សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងលើការវាយតម្លៃនៃក្របខ័ណ្ឌហិរញ្ញវត្ថុសាធារណៈ រយៈពេលមធ្យមរបស់រាជរដ្ឋាភិបាល ចំពោះសេដ្ឋកិច្ចកម្ពុជានៅឆ្នាំ២០២៥ ត្រូវបានព្យាករថា ស្ថិតក្នុងអត្រាកំណើន ៦,៣% ដែលធ្វើឱ្យ ផ.ស.ស. ថិតក្នុងរង្វង់ ២០៩ ១៦៣ពាន់លានរៀល សមមូលនឹងប្រមាណ ៥១ ៣៩៨លានដុល្លារអាមេរិក ខណៈដែល ផ.ស.ស. សម្រាប់មនុស្សម្នាក់ត្រូវបានរំពឹងថា នឹងកើនដល់ ២ ៩២៤ដុល្លារអាមេរិក។
អ្នកជំនាញសេដ្ឋកិច្ច មានសុទិដ្ឋិនិយមចំពោះការកើនឡើងនៃហិរញ្ញវត្ថុសាធារណៈសម្រាប់ឆ្នាំ២០២៥ ដោយបង្ហាញថា សេដ្ឋកិច្ចដ៏រឹងមាំរបស់កម្ពុជានៅតែមានសមត្ថភាពក្នុងការគាំទ្រដល់ស្ថាប័នរដ្ឋ និងបំពេញតម្រូវការរបស់ប្រជាពលរដ្ឋ ។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានថ្លែងថា កំណើននៃផលិតផលក្នុងស្រុក ជាកត្តាដែលរុញច្រានដល់ចំណូលរបស់ពលរដ្ឋកម្ពុជាមានការហក់ឡើង។
បណ្ឌិត ហុង វណ្ណៈ បានប្រាប់ AMS យ៉ាងដូច្នេះថា ៖
«យើងបានឃើញអំពីផែនការហិរញ្ញវត្ថុសម្រាប់ការចំណាយឆ្នាំ២០២៥ ដែលអាចនិយាយបានថា រាជរដ្ឋាភិបាលកម្ពុជាមើលឃើញអំពីតម្រូវការខ្ពស់នៅក្នុងវិស័យវិនិយោគសាធារណៈ និងសេវាសង្គមកិច្ច ដែលជាតម្រូវការចាំបាច់សម្រាប់ប្រជាពលរដ្ឋ និងសង្គមកម្ពុជាយើង ហើយអ្វីទាំងអស់នោះ គឺផ្អែកទៅតាមកំណើននៃសេដ្ឋកិច្ចជាតិ។ ជារួម រដ្ឋាភិបាល មិនអាចលើកថវិកាឱ្យកើនសម្រាប់ចំណាយ ខណៈដែលសេដ្ឋកិច្ចជាតិមិនមានកំណើននោះទេ។ បើគិតជាសាមញ្ញរវាងចំណូល និងចំណាយ ទាល់តែមានចំណូលសមស្រប ទើបយើងលើកផែនការចំណាយពីមួយឆ្នាំទៅមួយឆ្នាំសមស្របទៅនឹងចំណូលដែរ»។
យោងតាមច្បាប់ហិរញ្ញវត្ថុ ផលិតផលក្នុងស្រុកសរុប (ផ.ស.ស.) សម្រាប់មនុស្សម្នាក់ៗ បានកើនឡើងពី ២ ៣៨៣ ដុល្លារអាមេរិកកាលពីឆ្នាំ២០២២ ដល់ប្រមាណ ២ ៥២០ដុល្លារអាមេរិក ក្នុងឆ្នាំ២០២៣ ខណៈអតិផរណាប្រចាំឆ្នាំស្ថិតក្នុងរង្វង់២,១%។
Account
Security
Favourite Content