សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទុរេន គឺជាផ្លែឈើមួយប្រភេទដែលមានរសជាតិផ្អែម ឈ្ងុយឆ្ងាញ់ យ៉ាងពិសេស និងមានតម្លៃថ្លៃ បើប្រៀបធៀបទៅនឹងប្រភេទផ្លៃឈើដទៃទៀត និងជាប្រភេទដំណាំដែលត្រូវការលក្ខខណ្ឌអាកាសធាតុសមស្របក្នុងការដាំដុះ។ ដើម្បីទទួលបានទុរេនមានរសជាតិឆ្ងាញ់ និងជាទិន្នផលក្នុងស្រុកពិតប្រាកដ អតិថិជនគួរយកចិត្តទុកដាក់លើចំណុចសំខាន់ៗមួយចំនួន មុនពេលទិញទុរេន។
ដោយសារទុរេនជាដំណាំរើសទីតាំង និងប្រភេទដី រួមទាំអាកាសធាតុក្តៅ ហើយសើមសម្រាប់ដាំដុះ ដែលគេអាចដាំបាន ដូចជានៅខេត្តបាត់ដំបង កំពត កោះកុង ត្បូងឃ្មុំ និងនៅខេត្តកំពង់ចាម ដែលគេតែងល្បីល្បាញថា ទុរេនបែកអន្លូង។ ដើម្បីជ្រើសរើសទុរេន ដែលមានគុណភាព និងជាកសិផលក្នុងស្រុក ម្ចាស់ចំការទុរេនបែកអន្លូងបានចែករំលែកបទពិសោធមួយចំនួនទាក់ទងនឹងការកត់សម្គាល់ទុរេន។
លោក ហេង ឆេងលី ម្ចាស់ចំការទុរេន តាលី ស្ថិតក្នុងតំបន់បែកអន្លូង បានមានប្រសាសន៍ទាក់ទងនឹងការមើលផ្លែទុរេនថា ៖
“គេអាចសម្គាល់ទុរេនក្នុងស្រុកបាន ដោយមើលលើចំណុចមួយចំនួនដូចជា ផ្លែរាងទ្រវែង បន្លាស្រួច ទងវែងនៅស្អាតល្អ ក្លិនក្រអូប ដោយសារទុរេនក្នុងស្រុកកាត់ផ្លែ នៅពេលគ្រប់អាយុទុំល្អ ខុសពីទុរេននាំចូលដែលគេត្រូវកាត់ទុករយៈពេលច្រើនថ្ងៃ”
លោកបានបន្ថែមថា ចំពោះទុរេនដែលមានគុណភាព សភាពខាងក្រៅមានរូបរាងស្អាតហើយ នៅពេលពុះទៅ សាច់ទុរេនមានល្មួតល្អ មានជាតិម្សៅខ្ពស់ ដែលផ្ដល់នូវរស់ជាតិផ្អែមឆ្ងាញ់ តួយ៉ាងប្រភេទទុរេនម៉ាន់ថង ដែលសាច់មានសភាពស្ងួតល្អ។
ក្រៅពីនេះ អតិថិជនអាចពិនិត្យទៅលើរដូវនៃការប្រមូលផល ដូចជាទុរេនបែកអន្លូងផ្ទាល់ រយៈពេលដែលពេញរដូវប្រមូលផលគឺនៅ ពាក់កណ្ដាលខែមិថុនា ដល់ពាក់កណ្ដាលខែកក្កដា ប៉ុន្តែចំការខ្លះក៏អាចប្រមូលផលមុន ឬក្រោយ ពោលគឺចន្លោះខែ មេសាដល់ខែ កក្កដាដែលគេអាចបេះបានមុនខ្លះៗផងដែរ។
ថែមពីលើនេះ ការជ្រើសរើសទុរេនក៏អាស្រ័យលើទំនុកចិត្តនៃការលក់ដូរ ដូចជាអាជីវករខ្លះរកស៊ីស្មោះត្រង់ដែលទិញ និងលក់បន្តឱ្យអតិថិជននូវផ្លែទុរេនក្នុងស្រុកមានគុណភាព ចំណែកឈ្មួញ ឬក៏ចំការខ្លះក៏ត្រូវការផលចំណេញ ធ្វើការក្លែងបន្លំ ធ្វើឱ្យខូចឈ្មោះ និងខូចទីផ្សារទុរេនក្នុងស្រុកផងដែរ។
ម្ចាស់ចំការរូបនេះ បានបន្ថែមទៀតថា ដើម្បីទិញទុរេនបានល្អ ទាល់តែអ្នកផលិតមានទុរេនល្អ ដោយដាំដុះត្រូវតាមបទដ្ឋានបច្ចេកទេសត្រឹមត្រូវ ហើយអតិថិជនក៏អាចជ្រើសរើសយកកន្លែង ឬចំការណាដែលមានទំនុកចិត្តអាចផ្ដល់នូវផ្លែទុរេនដ៏មានគុណភាព សុវត្ថិភាព និងមានទំនុកចិត្តក្នុងអាជីវកម្ម។ គួរបញ្ជាក់ដែរថា ទោះបីមានការនាំចូលទុរេនពីប្រទេសជិតខាងដែលមានតម្លៃថោកជាង ក៏ទុរេនខ្មែរនៅតែពេញនិយម ដោយសារគុណភាព និងរសជាតិនៅតែល្អប្រសើរ ដែលធ្វើឱ្យអតិថិជននិយមគាំទ្រ មិនថាទិញរាយ ឬក៏បោះដុំមកបេះដល់ចំការនោះទេ។ ឆ្លៀតនៅក្នុងឱកាសនេះ លោក ហេង ឆេងលី បានជំរុញ និងលើកទឹកចិត្តដល់ប្រជាជនខ្មែរចូលរួមគាំទ្រកសិផលក្នុងស្រុកទាំងអស់គ្នា ដែលក្រៅពីអាចជួយបង្កើនកម្រិតសេដ្ឋកិច្ចរបស់ប្រជាកសិករខ្មែរ ក៏ដូចជាសង្គមជាតិទាំងមូលផងដែរ ដោយសារតែទិន្នផលទាំងនេះត្រូវបានផលិតចេញពីស្នាដៃកូនខ្មែរពិតៗ៕
Account
Security
Favourite Content