សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រឈមមុខនឹងការវិវត្តយ៉ាងឆាប់រហ័សនៃពាណិជ្ជកម្មសកល ភាពតានតឹងផ្នែកសេដ្ឋកិច្ច និងពាណិជ្ជកម្មរវាងមហាអំណាច និងការរំខានដល់ពាណិជ្ជកម្មឆ្លងកាត់ព្រំដែន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជំរុញឱ្យកម្ពុជាធ្វើពិពិធកម្មទីផ្សារ និងស្វែងរកកាលានុវត្តភាពនាំចេញទៅកាន់ទីផ្សារថ្មីៗ ដើម្បីពង្រឹងសមត្ថភាពប្រកួតប្រជែងរបស់ខ្លួន។
ការលើកឡើងនេះធ្វើឡើងក្នុងពិធីបើក «វេទិកាធុរកិច្ច និងនវានុវត្តន៍ឆ្នាំ២០២៦» ក្រោមប្រធានបទ «កាលានុវត្តភាពវិស័យនាំចេញ-នាំចូលរបស់កម្ពុជា» ដែលរៀបចំដោយសភាពាណិជ្ជកម្មកម្ពុជា កាលពីរសៀលថ្ងៃទី២៦ ខែសីហា ឆ្នាំ២០២៦ នៅរាជធានីភ្នំពេញ ដោយមានការចូលរួមពីវាគ្មិន និងអ្នកជំនាញមកពីវិស័យសាធារណៈ និងឯកជន ព្រមទាំងធុរជន និងវិនិយោគិនក្នុងស្រុក និងបរទេសប្រមាណ ៥០០នាក់។
អ្នកឧកញ៉ា គិត ម៉េង ដែលជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានលើកឡើងថា បរិការណ៍ពាណិជ្ជកម្ម និងសេដ្ឋកិច្ចសកលកំពុងវិវត្តយ៉ាងឆាប់រហ័ស ដែលអាចនាំមកទាំងបញ្ហាប្រឈម និងកាលានុវត្តភាពថ្មីៗសម្រាប់វិស័យនាំចេញ-នាំចូលរបស់កម្ពុជា។
អ្នកឧកញ៉ាបានគូសបញ្ជាក់ថា ភាពតានតឹងផ្នែកពាណិជ្ជកម្ម និងសេដ្ឋកិច្ចរវាងមហាអំណាច ការវិវត្តនៃគោលនយោបាយពន្ធគយសកល និងជម្លោះនៅតំបន់មជ្ឈិមបូព៌ា ព្រមទាំងការរំខានដល់ពាណិជ្ជកម្មឆ្លងកាត់ព្រំដែនដោយសារជម្លោះព្រំដែនកម្ពុជា និងថៃ សុទ្ធតែជាកត្តាដែលបង្ហាញពីសារៈសំខាន់នៃការធ្វើពិពិធកម្មទីផ្សាររបស់កម្ពុជា។
អ្នកឧកញ៉ាបានបន្តថា ៖«ការធ្វើពិពិធកម្មនេះមានសារៈសំខាន់ ដើម្បីលើកកម្ពស់សមត្ថភាពប្រកួតប្រជែង និងស្វែងរកកាលានុវត្តភាពនាំចេញទៅកាន់ទីផ្សារថ្មីៗ»។
អ្នកឧកញ៉ា គិត ម៉េង ក៏បានសង្កត់ធ្ងន់លើសារៈសំខាន់នៃការរួបរួមគ្នារបស់វិស័យឯកជនជាសំឡេងតែមួយ និងការធ្វើការកាន់តែជិតស្និទ្ធជាមួយរាជរដ្ឋាភិបាល ក្នុងការកែទម្រង់ និងដោះស្រាយបញ្ហាប្រឈមនានា។
តាមអ្នកឧកញ៉ា កិច្ចសហការរវាងវិស័យឯកជន និងរាជរដ្ឋាភិបាល នឹងជួយបង្កើតបរិយាកាសធុរកិច្ចកាន់តែប្រសើរ បង្កើតការងារ និងបង្កើនប្រាក់ចំណូលរបស់ប្រជាពលរដ្ឋ សំដៅរួមចំណែកជំរុញកំណើនសេដ្ឋកិច្ចប្រកបដោយចីរភាព។
ជាមួយគ្នានេះ ឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា បានលើកឡើងថា ការរៀបចំវេទិកាឆ្នាំ២០២៦ គឺជាការបន្តពីលទ្ធផល និងបទពិសោធន៍ដែលទទួលបានពីវេទិកាកាលពីឆ្នាំ២០២៥ ដើម្បីផ្តល់ឱកាសដល់ម្ចាស់អាជីវកម្ម និងវិនិយោគិន ទទួលបានព័ត៌មានថ្មីៗ និងស្វែងយល់អំពីការប្រែប្រួលនៃរចនាសម្ព័ន្ធសេដ្ឋកិច្ចសកល។
