សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ កសិករចំនួន៤គ្រួសារ នៅក្នុងភូមិមួយនៃខេត្តសៀមរាប បានរួមគ្នាប្រើប្រាស់ដីទំនេរទំហំជាង៤អា ឬជាង៤០០០ម៉ែត្រការ៉េ ដើម្បីដាំបន្លែចម្រុះ ឆ្លាស់គ្នាផ្គត់ផ្គង់នៅលើទីផ្សារក្នុងតំបន់ ដោយអាចរកចំណូលបានសមរម្យសម្រាប់ផ្គត់ផ្គង់ជីវភាពគ្រួសាររស់នៅយ៉ាងមានសេចក្ដីសុខ ។
អ្នកស្រី ឆុន សាមុន កសិកររស់នៅភូមិតាត្រាវ ឃុំកន្ត្រាំង ស្រុកប្រាសាទបាគង ខេត្តសៀមរាបបានប្រាប់ឱ្យដឹងថា អ្នកស្រី និងអ្នកភូមិចំនួន៣គ្រួសារទៀត ដែលមានដីនៅជាប់គ្នា បានយកដីនោះ ដាំបន្លែចម្រុះ ដូចជា ខាត់ណាផ្កា ប្រូខូលី ខ្ទឹមស្លឹក និងបន្លែផ្សេងទៀត ផ្គត់ផ្គង់លើទីផ្សារ ក្រោមការជួយបង្ហាញពីបច្ចេកទេសដាំដុះ និងគ្រាប់ពូជមួយចំនួនពីអង្គការក្នុងស្រុកមួយ ដែលអាចរកចំណូលបានយ៉ាងគួរសមសម្រាប់ផ្គត់ផ្គង់គ្រួសារ និងរួមចំណែកដល់ការកាត់បន្ថយការនាំចូលបន្លែទាំងពីប្រទេសជិតខាងផងដែរ ។
អ្នកស្រីបន្តថា អ្នកស្រីមានដីទំហំ១០ ឬ១០០០ម៉ែត្រការ៉េ ហើយអ្នកផ្សេងទៀតក៏មានដីទំហំដូចគ្នា បានយកមកដាំបន្លែចម្រុះ ពីព្រោះថាបើសិនជាធ្វើតែម្នាក់ឯង ទំហំផ្ទៃដីតូចពេក មិនអាចដាំបានច្រើន ប៉ុន្តែពេលយកដីដែលនៅជិតគ្នានោះមកដាក់រួមគ្នា ដាំរួមគ្នា ធ្វើឱ្យផ្ទៃដីដាំដុះមើលទៅធំ និងអាចដាំបន្លែបានច្រើនមុខ ។
អ្នកស្រីបានបន្ថែមថា ក្នុងមួយរដូវកាល អ្នកស្រី និងកសិករ៣គ្រួសារផ្សេងទៀត អាចប្រមូលផលបន្លែបានចន្លោះពី១០តោនទៅ១៥តោន និងអាចរកចំណូលបានចន្លោះពី១០លានទៅ១២លានរៀលក្នុងមួយគ្រួសារ ដែលអាចធ្វើឱ្យគ្រួសារអ្នកស្រី មានជីវភាពកាន់តែប្រសើរ អាចមានលទ្ធភាពឱ្យកូនៗទៅរៀនបានគ្រប់គ្នា និងសល់លុយសម្រាប់ការចំណាយប្រចាំថ្ងៃបានយ៉ាងស្រួល ។ នៅពេលទទួលបានផលហើយ អ្នកស្រី និងគ្រួសារផ្សេងទៀតនោះ បានចាប់ផ្ដើមដាំបន្តឡើងវិញ និងនាំគ្នាថែទាំ ទាំងអស់គ្នា ។
កសិកររូបនេះ បានបញ្ជាក់ថា ពេញមួយឆ្នាំ អ្នកស្រី និងក្រុមរបស់អ្នកស្រី ដាំបន្លែចម្រុះជាប់ជាប្រចាំ ដោយខែប្រាំង ដាំបន្លែណាដែលត្រូវនឹងខែប្រាំង ដូចជាខ្ទឹមស្លឹម ខាត់ណា ស ខាត់ណាខៀវ ហើយខែវស្សា រកបន្លែណាដែលធន់នឹងទឹកភ្លៀង ដូច្នេះទើបអាចមានបន្លែសម្រាប់ផ្គត់ផ្គង់ទៅកាន់ទីផ្សាររកចំណូលបានពេញមួយឆ្នាំ ។ ការធ្វើបែបនេះ បានធ្វើឱ្យជីវភាពរបស់អ្នកស្រី និងគ្រួសារ៣ផ្សេងទៀតបានផ្លាស់ប្តូរជីវភាពបានប្រសើរ ខុសឆ្ងាយពីពេលមុន ។
លោក ទួត សេងហ័ង អ្នកគ្រប់គ្រងសហប្រតិកម្មធន់ទ្រាំ និងអាកាសធាតុនៃអង្គការ អាយឌីអ៊ី (IDE) កម្ពុជាលើគម្រោង ស៊ីស្មាត បានបញ្ជាក់ថា បច្ចុប្បន្ននេះ ទាក់ទងទៅនឹងការដាំដំណាំ ឬបន្លែ មិនអាស្រ័យទៅតាមខែ ឬរដូវដូចកាលពីមុននោះទៀតទេ ប៉ុន្តែអ្វីដែលសំខាន់ គឺការចេះជ្រើសរើសពូជដំណាំ បច្ចេកទេសដាំ និងវិធីនៃការថែទាំ។
លោកបន្តថា សម្រាប់កសិករ ៤គ្រួសារ ដែលមានផ្ទៃដីប្រមាណ៤០អា ដាំខាតណាផ្កា និងខាត់ណាប្រូខូលី គឺអង្គការ បានជួយជាបច្ចេកទេស និងគ្រាប់ពូជឱ្យពួកគាត់យកទៅដាំ ហើយពួកគាត់ក៏មិនធ្វើឱ្យក្រុមការងាររបស់អង្គការអស់សង្ឃឹមដែរ គឺទទួលបានផលដ៏ល្អប្រសើរសម្រាប់កែប្រែជីវភាពរបស់ពួកគាត់៕
Account
Security
Favourite Content