ក្រចេះ ៖ តំបន់​សេដ្ឋកិច្ចពិសេស​ យូ ប៊ី អ៊ី ស្នួល  ស្ថិតនៅ​ឃុំ ២ធ្នូ ស្រុក​ស្នួល ខេត្តក្រចេះ បានទាក់ទាញ​ក្រុមហ៊ុនវិនិយោគធំៗ​ ដើម្បីដំណើរការ​ផលិត ​និងនាំចេញទៅទីផ្សារអន្តរជាតិ ខណៈដែលបច្ចុប្បន្ន​​ មានក្រុមហ៊ុនធំៗចំនួន ៥ បាន និងកំពុងមមាញឹកនៅក្នុងសង្វាក់ផលិតកម្មរបស់ខ្លួន និងអាចបង្កើតឱកាសការងារប្រមាណ ២០០០កន្លែង។

នៅដើមសប្ដាហ៍​ទី២ នៃខែវិច្ឆិកា ឆ្នាំ២០២៥នេះ ប្រធានលេខាធិការដ្ឋានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានចុះពិនិត្យពីស្ថានភាពវិនិយោគនៅក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ដែលមានទីតាំងស្ថិតនៅ ឃុំ២ធ្នូ ស្រុកស្នួល ខេត្តក្រចេះ ។

បើតាម​លេខាធិការដ្ឋាន​នៃក្រុមការងារ​ជំរុញ​ការ​វិនិយោគ​ក្នុងភូមិភាគឦសាន បានឱ្យដឹងថា តំបន់សេដ្ឋកិច្ចពិសេស យូ ប៊ី អ៊ី​ ស្នួល​ មានក្រុមហ៊ុនកំពុងដំណើរការចំនួន ៥ ក្នុងនោះរួមមាន ១.ក្រុមហ៊ុន Newbustar (Cambodia) Tire Co.,Ltd. ជាក្រុមហ៊ុន​ផលិតសំបកកង់យានយន្ត, ទី២ ក្រុមហ៊ុន HKZQ Energy and Technology Co.,Ltd. ជាក្រុមហ៊ុន​ផលិតចំហាយទឹក និងខ្យល់ក្តៅ, ទី៣ ក្រុមហ៊ុន Firemax (Cambodia)Tires Co.,Ltd. ជាក្រុមហ៊ុន​ផលិតសំបកកង់យានយន្ត, ទី៤ ក្រុមហ៊ុន Yaokun (Cambodia) Mold Co.,Ltd. ជាក្រុមហ៊ុនផលិតពុម្ពសំបកកង់យានយន្ត និង ទី៥. ក្រុមហ៊ុន Zhongqi Photovoltaic Technology (Cambodia)Co., Ltd. ជាក្រុមហ៊ុន ផ្គុំ និងតម្លើងបន្ទះសូឡា ។

គួរ​បញ្ជាក់ថា​ ទីតាំងតំបន់សេដ្ឋកិច្ចពិសេសនេះ មានចំងាយប្រមាណ ៥គីឡូម៉ែត្រ ពីច្រកអន្តរជាតិត្រពាំងស្រែ ដែលជាច្រកអន្តរជាតិដ៏សំខាន់ក្នុងប្រព័ន្ធដឹកជញ្ជូន និងពាណិជ្ជកម្ម នៅក្នុងតំបន់ភូមិភាគឦសាន ។ ទុនវិនិយោគរបស់ក្រុមហ៊ុនអភិវឌ្ឍន៍តំបន់សេដ្ឋកិច្ចពិសេសនេះមានទំហំប្រមាណ ២០០ លានដុល្លារអាម៉េរិក ហើយគិតមកទល់បច្ចុប្បន្ន ទំហំទុនវិនិយោគដែលបានចូលមកបណ្តាក់ទុននៅតំបន់សេដ្ឋកិច្ចពិសេសនេះ មានទំហំ ៥៩៥,៣ លានដុល្លារអាម៉េរិក និងបានផ្តល់ការងារដល់កម្មករសរុបចំនួន ២០១៤ នាក់ ។

ដោយឡែក ការនាំចេញពីតំបន់សេដ្ឋកិច្ចពិសេសនេះ កាលពីឆ្នាំ២០២៤ មានទំហំ ៧៩,៦ លានដុល្លារអាម៉េរិក ហើយបច្ចុប្បន្ន គិតត្រឹមរយៈពេល ១០ខែ ឆ្នាំ២០២៥ ការនាំចេញបានហក់ឡើងដល់ចំនួនជាង ១០០ លានដុល្លារអាម៉េរិក ដោយមានទីផ្សារនាំចេញសំខាន់ៗដូចជា​ សហរដ្ឋអាម៉េរិក ប្រេស៊ីល ចិន សហភាពអឺរ៉ុប តួកគី ម៉ិកស៊ិក រុស្ស៊ី អាហ្វ្រិកខាងត្បូង ឥណ្ឌា និងឥណ្ឌូនេស៊ី ជាដើម ។

