សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ដោយសារមិនអាចទប់ទល់នឹងចរន្តពហិការទំនិញថៃតទៅមុខទៀតបាន ផ្សារម៉ាក្រូ សាខាខេត្តសៀមរាប បានប្រកាសបិទទ្វារជាផ្លូវការចាប់ពីពេលនេះទៅហើយ បន្ទាប់ពីបើកដំណើរការអាជីវកម្មអស់រយៈពេល ៧ ឆ្នាំ។ ផ្សារដែលមានទីតាំងលក់សរុបប្រមាណ ៧ពាន់ម៉ែត្រការ៉េនេះ បានបើកសម្ពោធកាលពីដើមឆ្នាំ២០១៩។
បន្ទាប់ពីយោធាថៃបានបើកការឈ្លានពានលើបូរណភាពទឹកដីកម្ពុជា ពលរដ្ឋកម្ពុជាគ្រប់ទិសទីបាននាំគ្នាឈប់ទិញផលិតផលថៃ ហើយជាលទ្ធផល ក្រុមហ៊ុនថៃបានប្រកាសដកខ្លួន ឬកាត់បន្ថយអាជីវកម្មនៅកម្ពុជាជាបន្តបន្ទាប់ ដូចជាស្ថានីយ៍ប្រេងសាំង PTT រោងភាពយន្ត Legend មី Mama រួមទាំងក្រុមហ៊ុនផលិតចំណីអាហារ និងភេសជ្ជៈជាច្រើនទៀត។
លោកបណ្ឌិត ជ័យ តិច អ្នកវិភាគភូមិសាស្ត្រនយោបាយ និងសន្តិសុខអន្តរជាតិ បានកត់សម្គាល់ពីសក្តានុពល និងភាពវិជ្ជមានជុំវិញការដកខ្លួនរបស់ក្រុមហ៊ុនថៃចេញពីប្រទេសកម្ពុជា។
លោកបណ្ឌិត បានថ្លែងថា ៖«ការដកខ្លួនរបស់ក្រុមហ៊ុនថៃចេញពីកម្ពុជានេះគឺមានភាពវិជ្ជមានច្រើនជាងអវិជ្ជមាន។ មានន័យថាកម្ពុជាត្រូវពឹងផ្អែកលើខ្លួនឯង ឯករាជ្យខ្លួនឯង វិនិយោគកាន់តែច្រើនទាំងក្នុងស្រុក និងអន្តរជាតិ ដើម្បីផលិតនូវផលិតផលមកជំនួសផលិតផលថៃ»។
សូមបញ្ជាក់ថា ជម្លោះប្រដាប់អាវុធ ដែលបង្កឡើងដោយភាគីថៃ បានធ្វើឱ្យពលរដ្ឋកម្ពុជាបាត់បង់ជីវិត និងរងរបួសជាច្រើននាក់ រួមទាំងផ្លាស់ទីលំនៅរាប់សែនគ្រួសារ ហើយក៏បានប៉ះពាល់យ៉ាងធ្ងន់ធ្ងរដល់ទំនាក់ទំនងការទូត សេដ្ឋកិច្ច និងពាណិជ្ជកម្មឆ្លងកាត់ព្រំដែនផងដែរ។
ជាក់ស្ដែង នៅឆមាសទី១ ឆ្នាំ២០២៦ ការធ្វើពាណិជ្ជកម្មទ្វេភាគីរវាងកម្ពុជា និងថៃ មានទំហំទឹកប្រាក់ជាង ១,៣ពាន់លានដុល្លារ បានធ្លាក់ចុះជាង ៣៥ភាគរយ បើធៀបនឹងរយៈពេលដូចគ្នានៅឆ្នាំ២០២៥។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕ អត្ថបទ៖ ខន ណារី AMS
Account
Security
Favourite Content