បរទេស៖ យោងតាមប្រភពពី Weforum បានលើកឡើងថា រដ្ឋាភិបាលជប៉ុនកំពុងផ្តល់ប្រាក់រង្វាន់ដល់គ្រួសារនីមួយៗរហូតដល់ ៧ ៧០០ ដុល្លារសម្រាប់កុមារម្នាក់នៅក្នុងបន្ទុក ដើម្បីឲ្យពួកគេផ្លាស់ប្តូរទីលំនៅចេញពីតំបន់ទីប្រជុំជននៅ​ក្នុងទីក្រុងតូក្យូ និងជួយអភិវឌ្ឍន៍តំបន់ជនបទ និងក្រុងតូចៗឡើងវិញ។

វិធានការណ៍នេះ គឺជាដំណោះស្រាយមួយក្នុងការរៀបចំទីក្រុងតូក្យូឡើងវិញរបស់ជប៉ុន​ដែលជាទីក្រុងធំបំផុតមួយក្នុងចំណោមទីក្រុងផ្សេងៗទៀតរបស់ពិភពលោកផងដែរ។ ជាច្រើនទស្សវត្សរ៍កន្លងមកនេះ ការធ្វើចំណាកស្រុករបស់ប្រជាពលរដ្ឋជប៉ុនបានធ្វើឱ្យតំបន់ជនបទមានភាពស្ងប់ស្ងាត់ ដោយសារប្រជាជនក្មេងៗទាំងនោះនាំគ្នាសម្រុកមកកាន់ទីក្រុងធំៗ។ ប្រជាជនទាំងនោះរស់នៅក្នុងតំបន់ស្នូលទាំង ២៣ របស់ទីក្រុងតូក្យូ និងតំបន់ជិតខាង មានដូចជា Saitama, Chiba និង Kanagawa ហើយទីក្រុងតូក្យូមានចំនួនប្រជាជនសរុបច្រើនលើសលប់ជាង ៣៥ លាននាក់។ វាគឺជាបញ្ហាដ៏ធំមួយដែលជប៉ុនកំពុងប្រឈមក្នុងការរក្សាលំនឹងនៃចំនួនប្រជាជនក្នុងប្រទេសពីការប្រមូលផ្តុំដ៏ច្រើនលើសលប់នៅក្នុងទីក្រុងតូក្យូ ហើយប្រជាជនជប៉ុនប្រហែល ៩២ ភាគរយរស់នៅក្នុងទីក្រុងកាលពីឆ្នាំ២០២១ កន្លងទៅនេះ។ ដូច្នោះហើយ រដ្ឋាភិបាលជប៉ុនចាំបាច់ត្រូវ​​គ្រប់​គ្រង​លំហូរ​ប្រជាជន​ចូល​ក្នុងទីក្រុង ដើម្បី​ពង្រឹង​សេដ្ឋកិច្ច​ និង​ប្រជាជន​ក្នុង​តំបន់ទាំងនោះ​ឡើង​វិញ។

រដ្ឋាភិបាលរបស់នាយករដ្ឋមន្ត្រី Fumio Kishida ក៏បានលើកឡើងពីការព្រួយបារម្ភនេះដែរថា មនុស្សកាន់តែច្រើនបានចំណាកស្រុកមកកាន់ទីក្រុងតូក្យូ សូម្បីតែក្នុងអំឡុងពេលមានការរាតត្បាតកូវីដ-១៩ ក៏ដោយ។ ជាការឆ្លើយតបទៅនឹងបញ្ហានេះ រដ្ឋាភិបាលជប៉ុនបានបង្កើតការលើកទឹកចិត្តផ្សេងៗ ដើម្បីលើកទឹកចិត្តប្រជាពលរដ្ឋឱ្យផ្លាស់ប្តូរទៅកាន់តំបន់ជនបទ។ មិនត្រឹមតែប៉ុណ្ណោះ ជប៉ុនធ្លាប់ផ្តល់ជាប្រាក់រង្វាន់ដល់អ្នកផ្លាស់ប្តូរទីលំនៅចំនួន ២ ៣០០ ដុល្លារសម្រាប់ក្មេងម្នាក់ក្នុងមួយគ្រួសារ។ ​កាលពី​ខែ​មេសាកន្លងទៅនេះ ជប៉ុនបានអនុម័តនូវ​ច្បាប់​ថ្មីមួយ​នេះដោយបានដំឡើងប្រាក់រង្វាន់ដល់ទៅបីដង ឬ ៧ ៧០០ ដុល្លារសម្រាប់ក្មេងម្នាក់ក្នុងមួយគ្រួសារ ប្រសិនបើពួកគេផ្លាស់ទីចេញពីតំបន់ទីប្រជុំជនទាំងនោះ ហើយសមាជិកគ្រួសារម្នាក់ចាំបាច់ត្រូវចាប់ផ្តើមអាជីវកម្មថ្មី ឬធ្វើការងារនៅក្នុងក្រុមហ៊ុនណាមួយ។ ប្រសិនបើគ្រួសារណាមានកូន ៤ នាក់ ពួកគេនឹងទទួលបានប្រាក់រង្វាន់សរុបទៅដល់ ៣៧ ៩០០ ដុល្លារក្នុងមួយឆ្នាំ។ គ្រួសារទាំងនោះមានត្រូវរស់នៅក្នុងតំបន់ថ្មីរបស់ពួកគេរយៈពេលប្រាំឆ្នាំ ប៉ុន្តែត្រូវប្រគល់ប្រាក់មកវិញប្រសិនបើពួកគេចាកចេញពីតំបន់នោះ ហើយតំបន់ជាង ១ ៣០០ បានចុះហត្ថលេខាលើគម្រោងនេះ។

យ៉ាងណាមិញ ទីក្រុងតូក្យូសង្ឃឹមថា ប្រជាពលរដ្ឋជាងមួយ​ម៉ឺននឹងផ្លាស់ប្តូរចេញពីទីក្រុងត្រឹមឆ្នាំ២០២៧។​ ក្រៅពីជប៉ុនដែលផ្តល់ប្រាក់រង្វាន់ដល់ប្រជាពលរដ្ឋដើម្បីរៀបចំទីក្រុងឡើងវិញនោះ ប្រទេសស្វីសហ៊ានចំណាយដល់ ២៥ ៤០០ ដុល្លារក្នុងមនុស្សធំម្នាក់ក្នុងការផ្លាស់ប្តូរ​ទៅ​តំបន់ជនបទ ខណៈដែលអ៊ីតាលីកំពុងផ្តល់ជំនួយរហូតដល់ ៤៦ ០០០ ដុល្លារ ដើម្បីទាក់ទាញអ្នករស់នៅថ្មីៗដែលមានអាយុ ១៨-៤០ ឆ្នាំ៕