បរទេស ៖ រដ្ឋបាលរបស់ប្រធានាធិបតីអាម៉េរិក លោក ដូណាល់ ត្រាំ បានសងប្រាក់ពន្ធគយចំនួន ១០០ ពាន់លានដុល្លារជូនទៅឱ្យក្រុមហ៊ុន ឬ អាជីវកម្មនានាដែលខ្លួនបានដាក់ពន្ធកាលពីឆ្នាំកន្លងទៅនោះវិញតាមការសម្រេចរបស់តុលាការកំពូលអាមេរិក ខណៈដែលនៅរាប់ពាន់លានដុល្លារទៀតកំពុងជាប់គាំងនៅឡើយ។ នេះបើយោងតាមការរាយការណ៍ពី BBC។

យោងតាមឯកសារពីទីភ្នាក់ងារគយ និងការពារព្រំដែនអាម៉េរិក បានឱ្យដឹងថា រដ្ឋាភិបាលបានសងប្រាក់ប្រមាណ ៦០ ភាគរយនៃចំណូលពន្ធគយសរុបដែលប្រមូលក្រោមគោលនយោបាយរបស់លោក ដូណាល់ ត្រាំ រួចរាល់ហើយ ប៉ុន្តែទឹកប្រាក់ជិត ២៩ ពាន់លានដុល្លារទៀតកំពុងស្ថិតក្រោមការពិនិត្យឡើងវិញដោយអាជ្ញាធរពាណិជ្ជកម្ម ខណៈទឹកប្រាក់ ១,៦ ពាន់លានដុល្លារផ្សេងទៀតកំពុងជាប់គាំង ដោយសារតែបណ្តាក្រុមហ៊ុននាំចូលមិនទាន់បានផ្តល់ព័ត៌មានលម្អិតអំពីគណនីធនាគាររបស់ពួកគេ។ ការបង្វិលសងប្រាក់នេះកើតឡើងបន្ទាប់ពីតុលាការកំពូលចេញសេចក្តីសម្រេចកាលពីខែកុម្ភៈកន្លងទៅនេះថា គោលនយោបាយពន្ធគយរបស់លោក ដូណាល់ ត្រាំ គឺខុសច្បាប់។

កន្លងមក សេតវិមានបានកំណត់ដែនប្រើប្រាស់ច្បាប់ស្តីពីអំណាចសេដ្ឋកិច្ចបន្ទាន់ជាអន្តរជាតិឆ្នាំ១៩៧៧ (IEEPA) ដែលផ្តល់អំណាចឱ្យប្រធានាធិបតីគ្រប់គ្រងលើពាណិជ្ជកម្ម ដើម្បីជាការឆ្លើយតបទៅនឹងស្ថានភាពអាសន្ន។ យ៉ាងណាមិញ វិធានការនេះបានបង្កឱ្យមានការតវ៉ាយ៉ាងខ្លាំងក្លាទាំងក្នុង និងក្រៅប្រទេសពីសំណាក់ក្រុមហ៊ុននានាដែលត្រូវប្រឈមមុខនឹងការដំឡើងថ្លៃពន្ធភ្លាមៗលើទំនិញនាំចូលមកកាន់អាម៉េរិក ដោយសារពន្ធខ្ពស់ជំរុញឱ្យតម្លៃទំនិញកាន់តែឡើងថ្លៃ។ ពន្ធទាំងនេះមិនត្រូវបានបង់ដោយរដ្ឋាភិបាលបរទេស ឬអ្នកនាំចេញនៅក្រៅប្រទេសឡើយ ប៉ុន្តែត្រូវបានបង់ដោយអាជីវកម្មក្នុងស្រុក និងអ្នកនាំចូល នៅពេលដែលទំនិញមកដល់ការិយាល័យគយអាម៉េរិក។ នៅពេលដែលពន្ធកាន់តែខ្ពស់ ក្រុមហ៊ុន ឬ អាជីវកម្មត្រូវចំណាយដើមទុនកាន់តែច្រើន ហើយជាទូទៅពួកគេនឹងដំឡើងតម្លៃលក់រាយរបស់ទំនិញដែលអតិថិជនត្រូវទទួលសម្ពាធនេះបន្តផងដែរ។

ចាប់តាំងពីមានសេចក្តីសម្រេចរបស់តុលាការកំពូលមក សាជីវកម្មធំៗមួយចំនួនរបស់អាម៉េរិកទទួលបានប្រាក់សំណងដ៏ច្រើនសន្ធឹកសន្ធាប់ត្រឡប់មកវិញរួចហើយ។ ផ្អែកតាមច្បាប់គយរបស់អាម៉េរិក មានតែអ្នកនាំចូលដែលបានបង់ពន្ធផ្ទាល់ប៉ុណ្ណោះទើបអាចទាមទារប្រាក់សំណងវិញបាន។

លោក Brian Olsavsky នាយកផ្នែកហិរញ្ញវត្ថុរបស់ក្រុមហ៊ុន Amazon បានបង្ហើបថា ពួកគេទទួលប្រាក់សំណងវិញប្រមាណ ៦០០ លានដុល្លារក្នុងអំឡុងពេលត្រីមាសទី២។ ប៉ុន្តែ បើទោះបីជាមានសេចក្តីសម្រេចពីតុលាការកំពូលក្ដី រដ្ឋបាលលោក ត្រាំ បានព្យាយាមរកវិធីផ្សេងៗមកដំឡើងពន្ធម្ដងទៀត ដូចជា ការដំឡើងពន្ធសកល ១០% ជាបណ្តោះអាសន្ន។ នៅពេលដែលពន្ធនេះផុតកំណត់ រដ្ឋបាល ត្រាំ ក៏បានដំឡើងពន្ធថ្មីមួយទៀតលើដៃគូពាណិជ្ជកម្មចំនួន ៦០ ប្រទេស ក្រោមហេតុផលថា ពួកគេបរាជ័យក្នុងការទប់ស្កាត់នៃការនាំចូលទំនិញដែលប្រើកម្លាំងពលកម្មដោយបង្ខំ៕