សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងពង្រឹងវិស័យដឹកជញ្ជូនកម្ពុជាឱ្យកាន់តែមានភាពប្រសើរ រាជរដ្ឋាភិបាលនឹងតភ្ជាប់បណ្តាញផ្លូវទឹកធំៗពីកំពង់ផែពហុបំណងខេត្តក្រចេះ និងកំពង់ផែរណបខេត្តកំពង់ឆ្នាំង ឆ្ពោះទៅកាន់ព្រែកជីកហ្វូណនតេជោដើម្បីងាយស្រួលក្នុងការដឹកជញ្ជូនទំនិញទៅកាន់គោលដៅទាំងនៅក្នុងស្រុក និងនាំចេញទៅក្រៅប្រទេសនាពេលឆាប់ៗខាងមុខ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ៧ ពីរង្វង់មូលផ្សារស្គន់ឆ្ពោះទៅក្រុងកំពង់ចាម នៅព្រឹកថ្ងៃទី០៧ ខែកក្កដា ឆ្នាំ២០២៦នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានមានប្រសាសន៍ថា កម្ពុជានឹងរៀបចំស្តាររទន្លេពីភ្នំពេញកាត់តាមទន្លេមេគង្គ ឆ្ពោះទៅកាន់កំពង់ផែពហុបំណងខេត្តក្រចេះ រួមនឹងការស្តារទន្លេសម្រួលដល់នាវាចរដឹកទំនិញធុនធ្ងន់ពីភ្នំពេញឆ្ពោះទៅកំពង់ផែទន្លេសាប ខេត្តកំពង់ឆ្នាំង ដើម្បីតភ្ជាប់កំពង់ផែទាំងពីរនេះមកកាន់ព្រែកជីកហ្វ៊ូណនតេជោ សម្រួលដល់ការដឹកជញ្ជូនទំនិញបន្តឆ្ពោះទៅកាន់កំពង់ផែសមុទ្រកម្ពុជា និងបន្តទៅកំពង់ផែសមុទ្រអន្តរជាតិ។
សម្តេចមានប្រសាសន៍ដូច្នេះថា ៖
«ឥឡូវយើងមានគម្រោងស្តារពីភ្នំពេញឡើងទៅកំពង់ឆ្នាំង បន្តឡើងមកមួយផ្នែកនៃខេត្តកំពង់ចាមតាមទន្លេមេគង្គ…. ចឹងទៅថ្ងៃមុខយើងនឹងស្តាររហូតទៅដល់ក្រចេះ ដើម្បីភ្ជាប់ពីកំពង់ផែពហុបំណងខេត្តក្រចេះ ចឹងតាមបណ្តោយផ្លូវនឹងមានផែសម្រាប់ដឹកទំនិញ ទាំងនៅទន្លេសាប ទាំងនៅទន្លេមេគង្គដូចគ្នា»។
លោកឧកញ៉ា ស៊ិន ចន្ធី អគ្គនាយកក្រុមហ៊ុន Linehaul Express និងជាអនុប្រធានសមាគមភស្តុភារកម្មកម្ពុជាបានមើលឃើញថា នៅពេលព្រែកជីកហ្វ៊ូណនស្ថាបនាចប់រួចរាល់ កម្ពុជានឹងទទួលបានផលប្រយោជន៍ជាច្រើន ជាពិសេសតាមទន្លេមេគង្គលើដែលតភ្ជាប់ទៅបណ្តាខេត្តមួយចំនួន នឹងបង្កើតបាននូវកំពង់ផែតូចៗតាមផ្លូវនោះជាច្រើនទៀត ដើម្បីទទួលនូវផលិតផលកសិកម្មរបស់ប្រជាពលរដ្ឋនៅតាមបណ្តាខេត្ត ដឹកចូលមកព្រែកជីកហ្វ៊ូណនឆ្ពោះទៅកំពង់ផែទឹកជ្រៅខេត្តកំពត និងកំពង់ផែទឹកជ្រៅខេត្តព្រះសីហនុជាដើម។
លោកបន្តថា ការតភ្ជាប់ផ្លូវទឹកមានសារៈសំខាន់បំផុត ជំរុញទៅដល់ការដឹកជញ្ជូន និងការធ្វើឡូជីស្ទីកនៅក្នុងការធ្វើពាណិជ្ជកម្ម និងសេដ្ឋកិច្ច។ ឡូជីស្ទីកក៏មានសារៈសំខាន់ណាស់ដែរ ក្នុងការធ្វើពាណិជ្ជកម្ម សម្រួលដល់ការដឹកជញ្ជូនទំនិញ និងផលិតផលកសិកម្មដែលមានតម្លៃថ្លៃជាងដឹកជញ្ជូនតាមផ្លូវដែក ផ្លូវគោក និងផ្លូវអាកាស ។
លោកឧកញ៉ាបញ្ជាក់ថា ៖
«ក្នុងនិយាមនៃការដឹកជញ្ជូនទំនិញដែលមានទំហំ និងទម្ងន់ស្មើគ្នា បើយើងដឹកតាមផ្លូវទឹកចំណាយ ១ដុល្លារ តែបើដឹកតាមរថភ្លើងយើងចំណាយ ២ដុល្លារ ហើយបើដឹកតាមរថយន្តយើងចំណាយរហូតដល់ ៦ដុល្លារ ទៅ ៨ដុល្លារ ដូច្នេះ និយាមនេះឃើញថា ការដឹកជញ្ជូនតាមផ្លូវទឹកមានតម្លៃទាប និងជំរុញដល់ការប្រកួតប្រជែងសេដ្ឋកិច្ចក្នុងតំបន់»។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍ថា វឌ្ឍនភាពព្រែកជីកហ្វ៊ូណនតេជោ បាន និងកំពុងដំណើរការទៅមុខស្របទៅតាមផែនការដែលបានគ្រោងទុក ហើយតំណាក់កាលនេះគឺស្ថិតក្នុងការដោះស្រាយផលប៉ះពាល់ធ្វើឡើងតាមយន្តការរដ្ឋាភិបាល ដែលដឹកនាំដោយក្រសួងសេដ្ឋកិច្ច និងហិរញ្ញវត្ថុ។
យោងតាម ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ រាជរដ្ឋាភិបាលនឹងអភិវឌ្ឍមូលដ្ឋានឡូជីស្ទីកសំខាន់ៗចំនួន ១១ កន្លែងនៅទូទាំងប្រទេស។ ផែនការមេនេះមានគោលដៅតម្រង់ទិសការអភិវឌ្ឍប្រព័ន្ធដឹកជញ្ជូន និងឡូជីស្ទីក សំដៅលើកកម្ពស់ការតភ្ជាប់របស់កម្ពុជាទាំងក្នុងប្រទេស និងក្រៅប្រទេស ដែលឈានដល់ការកាត់បន្ថយថ្លៃដឹកជញ្ជូន និងឡូជីស្ទីក លើកកម្ពស់សមាហរណកម្មកម្ពុជាក្នុងតំបន់ និងសកលលោក ព្រមទាំងលើកកម្ពស់ភាពប្រកួតប្រជែង និងពិពិធកម្មសេដ្ឋកិច្ចកម្ពុជា៕
Account
Security
Favourite Content