ក្រុមការងារ ជំរុញការវិនិយោគក្នុងភូមិ​ឦសាន​បានជួបពិភាក្សាដោយផ្ទាល់ជាមួយក្រុមហ៊ុនអភិវឌ្ឍតំបន់សេដ្ឋកិច្ចពិសេស ក៏ដូចជាបណ្តាក្រុមហ៊ុនដែលកំពុងវិនិយោគនៅក្នុងតំបន់សេដ្ឋកិច្ចពិសេសនេះ ដើម្បីស្វែងយល់ពីស្ថានភាពទូទៅនៃការវិនិយោគ និងបញ្ហាប្រឈម ដែលក្រុមហ៊ុនកំពុងជួបប្រទះ ព្រមទាំងសំណើនានាដែលក្រុមហ៊ុនចង់ឱ្យ ក.វ.ឦសាន ជួយស្វែងរកដំណោះស្រាយ ។ ក្រុមហ៊ុនទាំងនេះ បានយល់ដឹងពីវត្តមាន និងអត្ថប្រយោជន៍ពិសេសដែលវិនិយោគិនអាចទទួលបានទាក់ទងនឹងការលើកទឹកចិត្ត និងការសម្រួលនីតិវិធីនានា ក្រោមវិសាលភាពនៃកម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាន (២០២៥-២០២៨) ជាពិសេស គឺលទ្ធភាពនៃការផ្តល់នូវដំណោះស្រាយជាកញ្ចប់ តាមរយៈយន្តការ «ច្រកចេញចូលតែមួយ» ។

តំណាងក្រុមហ៊ុនអភិវឌ្ឍន៍តំបន់សេដ្ឋកិច្ចពិសេស បានបង្ហាញឆន្ទៈក្នុងការខិតខំជំរុញកិច្ចអភិវឌ្ឍ ដើម្បីឱ្យតំបន់សេដ្ឋកិច្ចពិសេសនេះ ក្លាយទៅជាបណ្តុំឧស្សាហកម្ម (industrial cluster) ជាពិសេសរោងចក្រកែច្នៃជ័រកៅស៊ូ ដែលនឹងប្រើប្រាស់វត្ថុធាតុដើមក្នុងស្រុក ផ្គត់ផ្គង់ដល់ខ្សែច្រវាក់ផលិតកម្ម ។ ក្រុមហ៊ុនក៏នឹងព្យាយាមបន្តផ្សព្វផ្សាយពីសក្តានុពលវិនិយោគរបស់កម្ពុជា និងខិតខំទាក់ទាញឧស្សាហកម្មយានយន្តឱ្យមកវិនិយោគនៅក្នុងតំបន់សេដ្ឋកិច្ចពិសេសនេះផងដែរ ។

ឯកឧត្តម​ ស៊ឹម វីរៈ អនុរដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានលេខាធិការដ្ឋានក្រុម​ការងារ​ជំរុញការ​វិនិយោគក្នុងភូមិភាគឦសាន បានលើកឡើងថាថា ការចុះពិនិត្យស្ថានភាពវិនិយោគនៅទីតាំងវិនិយោគផ្ទាល់ គឺជាសកម្មភាពដ៏សំខាន់មួយរបស់ក្រុមការងារ​ជំរុញការ​វិនិយោគក្នុងភូមិភាគ​ឦសាន លើទិដ្ឋភាពថែទាំវិនិយោគ ដើម្បីផ្តល់ភាពកក់ក្តៅដល់វិនិយោគិន ដែលមានស្រាប់ ប្រយោជន៍ដើម្បីលើកទឹកចិត្តវិនិយោគិនឱ្យបន្ត ឬពង្រីកបន្ថែមគម្រោងវិនិយោគរបស់ខ្លួន, ជំរុញវិនិយោគិនបង្កើនតម្លៃបន្ថែមនៃខ្សែច្រវាក់ផលិតកម្មរបស់ខ្លួន ឆ្ពោះទៅរកឧស្សាហកម្មកែច្នៃ ដោយប្រើប្រាស់វត្ថុធាតុដើមក្នុងស្រុក, លើកទឹកចិត្តឱ្យមានការបណ្តុះបណ្តាល និងផ្ទេរជំនាញដល់កម្មករខ្មែរ ក៏ដូចជាផ្សព្វផ្សាយបន្តនូវសក្តានុពល និងកាលានុវត្តភាពវិនិយោគនៃតំបន់ភូមិភាគឦសាន ៕