សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យឧស្សាហកម្មយានយន្តនៅកម្ពុជា រាប់ទាំងទោចក្រយានយន្ត និងរថយន្ត កំពុងមានសន្ទុះគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ជាពិសេសវិស័យរថយន្ត ដោយក្រុមហ៊ុនដែលធ្លាប់នាំចូលរថយន្តពីក្រៅប្រទេសបានវិនិយោគបង្កើតរោងចក្រផ្គុំ និងដំឡើងក្នុងប្រទេសកម្ពុជា ដើម្បីដំឡើង និងផ្គត់ផ្គង់លើទីផ្សារក្នុងស្រុក និងនាំចេញទៅកាន់ទីផ្សារក្នុងតំបន់ ។
យោងតាមការសិក្សាស្រាវជ្រាវមួយរបស់ក្រុមហ៊ុនអចលនទ្រព្យ Advantage Property Services ( APS ) បានបង្ហាញឱ្យឃើញថា គិតត្រឹមពាក់កណ្ដាលឆ្នាំ២០២៦ ម៉ាកយីហោ រថយន្តដែលដំឡើងនៅកម្ពុជាមានចំនួនកាន់តែច្រើន ប៉ុន្តែមកដល់ឆ្នាំ២០២៦នេះ កម្ពុជានៅមិនទាន់មានរោងចក្រផលិតគ្រឿងបង្គុំធំៗក្នុងស្រុកនៅឡើយ ដូច្នេះ ឧស្សាហកម្មដំឡើងរថយន្តនៅកម្ពុជាបន្តពឹងផ្អែកលើការនាំចូលគ្រឿងបង្គុំ ដើម្បីបម្រើឱ្យខ្សែច្រវាក់ផលិតកម្មរបស់ខ្លួន ។
បើតាមរបាយការណ៍របស់ក្រុមហ៊ុន APS បានបង្ហាញថា គិតត្រឹមឆមាសទី១ ឆ្នាំ២០២៦នេះ មានរោងចក្រដំឡើងរថយន្តនៅក្នុងប្រទេសចំនួន ១២ហើយ ដោយក្នុងនោះរួមមានរោងចក្រដំឡើងរថយន្ត KN រោងចក្រ GAC , Chevrolet រោងចក្រដំឡើងរថយន្ត Ford រោងចក្រ ISUZU រោងចក្រដំឡើងរថយន្ត TOYOTA រថយន្តម៉ាក Ssangyong រោងចក្រដំឡើងរថយន្ត BYD រោងចក្រ GTV រោងចក្រដំឡើងរថយន្តម៉ាក HYUNDAI និងម៉ាករោងចក្រដំឡើងរថយន្តក្រុមហ៊ុន ZO Motors ។ ក្រៅពីនេះ កម្ពុជាក៏មានរោងចក្រដំឡើងរថយន្តធុនធ្ងន់មួយទៀតផងដែររបស់ក្រុមហ៊ុន CNHTC ដែលបានដំឡើងរថយន្តម៉ាក SINOTRUK សម្រាប់ដឹកទំនិញ ។
លោក ងន សាំង ប្រធានសហព័ន្ធឧស្សាហកម្មយានយន្តកម្ពុជា និងជាអគ្គនាយកក្រុមហ៊ុន RMA Cambodia បានមានប្រសាសន៍ថា មកដល់បច្ចុប្បន្នមានរោងចក្រដំឡើងរថយន្តក្នុងប្រទេសកម្ពុជាប្រមាណជាង ១២ រោងចក្រ ហើយរាល់គ្រឿងបង្គុំទាំងសម្រាប់រថយន្តមានទាំងនាំចូល និងមានផលិតនៅក្នុងស្រុកមួយចំនួនតូចផងដែរ ។
លោកបន្តថា ការវិនិយោគលើរោងចក្រផលិតគ្រឿងបង្គុំធំៗ គឺត្រូវការទុនវិនិយោគច្រើនណាស់ ហើយបើសិនជាមានវិនិយោគបង្កើតរោងចក្រផលិតគ្រឿងបង្គុំពេញលេញលុះត្រាតែមានរោងចក្រដំឡើងរថយន្តនៅក្នុងស្រុកច្រើន ។ បច្ចុប្បន្ននេះរោងចក្រដំឡើងរថយន្តនៅកម្ពុជានៅតែបន្តនាំចូលគ្រឿងបង្គុំពីខាងក្រៅ ដោយកម្ពុជាអាចផលិតខ្លួនឯងបានខ្លះដូចជាយកផ្នែកតូចៗមកផ្គុំ និងមានរោងចក្រផលិតសំបកកង់ឡានជាដើមតែប៉ុណ្ណោះ។
លោក ងន សាំង បានបញ្ជាក់ថា ក្នុងមួយឆ្នាំៗ កម្ពុជាបាននាំចូលគ្រឿងបង្គុំ និងគ្រឿងបន្លាស់រថយន្តមកបម្រើសេចក្ដីត្រូវការក្នុងស្រុកគិតជាទឹកប្រាក់ប្រមាណជាង៣០០លានដុល្លារអាម៉េរិក ដែលមានន័យថា អាចលើសពី ៣០០លានដុល្លារអាម៉េរិក ទៅ ៤០០លានដុល្លារអាម៉េរិក អាស្រ័យលើតម្រូវការទីផ្សារជាក់ស្ដែង ។
លោកបានបញ្ជាក់ថា ថ្វីត្បិតតែឧស្សាហកម្មរថយន្តនៅកម្ពុជាមានរោងចក្រដំឡើងក្នុងស្រុករហូតដល់ជាង១០រោងចក្រក៏ដោយក្តី ក៏កម្ពុជានៅតែបន្តនាំចូលរថយន្តពីខាងក្រៅមកបំពេញតម្រូវការដែរ ជាពិសេសរថយន្តអគ្គិសនីដែលកំពុងពេញនិយមនៅលើទីផ្សារពិភពលោក ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងរយៈពេលប៉ុន្មានឆ្នាំមកនេះ វិស័យឧស្សាហកម្មធុនធ្ងន់បានទាក់ទាញគម្រោងវិនិយោគច្រើនជាងគេ ជាក់ស្ដែងក្នុងរយៈពេល៦ខែដើមឆ្នាំ២០២៦នេះ វិស័យឧស្សាហកម្មបានទាក់ទាញគម្រោងវិនិយោគចុះបញ្ជីគិតជាទឹកប្រាក់ប្រមាណ ២,៥៦ពាន់លានដុល្លារអាម៉េរិកក្នុងចំណោមទុនវិនិយោគសរុប ៤,៧ពាន់លានដុល្លារអាម៉េរិក ដែលបានចុះបញ្ជីវិនិយោគក្នុងរយៈពេល៦ខែដើមឆ្នាំ២០២៦ ៕
Account
Security
Favourite Content