សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ទីក្រុងហុងកុង ត្រូវបានគេស្គាល់ថាជាទីក្រុងចុងក្រោយគេបំផុតរបស់ពិភពលោកដែលនៅតែបន្តប្រើប្រាស់ស៊ុមសំណង់ និងរន្ទាដែលធ្វើឡើងពីដើមឫស្សី ក្នុងការសាងសង់សំណង់ ឬអគារផ្សេងៗ។យ៉ាងណាក្តី នៅទីបំផុត អជ្ញាធរក្រុងហុងកុងបានប្រកាសជាផ្លូវការហើយថា ក្នុងពេលឆាប់ៗខាងមុខនេះ សំណង់អគារខ្ពស់ៗដែលកំពុងដំណើរការសាងសង់នឹងលែងមានការប្រើប្រាស់រន្ទា និងស៊ុមបុរាណនេះតទៅទៀតហើយ ដោយជំនួសមកវិញជាមួយនឹងការប្រើប្រាស់ស៊ុម និងរន្ទាដែលធ្វើពីដែកទីបទាំងអស់។
រន្ទា និងស៊ុមធ្វើពីឫស្សី ជាទូទៅមានចំណុចពិសេសត្រង់ថាវាមានទំងន់ស្រាល និងមានការផ្គត់ផ្គង់មិនងាយខ្វះខាតចេញពីភាគខាងត្បូងនៃប្រទេសចិន ព្រមទាំងងាយស្រួលដឹកជញ្ជូន ងាយតម្លើង ហើយកាន់តែពិសេសនោះគឺវាអាចបោះបង់ចោល និងដុតបំផ្លាញបានយ៉ាងឆាប់រហ័សមិនចាំបាច់ចំណាយច្រើន។ ប៉ុន្តែ បើយោងតាមការប្រកាសដោយការិយាល័យទទួលបន្ទុកកិច្ចការងារអភិវឌ្ឍរបស់ទីក្រុងកាលពីថ្ងៃចន្ទសប្តាហ៍នេះបានបញ្ជាក់ថា បញ្ហាសុវត្ថិភាពគឺជាកត្តាចម្បងក្នុងការសម្រេចចនេះ។ សេចក្តីប្រកាសបានសរសេរបញ្ជាក់បែបនេះថា៖ ហុងកុងនឹងធ្វើការផ្លាស់ប្តូរសកម្មភាពសំណង់ជាមួយនឹងការប្រើប្រាស់វត្ថុធាតុដើមពីដែកឲ្យបានកាន់តែច្រើនឡើងវិញដើម្បីធានាឲ្យបាននូវគោលការណ៍សុវត្ថិភាពតាមការដ្ឋាននានា។
ប្រភពដដែលសរសេរទៀតថា៖ រន្ទា និងស៊ុម ធ្វើពីឫស្សី មិនមានភាពរឹងម៉ាំនោះទេ ជាពិសេសនៅតាមគម្រោងសាងសង់អគារខ្ពស់ៗដែលតែងតែធ្វើឲ្យប្រព័ន្ធសុវត្ថិភាពស្ថិតនៅក្នុងកម្រិតទាប និងប្រឈមមុខនឹងគ្រោះថ្នាក់ខ្លាំង ជាក់ស្តែងតាមតួលេខកាលពីឆ្នាំ២០១៨ ករណីគ្រោះថ្នាក់ដោយសាររន្ទាធ្វើពីឫស្សីបានសម្លាប់មនុស្សដល់ទៅ២៣នាក់។
តាមផែនការនៃការផ្លាស់ប្តូរនេះ អជ្ញាធរជឿជាក់ថា រន្ទា និងស៊ុមធ្វើពីដែកទីបនឹងអាចជំនួសការងារសំណង់ស្ទើរតែពាក់កណ្តាលនៃគម្រោងដែលរដ្ឋបានដេញថ្លៃរួចរាល់ចាប់ពីពេលជូនដំណឹងនេះតទៅ ខណៈដែលកន្លងមកការប្រើប្រាស់វត្ថុធាតុដើមពីឬស្សីនេះមានទំហំដល់ទៅ៨០ភាគរយនៅទូទាំងទីក្រុង។
គួរឲ្យដឹងដែរថា សមាគមនៃក្រុមជនរងគ្រោះដោយសារឧស្សាហកម្មសំណង់របស់ទីក្រុងហុងកុងបានសំដែងការស្វាគមន៍យ៉ាងខ្លាំងចំពោះចំណាត់ការថ្មីនេះ ពីព្រោះថា គ្រោះថ្នាក់ដែលកើតចេញពីការប្រើប្រាស់ឫស្សីមានច្រើនករណីណាស់ ដូចជាការបាក់ធ្លាក់ ការដួលរលំស៊ុមសំណង់ និងឈានទៅដល់ហេតុការណ៍អគ្គិសភ័យជាដើមផងដែរ៕
Account
Security
Favourite Content