សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តម្លៃប្រេងបានបន្តឡើងជិត ២ ភាគរយក្នុងមួយបារ៉ែលបន្ទាប់ពីមានដំណឹងថា អ៊ីរ៉ង់កំពុងរៀបចំការវាយប្រហារសងសឹកលើអ៊ីស្រាអែលក្នុងរយៈពេលប៉ុន្មានថ្ងៃខាងមុខនេះ ដែលជំរុញឲ្យបញ្ហាភូមិសាស្ត្រនយោបាយនៅមជ្ឈិមបូព៌ាកាន់តែតានតឹង។
ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ១,៨ ភាគរយ ឬ ៧៤,១២ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ១,៩ ភាគរយ ឬ ៧០,៦១ ដុល្លារក្នុងមួយបារ៉ែល។ តម្លៃប្រេងបានឡើងថ្លៃបន្ទាប់ពីដំណឺងថា អ៊ីរ៉ង់កំពុងរៀបចំវាយប្រហារអ៊ីស្រាអែលដោយចាប់ផ្តើមពីទឹកដីអ៊ីរ៉ាក់នៅប៉ុន្មានថ្ងៃខាងមុខ ប្រហែលជាមុនការបោះឆ្នោតប្រធានាធិបតីអាមេរិកនៅថ្ងៃទី ៥ ខែវិច្ឆិកា។ ការវាយប្រហារនេះត្រូវបានរំពឹងថានឹងចាប់ផ្តើមពីប្រទេសអ៊ីរ៉ាក់ ដោយប្រើយន្តហោះគ្មានមនុស្សបើក និងមីស៊ីលផ្លោង ជាការឆ្លើយតបទៅនឹងការវាយប្រហាររបស់អ៊ីស្រាអែលមកលើខេត្តចំនួន ៣ របស់អ៊ីរ៉ង់។ មិនត្រឹមតែប៉ុណ្ណោះ ការឡើងថ្លៃតម្លៃប្រេងក៏ត្រូវបានគេព្យាករណ៍ថា ការពន្យារពេលកាត់បន្ថយផលិតកម្មប្រេងរបស់ OPEC + អាចនឹងលើសពីខែធ្នូ ឬយូរជាងនេះ ដោយសារការព្រួយបារម្ភអំពីតម្រូវការប្រេងចុះខ្សោយ និងការកើនឡើងការផ្គត់ផ្គង់។
លើសពីនេះ ពាណិជ្ជករកំពុងរង់ចាំមើលលទ្ធផលនៃការបោះឆ្នោតប្រធានាធិបតីសហរដ្ឋអាមេរិកនៅប៉ុន្មានថ្ងៃខាងមុខនេះ ដោយសារចង់ឃើញថា តើជ័យជម្នះរបស់លោក Donald Trump ឬ លោកស្រី Kamala Harris នឹងមានឥទ្ធិពលយ៉ាងណាសម្រាប់ទីផ្សារប្រេង។
លោក Andrew Lipow ប្រធានក្រុមហ៊ុន Lipow Oil Associates បានលើកឡើងថា ទីផ្សារកំពុងព្យាយាមរង់ចាំមើលថារដ្ឋបាល Harris ឬ Trump ដែលអាចមានឥទ្ធិពលយ៉ាងណាលើការផលិតប្រេង ការដាក់ទណ្ឌកម្ម និងតម្លៃ។ ទន្ទឹមនឹងនេះ រដ្ឋបាលព័ត៌មានថាមពល (EIA) បង្ហាញថា ស្តុកប្រេងសាំង និងស្តុកប្រេងឆៅសហរដ្ឋអាមេរិកបានធ្លាក់ចុះច្រើនជាងការរំពឹងទុក ខណៈដែលការនាំចូលក៏ធ្លាក់ចុះផងដែរ។ សម្រាប់នៅខាងប្រទេសចិនដែលជាអ្នកនាំចូលប្រេងដ៏ធំបំផុតរបស់ពិភពលោកវិញ សកម្មភាពផលិតកម្មបានពង្រីកនៅក្នុងខែតុលាជាលើកដំបូងក្នុងរយៈពេលប្រាំមួយខែ ដែលបង្ហាញថាវិធានការជំរុញកំពុងមានប្រសិទ្ធភាព។
អ្នកវិភាគយល់ឃើញថា ព្រឹត្តិការណ៍អន្តរជាតិជាច្រើនកើតឡើងជាបន្តបន្ទាប់រួមមាន ការបោះឆ្នោតនៅសហរដ្ឋអាមេរិក ទស្សនវិស័យតម្រូវការរបស់ចិននៅមានភាពខ្សោយ ភាពមិនប្រាកដប្រជានៃផែនការ OPEC+ និងសង្រ្គាមនៅមជ្ឈិមបូព៌ា កំពុងបងា្ហញថាទីផ្សារប្រេងអាចនឹងមានភាពមិនច្បាស់លាស់ដើមខែវិច្ឆិកានេះ៕
Account
Security
Favourite Content