ភ្នំពេញ៖ ស្រុកជុំគីរី ខេត្តកំពត និងក្រុងច្បារមន ខេត្តកំពង់ស្ពឺ បានទាក់ទាញគម្រោងវិនិយោគបង្កើតតំបន់សេដ្ឋកិច្ចពិសេសចំនួន២បន្ថែមទៀត មានទុនវិនិយោគសរុបប្រមាណ ១៩៥លានដុល្លារអាម៉េរិក និងអាចបង្កើតការងារជាច្រើនកន្លែង ក៏ដូចជាទាក់ទាញគម្រោងវិនិយោគផ្សេងៗផងដែរ។

កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញ-ចូលតែមួយ ដើម្បីពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេសចំនួន ២ នេះ ដោយមានការអញ្ជើញចូលរួមពីសំណាក់មន្ត្រីតំណាងក្រសួង-ស្ថាប័ន និងរដ្ឋបាលខេត្តពាក់ព័ន្ធ។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានឱ្យដឹងថា ៖ គម្រោងវិនិយោគបង្កើតតំបន់សេដ្ឋកិច្ចពិសេសទាំងនេះ មានទុនវិនិយោគសរុបប្រមាណ ១៩៥ លានដុល្លារអាម៉េរិក ដែលនឹងក្លាយជាកម្លាំងចលករយ៉ាងសំខាន់ក្នុងការស្រូបយកគម្រោងវិនិយោគមកបណ្តាក់ទុន ព្រមទាំងអាចបង្កើតការងារលើកកម្ពស់ជីវភាពរស់នៅរបស់ប្រជាពលរដ្ឋ, បង្កើនផលិតផលក្នុងស្រុក, បង្កើនការនាំចេញទៅកាន់ទីផ្សារអន្តរជាតិ ជាពិសេស ចូលរួមចំណែកជំរុញកំណើនសេដ្ឋកិច្ចជាតិ។

ឯកឧត្តមបានបន្ថែមថា៖

«គម្រោងតំបន់សេដ្ឋកិច្ចពិសេស គឺជាកម្លាំងចលករ និងជាដែកឆក់ដ៏មានប្រសិទ្ធភាពក្នុងការស្រូបយក​គម្រោង​វិនិយោគ​លើ​ឧស្សាហកម្មថ្មីៗ»។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី និង​ជា​អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC)បានថ្លែងនាពេលកន្លងមកថា ​ ៖​តំបន់សេដ្ឋកិច្ចពិសេសមិន​ត្រឹម​តែ​ចូល​រួម​ចំណែក​ក្នុង​ការ​ទាក់​ទាញ​វិនិយោគិនជាតិ និង​អន្តរជាតិឱ្យ​បើក​រោងចក្រ​/សហគ្រាស ​នៅ​ក្នុង​ប្រទេស​កម្ពុជា និង​ជួយ​លើក​កម្ពស់​សមត្ថភាព​នាំ​ចេញ​ទំនិញ​ទៅ​ទីផ្សារ​អន្តរជាតិ​ប៉ុណ្ណោះ​ទេ ប៉ុន្តែ​ក៏​ជួយ​បំពេញ​​តម្រូវ​ការ​ប្រើ​ប្រាស់​ក្នុង​ស្រុកផងដែរ។​

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា៖ នៅពេលបង្កើតតំបន់សេដ្ឋកិច្ចពិសេសបានកាន់តែច្រើន សេដ្ឋកិច្ចជាតិក៏នឹងរីកចម្រើនកាន់តែខ្លាំងដូចគ្នា។ វានឹងធ្វើឱ្យមានកំណើនជីវភាពប្រជាពលរដ្ឋនៅតំបន់ជុំវិញនោះកាន់តែធូរធារ ដោយសារមានការងារធ្វើច្រើន អាចរកចំណូលបានច្រើន សេដ្ឋកិច្ចមានដំណើរការ។

យោងរបាយការណ៍៍លទ្ធផល​ការងារ​ឆ្នាំ២០២៤ និង​ទិសដៅ​ការងារ​ឆ្នាំ២០២៥ របស់​ក្រសួង​ឧស្សាហកម្ម វិទ្យាសាស្រ្ត បច្ចេក​វិទ្យា និង​នវានុវត្តន៍ បាន​​ឱ្យ​ដឹង​ថា គិត​ត្រឹម​ចុង​​ឆ្នាំ២០២៤ នៅ​កម្ពុជា​មាន​តំបន់​សេដ្ឋកិច្ច​ពិសេ​ស​សរុប​ចំនួន ៣០ ដែល​មាន​រោងចក្រ​ កំពុង​ដំណើរការ។ ចំនួន​នេះ​គឺ​​កើន​ឡើងចំនួន ៤ ឬ​ស្មើនឹង ១៥,៣៨​ភាគរយ​បើ​ធៀប​នឹង​ឆ្នាំ២០២៣​។​ តំបន់​សេដ្ឋកិច្ច​ពិសេស​ទាំង ៣០ ​គឺ​មាន​ទីតាំង​​​នៅ​​ ១២ រាជធានី-ខេត្ត ដោយ​ ៩ ស្ថិត​ក្នុង​ខេត្ត​ស្វាយរៀង, ៥ ក្នុង​​ខេត្ត​ព្រះសីហនុ, ៣ ​ក្នុង​ខេត្ត​បន្ទាយមានជ័យ កោះកុង និង​កណ្តាល, និង​ចំនួន ១ ​នៅក្នុង​រាជធានី​​ភ្នំពេញ ខេត្ត​ពោធិ៍សាត់ ក្រចេះ កំពត កំពង់​ស្ពឺ កំពង់ឆ្នាំង និង ​ខេត្តកំពង់ចាម។

សូមរំលឹកដែរថា ចំនួន​តំបន់​សេដ្ឋកិច្ច​ពិសេស​ដែល​មាន​ប្រតិបត្តិការគឺ​​កើន​ឡើង ខណៈដែលក្នុង​ឆ្នាំ២០២០ មានត្រឹមតែចំនួន២១, ឆ្នាំ២០២១ មានចំនួន​ ២៣, ឆ្នាំ២០២២ មាន២៥ ,ឆ្នាំ២០២៣​ មានចំនួន២៦ និង២០២៤ មានចំនួន ៣០៕