ឧកញ៉ា លឹម សុជាតិ បានបន្តថា វេទិកានេះក៏បង្កើតលំហសម្រាប់ការផ្លាស់ប្តូរយោបល់ និងចែករំលែកបទពិសោធន៍រវាងវិស័យសាធារណៈ និងឯកជន ជាពិសេសលើការអភិវឌ្ឍហេដ្ឋារចនាសម្ព័ន្ធដឹកជញ្ជូន និងភស្តុភារកម្ម ការពង្រឹងខ្សែច្រវាក់ផ្គត់ផ្គង់ និងការបង្កើនប្រសិទ្ធភាពក្នុងការនាំចេញ-នាំចូល។
អ្នកឧកញ៉ា គិត ម៉េង បានបង្ហាញក្តីសង្ឃឹមថា វេទិកាធុរកិច្ច និងនវានុវត្តន៍ឆ្នាំ២០២៦ នឹងក្លាយជាវេទិកាសំខាន់សម្រាប់ធុរជន វិនិយោគិន និងភាគីពាក់ព័ន្ធ រួមគ្នាពិភាក្សា កំណត់ និងស្វែងរកកាលានុវត្តភាពថ្មីៗ ព្រមទាំងចែករំលែកគំនិត និងបទពិសោធន៍ ដើម្បីពង្រឹងវិស័យនាំចេញ-នាំចូល បង្កើនសមត្ថភាពប្រកួតប្រជែង និងជំរុញការវិនិយោគនៅកម្ពុជា។
ក្នុងកម្មវិធីនេះ ឯកឧត្តមអ្នកឧកញ៉ា ហ៊ឺ បាវី ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ បានធ្វើបទបាឋកថាស្តីពី «កាលានុវត្តភាពភស្តុភារកម្មកម្ពុជា» ដោយផ្តោតលើតួនាទី និងសក្តានុពលរបស់វិស័យនេះ ក្នុងការពង្រឹងការតភ្ជាប់ពាណិជ្ជកម្ម ការវិនិយោគ និងខ្សែច្រវាក់ផ្គត់ផ្គង់ ព្រមទាំងបង្កើនសមត្ថភាពប្រកួតប្រជែងរបស់វិស័យឯកជនកម្ពុជា។
វេទិកាក៏មានកិច្ចពិភាក្សាក្រោមប្រធានបទ «ការបង្កើនប្រសិទ្ធភាពវិស័យដឹកជញ្ជូន និងភស្តុភារកម្មសម្រាប់ភាពប្រកួតប្រជែងក្នុងពាណិជ្ជកម្មសកល» ដោយមានការចូលរួមពីវាគ្មិន និងអ្នកជំនាញមកពីវិស័យពាក់ព័ន្ធ ដើម្បីចែករំលែកចំណេះដឹង បទពិសោធន៍ និងទស្សនៈអំពីការកែលម្អប្រព័ន្ធដឹកជញ្ជូន និងភស្តុភារកម្មរបស់កម្ពុជា។
សភាពាណិជ្ជកម្មកម្ពុជា បានរៀបចំវេទិកានេះក្នុងគោលបំណងចែករំលែកព័ត៌មាន ចំណេះដឹង និងបទពិសោធន៍ថ្មីៗ ពាក់ព័ន្ធនឹងការវិវត្តនៃសេដ្ឋកិច្ច និងពាណិជ្ជកម្មសកល ព្រមទាំងស្វែងរកកាលានុវត្តភាព និងដំណោះស្រាយថ្មីៗ ដើម្បីជួយពង្រឹងសមត្ថភាពប្រកួតប្រជែងរបស់ធុរជន និងវិស័យឯកជនកម្ពុជា។
តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី១០ ខែកក្កដា ឆ្នាំ២០២៦ ការដោះដូរទំនិញរបស់កម្ពុជាក្នុងឆមាសទី១ ឆ្នាំ២០២៦ សម្រេចបានទំហំទឹកប្រាក់ប្រមាណ ៣៦.៨៤ ពាន់លានដុល្លារអាម៉េរិក កើនឡើង ២០.៥ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្នុងរយៈពេលនេះ កម្ពុជាបាននាំចេញទំនិញមានតម្លៃ ១៧.០៧ ពាន់លានដុល្លារ កើនឡើង ១៩.៥ ភាគរយ ខណៈការនាំចូលមានតម្លៃជាង ១៩.៧៦ ពាន់លានដុល្លារ កើនឡើង ២១.៤ ភាគរយ។
កំណើននេះបង្ហាញពីការកើនឡើងនៃសកម្មភាពពាណិជ្ជកម្មរបស់កម្ពុជា និងការចូលរួមកាន់តែសកម្មក្នុងខ្សែសង្វាក់ផ្គត់ផ្គង់សកល ខណៈការពង្រីក និងធ្វើពិពិធកម្មទីផ្សារនាំចេញ នៅតែជាកត្តាសំខាន់សម្រាប់ការពង្រឹងសមត្ថភាពប្រកួតប្រជែងរបស់ផលិតផលកម្ពុជា៕
Account
Security
Favourite Content