សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ការវិនិយោគផ្ទាល់ពីបរទេស (FDI) ក្នុងតំបន់អាស៊ានបានកើនឡើង ៩,៧ ភាគរយ ដល់ ២៤៣,៩ ពាន់លានដុល្លារក្នុងឆ្នាំ ២០២៥ ពី ២២៦ ពាន់លានដុល្លារក្នុងឆ្នាំ ២០២៤ ដោយមានការជំរុញសំខាន់ពីកំណើនក្នុងវិស័យឧស្សាហកម្មកែច្នៃ និងផលិតកម្ម ជាពិសេសគ្រឿងអេឡិចត្រូនិក និងបរិក្ខារអគ្គិសនី។
យោងតាមរបាយការណ៍ស្តីពីការវិនិយោគអាស៊ាន ការវិនិយោគក្នុងចំណោមបណ្តាប្រទេសសមាជិកអាស៊ានបានឈានដល់ជិត ៤០ ពាន់លានដុល្លារក្នុងឆ្នាំ ២០២៥ ដែលបង្ហាញពីការកើនឡើងនៃសារៈសំខាន់នៃទុនក្នុងតំបន់ និងការពង្រឹងទំនាក់ទំនងសេដ្ឋកិច្ចរវាងសមាជិកអាស៊ាន។
តួលេខនេះត្រូវបានបង្ហាញក្នុងកិច្ចប្រជុំក្រុមប្រឹក្សាតំបន់វិនិយោគអាស៊ានលើកទី២៩ ដែលរៀបចំឡើងនៅថ្ងៃទី១៩ ខែកញ្ញា ដោយប្រទេសហ្វីលីពីន ក្នុងនាមជាប្រធានអាស៊ានឆ្នាំ ២០២៦។
របាយការណ៍បានបញ្ជាក់ថា បច្ចេកវិទ្យាឌីជីថល នវានុវត្តន៍ និងការស្រាវជ្រាវនិងអភិវឌ្ឍន៍ កំពុងក្លាយជាកត្តាសំខាន់សម្រាប់ទស្សនវិស័យវិនិយោគ និងការអភិវឌ្ឍវិស័យផលិតកម្មក្នុងតំបន់។
លោក Ceferino Rodolfo អនុរដ្ឋមន្ត្រីក្រសួងពាណិជ្ជកម្មហ្វីលីពីន បានលើកឡើងថា កំណើន FDI បង្ហាញពីទំនុកចិត្តរបស់វិនិយោគិនលើអាស៊ាន ទោះបីជាសេដ្ឋកិច្ចពិភពលោកប្រឈមនឹងភាពមិនប្រាកដប្រជាក៏ដោយ។
លោកបានបន្ថែមថា ការវិនិយោគក្នុងចំណោមប្រទេសអាស៊ានក៏បន្តកើនឡើង ដែលជួយពង្រឹងបរិយាកាសវិនិយោគ បង្កើតឱកាសទីផ្សារកាន់តែទូលំទូលាយ ការងារ និងប្រាក់ចំណូល ខណៈតំបន់កំពុងជំរុញការធ្វើសមាហរណកម្មសេដ្ឋកិច្ចឱ្យកាន់តែស៊ីជម្រៅ។
លោក Rodolfo បានសង្កត់ធ្ងន់ថា កិច្ចសហប្រតិបត្តិការក្នុងតំបន់មិនត្រឹមតែជាកិច្ចការការទូតប៉ុណ្ណោះទេ ប៉ុន្តែជាយន្តការសម្រាប់ទាក់ទាញការវិនិយោគ គាំទ្រអាជីវកម្ម បង្កើតការងារ និងពង្រឹងភាពធន់សេដ្ឋកិច្ច។
ក្នុងនាមជាប្រធានអាស៊ានឆ្នាំ ២០២៦ ហ្វីលីពីនកំពុងផ្តោតលើការទាក់ទាញទុនយុទ្ធសាស្ត្រទៅកាន់វិស័យតម្លៃខ្ពស់ និងផ្អែកលើចំណេះដឹង ដូចជា បន្ទះឈីប ថាមពលកកើតឡើងវិញ បច្ចេកវិទ្យាឌីជីថល បញ្ញាសិប្បនិម្មិត (AI) និងការកែច្នៃរ៉ែសំខាន់ៗ។
ហ្វីលីពីនក៏គ្រោងបន្តជំរុញកំណែទម្រង់ការវិនិយោគ និងវិធានការលើកទឹកចិត្តផ្សេងៗ ដើម្បីទាក់ទាញការវិនិយោគក្នុងតំបន់បន្ថែមទៀត ជាពិសេសទៅកាន់វិស័យឧស្សាហកម្មដែលកំពុងរីកចម្រើន និងមានសារៈសំខាន់ជាយុទ្ធសាស្ត្រ៕
Account
Security
Favourite Content