សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ធនាគារពិភពលោក (World Bank) សម្រេចដំឡើងឋានៈប្រទេសវៀតណាម ពីក្រុមប្រទេសមានចំណូលមធ្យមកម្រិតទាប ទៅជាក្រុមប្រទេសមានចំណូលមធ្យមកម្រិតខ្ពស់ នៅក្នុងការធ្វើចំណាត់ថ្នាក់កម្រិតចំណូលជាតិចុងក្រោយបង្អស់របស់ខ្លួនដែលបានប្រកាសកាលពីថ្ងៃទី១ ខែកក្កដា។ នេះបើយោងតាមការរាយការណ៍ពី Asia News Network។
ការវាយតម្លៃនេះត្រូវបានធ្វើឡើងផ្អែកលើចំណូលជាតិសរុបសម្រាប់មនុស្សម្នាក់ (GNI per capita) របស់ប្រទេសនីមួយៗកាលពីឆ្នាំមុន។ ចំណូលជាតិសរុបសម្រាប់មនុស្សម្នាក់របស់វៀតណាមកើនឡើងពី ៤,៤៩០ ដុល្លារក្នុងឆ្នាំ ២០២៤ ដល់ ៤,៩៧០ ដុល្លារ ក្នុងឆ្នាំ ២០២៥។
តួលេខនេះលើសកម្រិតអប្បបរមាដែលធនាគារពិភពលោកកំណត់ GNI ៤,៥១៦ ដុល្លារសម្រាប់មនុស្សម្នាក់ក្នុងឆ្នាំ ២០២៥ ដើម្បីអាចឈានជើងចូលក្នុងក្រុមប្រទេសមានចំណូលមធ្យមកម្រិតខ្ពស់។
យោងតាមធនាគារពិភពលោក បានឲ្យដឹងថា ការឡើងឋានៈរបស់វៀតណាមត្រូវបានជំរុញដោយគំរូសេដ្ឋកិច្ចផ្អែកលើការនាំចេញជាមួយនឹងទំហំនាំចេញហក់ឡើងជាង ១៥ ភាគរយទាំងក្នុងឆ្នាំ ២០២៤ និង ២០២៥ ខណៈដែលផលិតផលក្នុងស្រុកសរុប (GDP) សម្រេចបាននូវកំណើន ៧ ភាគរយ និង ៨ ភាគរយរៀងគ្នា។
លើសពីនេះ ចំណូលជាតិសរុបសម្រាប់មនុស្សម្នាក់ (GNI) របស់វៀតណាមរីកចម្រើនក្នុងអត្រាមធ្យម ១០ ភាគរយជារៀងរាល់ឆ្នាំចន្លោះឆ្នាំ ២០២១ និង ២០២៥។ កត្តាជំរុញទាំងនេះជាការបោះជំហានទៅមុខប្រកបដោយចីរភាព និងខ្លាំងក្លាបំផុតមួយនៅក្នុងតំបន់។
មិនត្រឹមតែប៉ុណ្ណោះ វៀតណាមដាក់គោលដៅក្នុងការក្លាយជាប្រទេសឧស្សាហកម្មពេញលេញ និងមានសេដ្ឋកិច្ចរឹងមាំពិតប្រាកដនៅក្នុងក្រុមប្រទេសមានចំណូលមធ្យមកម្រិតខ្ពស់នេះនៅត្រឹមឆ្នាំ ២០៣០ និង ក្លាយជាប្រទេសអភិវឌ្ឍន៍ដែលមានចំណូលខ្ពស់នៅត្រឹមឆ្នាំ ២០៤៥។ ដើម្បីសម្រេចបាននូវមហិច្ឆតាទាំងនេះ អត្រាកំណើនសេដ្ឋកិច្ចរបស់វៀតណាមត្រូវឈានដល់ចាប់ពី ១០ ភាគរយ ឬ ខ្ពស់ជាងនេះ។
គួរឲ្យបញ្ជាក់ដែរថា ធនាគារពិភពលោកប្រើប្រាស់សន្ទស្សន៍ GNI សម្រាប់មនុស្សម្នាក់គិតជាដុល្លារអាម៉េរិក ដើម្បីចាត់ថ្នាក់់សេដ្ឋកិច្ចសកលលោកជា ៤ ក្រុម រួមមាន៖ ចំណូលទាប ចំណូលមធ្យមកម្រិតទាប ចំណូលមធ្យមកម្រិតខ្ពស់ និងចំណូលខ្ពស់។
កម្រិតកំណត់ត្រូវបានកែតម្រូវផ្អែកលើអតិផរណា និងកត្តាផ្សេងៗទៀតដូចជា កំណើនសេដ្ឋកិច្ច និងប្រជាជន ការផ្លាស់ប្តូរគណនេយ្យជាតិ និងការពិនិត្យឡើងវិញលើទិន្នន័យគ្រឹះ។ សម្រាប់ឆ្នាំ ២០២៦ នេះ ធនាគារពិភពលោកកំណត់អត្តសញ្ញាណប្រទេសមានចំណូលមធ្យមកម្រិតខ្ពស់ចន្លោះពី ៤,៤៩៦ ដល់ ១៣,៩៣៥ ដុល្លារ និង ៤,៦៣៦ ដល់ ១៤,៣៧៥ ដុល្លារសម្រាប់ឆ្នាំ ២០២៧។
វៀតណាម គឺជាប្រទេសមួយក្នុងចំណោមប្រទេសទាំង ៦ ដែលបានឡើងឋានៈចំណូលខ្ពស់ជាងមុន ក្នុងចំណោមប្រទេសចំនួន ២១៨ ដែលត្រូវបានវាយតម្លៃ។ ទន្ទឹមនឹងនេះ ប្រទេស ៤ ផ្សេងទៀតក៏ត្រូវបានដំឡើងឋានៈពីចំណូលមធ្យមកម្រិតទាបទៅជាចំណូលមធ្យមកម្រិតខ្ពស់ផងដែររួមមាន ហ្សកដានី (៥,២៦០ ដុល្លារ), មីក្រូណេស៊ី (៤,៧៦០ ដុល្លារ), ហ្វីលីពីន (៤,៨៥០ ដុល្លារ), និង ស្រីលង្កា(៤,៦៧០ ដុល្លារ)។
ដោយឡែក ប្រទេសតូហ្គោនៅអាហ្វ្រិកខាងលិច ឡើងឋានៈពីចំណូលទាបមកចំណូលមធ្យមកម្រិតទាប ជាមួយនឹងតួលេខ GNI ១,៣៥០ ដុល្លារសម្រាប់មនុស្សម្នាក់។
ទោះជាយ៉ាងណាក្ដី ការដំឡើងឋានៈនេះមិនប៉ះពាល់ដល់គោលនយោបាយផ្តល់ប្រាក់កម្ចីបច្ចុប្បន្នរបស់ធនាគារពិភពលោកនោះទេ ដោយវៀតណាម និងហ្វីលីពីនបន្តស្ថិតក្នុងក្រុមប្រទេសដែលខ្ចីប្រាក់ពី ធនាគារអន្តរជាតិសម្រាប់ការកសាង និងអភិវឌ្ឍន៍ឡើងវិញ (IBRD) ខណៈដែលស្រីលង្កាបន្តខ្ចីពីសមាគមអភិវឌ្ឍន៍អន្តរជាតិ (IDA)។ ស្ថាប័នទាំងពីរនេះគឺជាសសរស្តម្ភដ៏សំខាន់របស់ក្រុមធនាគារពិភពលោក៕
Account
Security
Favourite Content