បរទេស៖ យោងតាមប្រភពព័ត៌មានពី The Guardian បានរាយការណ៍ថា ប្រធានាធិបតីសហរដ្ឋអាម៉េរិក Donald Trump និយាយអំពីការដាក់ពន្ធខ្ពស់លើទំនិញពីប្រទេសចិនអាចនឹងធ្លាក់ចុះ ប៉ុន្តែនឹងមិនធ្លាក់ដល់សូន្យនោះទេ។

ការអធិប្បាយរបស់លោក Trump នៅក្នុងសន្និសីទសារព័ត៌មានរបស់សេតវិមានគឺឆ្លើយតបទៅនឹងលេខាធិការរតនាគារ លោក Scott Bessent ដែលរំពឹងថា សង្គ្រាមពាណិជ្ជកម្មរវាងមហាអំណាចសេដ្ឋកិច្ចធំជាងគេទាំងពីរនឹងថយចុះ ដោយសារពន្ធខ្ពស់មិនមាននិរន្តរភាពនោះទេ។ ទោះជាយ៉ាងណាក្តី ដំណើរការចរចាជាមួយនឹងចិនមានភាពពិបាក ខណៈភាគីទាំងពីរកំពុងមើលឃើញថា ស្ថានភាពបច្ចុប្បន្នមិនទាន់ភាពនឹងនរ។

Trump ជៀសវាងពីការបញ្ជាក់អំពីស្ថានភាពជាមួយនឹងប្រទេសចិនដោយលើកឡើងថា  ៖

«យើងនៅមានភាពល្អធម្មតាជាមួយប្រទេសចិន ហើយយើងនឹងធ្វើការជាមួយគ្នាប្រកបដោយឧត្តមគតិ។ អត្រាពន្ធចុងក្រោយដែលដាក់លើប្រទេសចិនអាចនឹងធ្លាក់ចុះពី ១៤៥%»។

ទន្ទឹមនឹងនេះ រដ្ឋាភិបាល​ចិន​នៅ​មិន​ទាន់​ឆ្លើយ​តប​នឹង​ព័ត៌មាន​នេះ​នៅ​ឡើយ​ទេ ប៉ុន្តែ​បាន​រិះគន់​ជាញឺកញយ​ចំពោះ​ពន្ធ​របស់​ Trump។ ចាប់តាំងពីឡើងកាន់តំណែងជាប្រធានាធិបតីជាលើកទីពីរ Trump ដំឡើងពន្ធឥតឈប់ឈរលើការនាំចូលពីចិន ប៉ុន្តែទីក្រុងប៉េកាំងតែងតែវាយបកមកវិញជាមួយនឹងការដាក់ពន្ធលើការនាំចូលរបស់អាម៉េរិកដូចគ្នា។ ថ្មីៗនេះ ក្រសួងពាណិជ្ជកម្មចិនបានព្រមានថា ប្រទេសចិននឹងចាត់វិធានការតបតវិញក្នុងលក្ខណៈច្បាស់លាស់ ប្រសិនបើប្រទេសណាមួយយល់ព្រមលើកិច្ចព្រមព្រៀងទាំងឡាយណាជាមួយអាមេរិកដែលប៉ះពាល់ដល់ផលប្រយោជន៍ចិន បន្ទាប់ពីមានព័ត៌មានលេចឮថា រដ្ឋបាល Trump កំពុងរៀបចំផែនការដាក់សម្ពាធប្រទេសផ្សេងទៀតពីការធ្វើពាណិជ្ជកម្មជាមួយប្រទេសចិន។

នៅក្នុងខែមេសានេះ Trump បានដាក់ពន្ធនាំចូលរហូតដល់ទៅ ១៤៥% លើទំនិញពីប្រទេសចិន ហើយចិនបានប្រឆាំងមកវិញជាមួយនឹងការដាក់ពន្ធ ១២៥% លើទំនិញរបស់អាម៉េរិក។ មិនត្រឹមតែប៉ុណ្ណោះ ការប្រកាសពន្ធឆ្លើយតបតឲ្យមានភាពស្មើរគ្នារបស់ Trump លើប្រទេសជាច្រើន បង្កឱ្យមានការរង្គោះរង្គើរទីផ្សារភាគហ៊ុន និងការកើនឡើងអត្រាការប្រាក់ ខណៈដែលអ្នកវិនិយោគព្រួយបារម្ភអំពីកំណើនសេដ្ឋកិច្ចយឺត និងសម្ពាធអតិផរណាខ្ពស់។ លើសពីនេះ ភាពមិនច្បាស់លាស់របស់ពន្ធគយនៅក្នុងទីផ្សារហិរញ្ញវត្ថុបានធ្វើឲ្យ Trump អំពាវនាវធនាគារកណ្តាលអាម៉េរិកកាត់បន្ថយអត្រាការប្រាក់គោលរបស់ខ្លួន ប៉ុន្តែត្រូវបានប្រធានធនាគារកណ្តាល Jerome Powell បដិសេធលើសំណើរនេះ៕