សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានចុះជួបសួរសុខទុក្ខបងប្អូនប្រជាជនតាមមូលដ្ឋាន និងពិនិត្យស្រះទឹកសហគមន៍ទន្លេនាម ផ្ទះសំណាញ់ ផ្សារបោះដុំបន្លែ កសិដ្ឋានចិញ្ចឹមមាន់ជាសហគមន៍ និងក្រុមសហគមន៍ដាំស្ពៃក្រញាញ់ ដែលស្ថិតនៅស្រុកអង្គរជ័យ និងពិនិត្យទីតាំងអភិវឌ្ឍ និងអភិរក្សសត្វប្រជៀវ ផ្ទះសំណាញ់ បឹងព្រៃក្រឡា អូរព្រែកអន្សារ និងបានចែកជូននូវពូជដូងក្រអូបខ្មែរជូនប្រជាកសិករដែលស្ថិតនៅស្រុកបន្ទាយមាស ខេត្តកំពត នាថ្ងៃទី២២ ខែមករា ឆ្នាំ២០២៦ ។
បន្ទាប់ពីបានចុះដល់ទីតាំងក្នុងមូលដ្ឋានផ្ទាល់ ឯកឧត្តមឧបនាយករដ្ឋមន្រ្តី សាយ សំអាល់ រួមទាំងក្រុមការងារបានមើលឃើញថា ភាពជាគំរូរបស់កសិករ និងសហគ្រិនភាពរបស់សហគមន៍មូលដ្ឋាន បាន និងកំពុងពូនជ្រំស្មារតី និងជំរុញចលនាដាំដុះដំណាំចម្រុះ ការចិញ្ចឹមសត្វកាន់តែទូលំទូលាយប្រកបដោយគំនិតច្នៃប្រតិដ្ឋ ស្របតាមសក្តានុពលភូមិសាស្ត្រ និងតម្រូវការ ដោយបង្កើនបាននូវផលិតកម្មសម្រាប់ការផ្គត់ផ្គង់ទីផ្សារ ការពង្រីកមុខរបរ និងការប្រើប្រាស់ធនធានដីឱ្យអស់សក្តានុពល ដែលធ្វើឱ្យជីវភាពរស់នៅប្រចាំថ្ងៃបានកាន់តែប្រសើរ ។
ដោយមានការយកចិត្តទុកដាក់ពីរាជរដ្ឋាភិបាល ក្រុមការងាររដ្ឋបាលខេត្តកំពត មន្ទីរជំនាញ និងក្រសួងស្ថាប័នពាក់ព័ន្ធ ដោយផ្អែកលើភាពឧស្សាហ៍ព្យាយាម ការអំណត់ ការអភិវឌ្ឍខ្លួនជាប្រចាំ បងប្អូនកសិករនឹងបន្តទទួលបាននូវការគាំទ្រទាំងហេដ្ឋារចនាសម្ព័ន្ធ ទុន បច្ចេកទេស និងការសម្របសម្រួលទីផ្សារ ដែលនឹងរួមចំណែកលើកស្ទួយផលិតភាព គុណភាព សុវត្ថិភាព ខ្លួនទីពឹងខ្លួន ប្រាក់ចំណូល និង ការនាំចេញនៅនឹងកន្លែង ដែលកំពុងរួមចំណែកទ្រទ្រង់ខឿនសេដ្ឋកិច្ចគ្រួសារ ជាពិសេសជួយប្រែក្លាយតំបន់ឆ្នេរជាប៉ូលសេដ្ឋកិច្ចជាតិដ៏សំខាន់របស់ជាតិ។
សូមជម្រាបថា ស្រុកបន្ទាយមាស ជាជង្រុកស្រូវរបស់ខេត្តកំពត និងជាតំបន់ប្រវត្តិសាស្ត្រមួយដ៏សំខាន់របស់កម្ពុជា ហើយកសិករ បាន និងកំពុងពង្រីកសក្តានុពលផ្ទៃដីដាំដុះដំណាំរួមផ្សំវិលជុំបន្ថែមទៀត ពិសេសបន្លែ និងដំណាំដូង ដែលជាប្រភេទកសិផលមានលក្ខណៈយុទ្ធសាស្ត្របន្ថែមលើម្រេច ធុរេន ចេក និងអំបិល ដែលបាន និងកំពុងផ្តល់ផ្លែផ្កាដល់សហគមន៍មូលដ្ឋាន កសាងអត្តសញ្ញាណ និងលើកកម្ពស់ជីវភាពរស់នៅកាន់តែល្អប្រសើរ ។
ផ្អែកលើហេដ្ឋារចនាសម្ព័ន្ធ និងលក្ខណៈអំណោយផលនៃសក្តានុពលធម្មជាតិ ព្រមទាំងភាពឧស្សាហ៍ព្យាយាមរបស់ប្រជាជនផ្ទាល់នៅនឹងកន្លែង ក្រុមការងារចុះជួយមូលដ្ឋាន និងភាគីពាក់ព័ន្ធមានជំនឿថាកសិករស្រុកបន្ទាយមាសនឹងក្លាយជាថ្នាលគំរូ និងជាសហគ្រិនឆ្នើមក្នុងមូលដ្ឋានដែលអាចមានសមត្ថភាពក្នុងការពង្រឹងពង្រីកផលិតផលកសិកម្មឱ្យកាន់តែទូលំទូលាយ និងសម្បូរបែប ដើម្បីពង្រីកមូលដ្ឋានដង្ហើមសេដ្ឋកិច្ច ពង្រឹងភាពធន់សហគមន៍ និងការនាំចេញនៅនឹងកន្លែងកាន់តែមានគុណភាពខ្ពស់ និងម្ចាស់ការឯករាជ្យ ខ្លួនទីពឹងខ្លួន ៕ ដោយ ៖ គ្រី សម្បត្តិ
Account
Security
Favourite Content