សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តបតាមការអំពាវនាវរបស់រាជរដ្ឋាភិបាលដែលបានសុំឱ្យគ្រឹះស្ថានធនាគារ និងមីក្រូហិរញ្ញវត្ថុអនុគ្រោះ ចំពោះអតិថិជនដែលរងផលប៉ះពាល់ដោយសារសង្គ្រាមតាមព្រំដែនកម្ពុជា-ថៃ គ្រឹះស្ថានធនាគារ និងហិរញ្ញវត្ថុជាច្រើនឬស្ទើរតែទាំងអស់នៅកម្ពុជាបានយល់ព្រមពន្យារការទូទាត់សងត្រលប់ និងលុបបំណុលសម្រាប់យោធិនពលីនិងពិការ ។
យោងតាមប្រសាសន៍សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក្នុងពិធីប្រគល់សញ្ញាបត្រជូននិស្សិតសាកលវិទ្យាល័យវិទ្យាសាស្ត្រសុខាភិបាល បានឱ្យដឹងថា ក្នុងការផ្ទុះអាវុធរវាងយោធាកម្ពុជានិងថៃកន្លងមកនេះ តាមការអំពាវនាវរបស់រដ្ឋាភិបាល គ្រឹះស្ថានហិរញ្ញវត្ថុចំនួន៦១ បានជួយពន្យារការទូទាត់ប្រចាំខែ ទាំងដើមទាំងការសរុប២០០លានដុល្លារអាម៉េរិក និងបានលើកលែងពិន័យប្រាក់សរុបប្រមាណជាង ២លាន ។
សម្ដេចបន្តថា សម្រាប់យោធិនដែលធ្វើប្រតិបត្តិការផ្ទាល់នៅជួរមុខ គ្រឹះស្ថានហិរញ្ញវត្ថុចំនួន៧៧ បានពន្យារការទូទាត់សង ទាំងដើមទាំងការសរុបចំនួនជិត៥០លានដុល្លារអាម៉េរិក និងលើកបានលើកលែងប្រាក់ពិន័យសរុបប្រមាណ៥២ម៉ឺនដុល្លារអាម៉េរិក ។ ដោយឡែកសម្រាប់យោធិនពិការ គ្រឹះស្ថានហិរញ្ញវត្ថុចំនួន១៤ ក៏បានពន្យារការទូទាត់សងត្រលប់ទាំងដើមទាំងការសរុបចំនួន ៣២ម៉ឺនដុល្លារអាម៉េរិក ។ ចំណែកយោធិនពលី គ្រឹះស្ថានហិរញ្ញវត្ថុចំនួន២៣ បានលុបបំណុលទាំងស្រុងជូនតែម្ដង ។
សម្ដេចបន្ថែមថា ទាំងអស់នេះ គឺជាការចូលរួមជួយពីគ្រឹះស្ថានធនាគារ និងហិរញ្ញវត្ថុតាមការអំពាវនាវរបស់រាជរដ្ឋាភិបាល ដែលជាការចូលរួមចំណែកដ៏ធំមួយពីសំណាក់គ្រឹះស្ថានទាំងនោះ ។
លោកសុខ ចាន់ នាយកផ្នែកទំនាក់ទំនងនៃ សមាគមធនាគារនៅកម្ពុជា បានឱ្យដឹងថា រហូតមកដល់បច្ចុប្បន្ននេះ អតិថិជនដែលជួបប្រទះការលំបាកផ្នែកហិរញ្ញវត្ថុជាបណ្តោះអាសន្ន ក៏នៅតែអាចបន្តចរចា និងស្នើសុំការរៀបចំឥណទានឡើងវិញពីគ្រឹះស្ថានធនាគារ និងហិរញ្ញវត្ថុ ។
លោកបន្តថា ទោះជាយ៉ាងណាក៏ដោយ ការសម្រេចចិត្តចុងក្រោយលើការរៀបចំឥណទានឡើងវិញ វាអាស្រ័យលើការពិភាក្សាដោយផ្ទាល់រវាងគ្រឹះស្ថាន និងអតិថិជន ដោយគ្រឹះស្ថានធនាគារ និងហិរញ្ញវត្ថុតម្រូវឱ្យធ្វើការវាយតម្លៃលើលទ្ធភាពជាក់ស្តែងក្នុងការសងត្រឡប់ប្រាក់កម្ចីរបស់អតិថិជននីមួយៗ ។ បន្ថែមពីលើការវាយតម្លៃសំណើរបស់បុគ្គលម្នាក់ៗ គ្រឹះស្ថានធនាគារ និងហិរញ្ញវត្ថុត្រូវចាត់ថ្នាក់ឥណទានឱ្យបានត្រឹមត្រូវ និងស្របតាមប្រកាសស្តីពីការចាត់ថ្នាក់ហានិភ័យឥណទាន និងការកំណត់ប្រាក់បម្រុងសម្រាប់ឥណទានខូចគុណភាព។ ការជំរុញតាមរយៈបទប្បញ្ញត្តិនេះ មានគោលបំណងបង្កើនតម្លាភាព លើកកម្ពស់ការគ្រប់គ្រងហានិភ័យឥណទាន និងការពារស្ថិរភាពរួមនៃប្រព័ន្ធធនាគារកម្ពុជា ។
គួរបញ្ជាក់ថា ក្រោយមានការផ្ទុះអាវុធរវាងយោធាកម្ពុជា និងថៃអំឡុងខែកក្កដា ឆ្នាំ ២០២៥ ធនាគារជាតិនៃកម្ពុជាបានចេញសេចក្ដីណែនាំមួយដល់បណ្ដាគ្រឹះស្ថានធនាគារ និងហិរញ្ញវត្ថុស្ដីពីវិធានការជួយសម្រាលបន្តុកដល់ប្រជាពលរដ្ឋដែលរងផលប៉ះពាល់ពីជម្លោះព្រំដែនកម្ពុជា-ថៃ ដោយអំពាវនាវឱ្យគ្រឹះស្ថានធនាគារ និងហិរញ្ញវត្ថុអនុគ្រោះដល់អតិថិជនជាជនភៀសសឹក និងយោធិន ដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធ ៕
Account
Security
Favourite Content