សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រាជរដ្ឋាភិបាលកម្ពុជាបានសម្រេចដាក់ចេញនូវយុទ្ធសាស្ត្រគន្លឹះថ្មីមួយ ដោយការលើកលែងទិដ្ឋាការ (Visa) រយៈពេល ៤ខែ ជូនដល់ប្រជាពលរដ្ឋចិន ដែលកាន់លិខិតឆ្លងដែនធម្មតា ហើយនឹងចាប់ផ្តើមនៅពាក់កណ្ដាលខែមិថុនាខាងមុខ ស្របពេលដែលក្រសួងទេសចរណ៍កម្ពុជាបានប្រកាសអំពីរដូវកាលបៃតង ដែលចាប់ផ្តើមពីខែឧសភា រហូតដល់ខែតុលា។
វិធានការនេះធ្វើឡើងក្នុងគោលបំណងទាក់ទាញ និងជំរុញកំណើនភ្ញៀវទេសចរចិនឱ្យមកកម្សាន្តនៅកម្ពុជាកាន់តែច្រើន ខណៈទីផ្សារទេសចរណ៍ចិនកំពុងឈរនៅលំដាប់ថ្នាក់លេខ ១ នាដើមឆ្នាំ ២០២៦ នេះ។
នៅក្នុងវេទិកាពិភាក្សាស្តីពី «សេដ្ឋកិច្ចកម្ពុជាឆ្នាំ២០២៦» ដែលរៀបចំដោយសមាគមអ្នកសារព័ត៌មានកម្ពុជាកាលពីរសៀលថ្ងៃ ទី២៥ ខែឧសភា ឆ្នាំ ២០២៦ លោកជំទាវ ហ៊ុន ដានី រដ្ឋលេខាធិការនិងជាអ្នកនាំពាក្យក្រសួងទេសចរណ៍ បានគូសបញ្ជាក់ថា យុទ្ធសាស្ត្រលើកលែងទិដ្ឋាការ ៤ ខែ ជូនដល់ជនជាតិចិននេះ នឹងត្រូវអនុវត្តចាប់ពី ថ្ងៃទី ១៥ ខែមិថុនា រហូតដល់ថ្ងៃទី ១៥ ខែតុលា ឆ្នាំ ២០២៦ ខាងមុខនេះ។
បើតាមអ្នកនាំពាក្យដដែល ផែនការនេះ គឺជាការត្រៀមលក្ខណៈដើម្បីស្វាគមន៍ទេសចរចិន ឱ្យកាន់តែខ្លាំងក្លា បន្ទាប់ពីកម្ពុជាទទួលបានទេសចរចិនប្រមាណ ១,២ លាននាក់ កាលពីឆ្នាំកន្លងទៅ។
ក្រៅពីការលើកលែងទិដ្ឋាការ ក្រសួងទេសចរណ៍បានបង្វែរការចាប់អារម្មណ៍ពីភាពស្ងប់ស្ងាត់ក្នុងរដូវវស្សា ចន្លោះពីខែឧសភា ដល់ខែតុលា មកជាយុទ្ធនាការ «រដូវកាលបៃតង (Green Season)» វិញ។ នេះជាយុទ្ធសាស្ត្រកែប្រែទស្សនវិស័យទេសចរណ៍ ដោយបង្ហាញពីភាពស្រស់បំព្រងនៃធម្មជាតិ ខៀវស្រងាត់ ដុះដាលល្អ និងវាលស្មៅដ៏ស្រស់ស្អាត ដែលជាផ្ទាំងទស្សនីយភាពដ៏ទាក់ទាញសម្រាប់អ្នកស្រឡាញ់ធម្មជាតិ។
យុទ្ធសាស្ត្រស្រដៀងគ្នានេះធ្លាប់ទទួលបានជោគជ័យយ៉ាងធំធេងរួចមកហើយកាលពីឆ្នាំ ២០២៥ ដោយក្នុងចន្លោះខែឧសភា ដល់តុលា ឆ្នាំមុន កម្ពុជាទទួលបានភ្ញៀវទេសចរដើរកម្សាន្តរហូតដល់ជាង ៩ លាននាក់ កើនឡើងជាង ៦០ ភាគរយ ធៀបនឹងឆ្នាំ ២០២៤ ដែលមានត្រឹមតែជិត ៥ លាននាក់ប៉ុណ្ណោះ។
លើសពីនេះទៀត ក្រសួងទេសចរណ៍ បានបង្កើតកម្មវិធីកម្សាន្ត និងព្រឹត្តិការណ៍ថ្មីៗជាហូរហែនៅគ្រប់រាជធានី-ខេត្ត ដូចជា ទេសចរណ៍សិល្បៈ និងទេសចរណ៍សិក្ខាសាលា ដើម្បីបន្ថែមលើពិធីបុណ្យប្រពៃណីជាតិដែលមានស្រាប់ រួមមាន បុណ្យចូលឆ្នាំខ្មែរ ភ្ជុំបិណ្ឌ បុណ្យអុំទូក និងឆ្លងឆ្នាំសកល ជាដើម ក្នុងគោលបំណងទាក់ទាញភ្ញៀវទេសចរឱ្យមកកម្សាន្តជាប្រចាំ។
ក្រសួងបានរៀបចំកញ្ចប់ទស្សនកិច្ចតភ្ជាប់គ្នារវាងតំបន់ប៉ូលទេសចរណ៍សំខាន់ៗ ដើម្បីទាក់ទាញភ្ញៀវឱ្យស្នាក់នៅបានយូរ។ តំបន់ទាំងនោះរួមមាន រាជធានីភ្នំពេញ សៀមរាប តំបន់ឆ្នេរ ព្រះសីហនុ កែប កំពត និងកោះកុង និងតំបន់ភូមិភាគឥសាន ដែលជាឋានសួគ៌នៃអេកូទេសចរណ៍ធម្មជាតិ។
យោងតាមទិន្នន័យពីក្រសួងទេសចរណ៍កាលពីឆ្នាំ ២០២៥ កម្ពុជាទទួលបានភ្ញៀវទេសចរអន្តរជាតិសរុបចំនួនជាង ៥ លាន ៥៦ ម៉ឺននាក់ ថយចុះជិត ១៧ ភាគរយ ធៀបនឹងឆ្នាំ ២០២៤ ដែលមានចំនួន ៦,៧ លាននាក់។
ក្រសួងទេសចរណ៍ រំពឹងថា យុទ្ធសាស្ត្របើកចំហជើងមេឃ និងការបន្ធូរបន្ថយលក្ខខណ្ឌទិដ្ឋាការនាពាក់កណ្តាលឆ្នាំ ២០២៦ នេះ នឹងក្លាយជាកាតាលីករដ៏មានឥទ្ធិពលក្នុងការស្តារ និងជំរុញកំណើនទេសចរអន្តរជាតិឡើងវិញ៕ អត្ថបទ៖ ទួន សុផល AMS
Account
Security
Favourite Content