សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តាកែវ៖ តាកែវ ដែលជាខេត្តមួយមានសក្តានុពលសេដ្ឋកិច្ច បាន និងកំពុងទាក់ទាញចំណាប់អារម្មណ៍យ៉ាងខ្លាំងពីសំណាក់វិនិយោគិនជាតិ និងអន្តរជាតិ ហើយក៏បានត្រៀមខ្លួនរួចជាស្រេចដើម្បីស្វាគមន៍គម្រោងវិនិយោគចម្រុះវិស័យ ជាពិសេស ការត្រៀមទីតាំងសម្រាប់បង្កើតតំបន់សេដ្ឋកិច្ចពិសេស ក្រោមទុនវិនិយោគសរុបប្រមាណ ១ពាន់លានដុល្លារអាម៉េរិក។
នៅថ្ងៃដើមសប្ដាហ៍នេះ ក្រុមហ៊ុនធំៗចំនួន ៣៥ មកពីខេត្តជើជាំង( Zhejiang) ប្រទេសចិន មានបំណងនាំយកទុនវិនិយោគសរុបប្រមាណ ១ ០០០លានដុល្លារអាមេរិក មកបណ្តាក់ទុននៅក្នុងខេត្តតាកែវ ក្រោមរូបភាពបង្កើតរោងចក្រ សហគ្រាសកែច្នៃ និងផលិតក្នុងវិស័យឧស្សាហកម្ម ជាពិសេស គម្រោងបង្កើតតំបន់សេដ្ឋកិច្ចពិសេសដ៏ធំសម្បើមមួយ ខណៈដែលរដ្ឋបាលខេត្តបានត្រៀមខ្លួនរួចជាស្រេចសម្រាប់ទទួលការវិនិយោគទាំងនេះ។
ឯកឧត្តម វុី សំណាង អភិបាលខេត្តកាកែវ បានមានប្រសាសន៍ប្រាប់ AMS ថា ៖ ខាងក្រុមហ៊ុនចិន បានមកសិក្សា និងស្វែងយល់ពីឱកាសវិនិយោគ សក្តានុពលរបស់ខេត្តតាកែវ ដោយក្រុមហ៊ុនគ្រោងបង្កើតរោងចក្រ និងសហគ្រាសក្នុងវិស័យសំខាន់ៗជាច្រើន រួមមាន វិស័យកសិកម្ម និងកសិ-ឧស្សាហកម្ម បច្ចេកវិទ្យា ការផលិតគ្រឿងបន្លាស់អេឡិចត្រូនិក និងការផលិតសម្ភារៈឧបករណ៍អគ្គិសនីជាច្រើនប្រភេទ។
ឯកឧត្តមបានបញ្ជាក់ថា៖
« ក្រុមហ៊ុនចិនទាំង ៣៥ ហ្នឹង ចង់បង្កើតតំបន់សេដ្ឋកិច្ចពិសេសនៅក្នុងខេត្តយើង ហើយគ្រោងវិនិយោគទុនតម្លៃសរុបប្រមាណ ១ ពាន់លានដុល្លារអាម៉េរិក។ ខាងខេត្តយើងគាំទ្រចំពោះគម្រោងវិនិយោគនេះ និងបានត្រៀមខ្លួនរួចជាស្រេចក្នុងការសម្របសម្រួល ដើម្បីផ្តល់ភាពងាយស្រួល និងផ្តល់លក្ខខណ្ឌគ្រប់បែបយ៉ាងជូនដល់វិនិយោគិនទាំងអស់ ស្របតាមច្បាប់វិនិយោគរបស់កម្ពុជា។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ៖ ការបង្កើតតំបន់សេដ្ឋកិច្ចពិសេសបានកាន់តែច្រើន សេដ្ឋកិច្ចជាតិក៏នឹងរីកចម្រើនកាន់តែខ្លាំងដូចគ្នា។ វានឹងធ្វើឱ្យជីវភាពប្រជាពលរដ្ឋនៅជុំវិញនោះកាន់តែធូរធា ដោយសារមានការងារធ្វើច្រើន ហើយសេដ្ឋកិច្ចក៏មានដំណើរការ។
អ្នកឧកញ៉ាបញ្ជាក់ថា ៖
«មុនពេលគេសម្រេចចិត្តបណ្តាក់ទុននៅកន្លែងណាមួយ គឺគេសិក្សាយ៉ាងច្បាស់លាស់ ព្រោះគេមិនអាចយកលុយមកចាក់ចោលនោះទេ ហើយចំពោះគម្រោងបង្កើតតំបន់សេដ្ឋកិច្ចក៏កាន់តែលម្អិត ព្រោះគ្រប់តំបន់សេដ្ឋកិច្ចពិសេសទាំងអស់ ភាគច្រើនគឺជាតំបន់យុទ្ធសាស្ត្រ និងមានភូមិសាស្ត្រល្អ»។
សូមបញ្ជាក់ថា៖ ការចាប់អារម្មណ៍ពីសំណាក់វិនិយោគិនមកពីខេត្ត Zhejiang ដែលជាមជ្ឈមណ្ឌលសេដ្ឋកិច្ច និងបច្ចេកវិទ្យាឈានមុខមួយរបស់ចិន គឺស្របពេលដែលខេត្តតាកែវកំពុងពង្រឹងតួនាទីរបស់ខ្លួនក្នុងនាមជា «មជ្ឈមណ្ឌលសេដ្ឋកិច្ចថ្មី» ជាមួយនឹងសក្តានុពលភូមិសាស្ត្រ ដែលអំណោយផលដល់ការដឹកជញ្ជូន និងការភ្ជាប់ទំនាក់ទំនងពាណិជ្ជកម្ម ខណៈដែលបណ្តាញហេដ្ឋារចនាសម្ព័ន្ធនានាត្រូវបានអភិវឌ្ឍ និងលើកម្ពស់គុណភាពរួចរាល់៕
Account
Security
Favourite Content