង ៥,៦ ពាន់លានដុល្លារចំពោះការបោកប្រាស់ cryptocurrency កាលពីក្នុងឆ្នាំ២០២៣ ដោយក្នុងនោះមានប្រមាណជាង ៤ពាន់លានដុល្លារនៅក្នុងអ្វីដែលគេហៅថា ការបោកប្រាស់បែប pig-butchering scam ឬការបោកប្រាស់ទំនាក់ទំនងដែលរៀបចំឡើងដើម្បីជំរិតយកប្រាក់ពីមនុស្សចាស់ និងជនងាយរងគ្រោះ។
សម្រាប់នៅតំបន់អាស៊ីវិញ ក្នុងរយៈពេលប៉ុន្មានខែចុងក្រោយនេះ អាជ្ញាធរមកពីប្រទេសចិន ដែលជាកន្លែងមានក្រុមក្មេងទំនើងជាច្រើន និងមានប្រភពមកពីប្រទេសថៃ និងមីយ៉ាន់ម៉ា បានដឹកនាំការបង្រ្កាបលើប្រតិបត្តិការឆបោកនៅក្នុងតំបន់ដែលគ្មានច្បាប់នៃព្រំដែនថៃ-មីយ៉ាន់ម៉ា ដោយប្រទេសថៃបានកាត់ផ្តាច់ការផ្គត់ផ្គង់ថាមពល ប្រេងឥន្ធនៈ និងអ៊ីនធឺណេតដល់តំបន់ដែលមានលំនៅដ្ឋានឆបោកជាច្រើនទីតាំងជាដើម៕
Account
Security
Favourite Content