សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ឆ្នាំង៖ ក្នុងជំនួបសំណេះសំណាលជាមួយប្រជាកសិករប្រមាណ ៣០០ នាក់ នៅស្រុកកំពង់ត្រឡាច ខេត្តកំពង់ឆ្នាំង នាថ្ងៃទី២៣ ខែកក្កដា ឆ្នាំ២០២៦ ឯកឧត្តមបណ្ឌិត កៅ ថាច អគ្គនាយក (ARDB) និងជាប្រធានសមាគមបណ្តាញកសិករតេជោ បានគូសបញ្ជាក់ថា៖ «ការខ្ចីប្រាក់ពីស្ថាប័នហិរញ្ញវត្ថុដើម្បីយកទៅវិនិយោគលើវិស័យកសិកម្មមិនមែនជារឿងខុសឆ្គងនោះឡើយ បើមានផែនការផលិត និងការគ្រប់គ្រងហានិភ័យ នោះនឹងធ្វើឱ្យកសិករយើងកាន់តែមានជីវភាពធូរធារ អាចរួចផុតពីអន្ទាក់បំណុល»។
ឯកឧត្តមបណ្ឌិត កៅ ថាច បានមានប្រសាសន៍ថា ទោះជាយ៉ាងណាគន្លឹះសំខាន់ដើម្បីឱ្យកសិករអាចបង្កើនជីវភាព និងចៀសផុតពី «អន្ទាក់បំណុល» គឺទាមទារឱ្យមានការគ្រប់គ្រងហានិភ័យបានល្អ និងមានផែនការផលិតកម្មច្បាស់លាស់ ហើយថ្នាក់ដឹកនាំរាជរដ្ឋាភិបាលមានបំណងចង់ឃើញប្រជាកសិករមានជីវភាពធូរធារមានប្រាក់ចំណូលកាន់តែប្រសើរ តាមរយៈការធ្វើកសិកម្មប្រកបដោយប្រសិទ្ធភាព មិនមែនការខ្ចីប្រាក់ដោយគ្មានផែនការនោះឡើយ។
ឯកឧត្តមបណ្ឌិត បានជំរុញឱ្យកសិករផ្លាស់ប្តូរផ្នត់គំនិត ពីការទម្លាប់ធ្វើកសិកម្មបែបប្រពៃណី មកអនុវត្តវិធីសាស្ត្រទំនើបជាកសិធុរកិច្ច (Agribusiness)ផ្អែកលើបច្ចេកទេស និងទីផ្សារ។ ការគ្រប់គ្រងថ្លៃដើម និងបញ្ជីស្នាម ត្រូវកត់ត្រារាល់ការចំណាយ និងទិន្នផលឱ្យបានហ្មត់ចត់ ដើម្បីគណនាប្រាក់ចំណេញឱ្យបានច្បាស់លាស់។
ជាមួយគ្នានេះ ការជ្រើសរើសពូជដែលមានគុណភាពខ្ពស់ ព្រមទាំងប្រើប្រាស់ជី និងថ្នាំកសិកម្មឱ្យត្រូវតាមបទដ្ឋានបច្ចេកទេស។ ការផលិតផ្អែកលើតម្រូវការទីផ្សារ ជាជាងផលិតតាមទម្លាប់ដែលប្រឈមនឹងការជន់ជោរផលិផល។
«កសិកម្មបច្ចុប្បន្ន មិនអាចពឹងផ្អែកលើបទពិសោធន៍ ឬទម្លាប់ចាស់តែមួយមុខបានទៀតទេ។ កសិករត្រូវមានចំណេះដឹង បច្ចេកវិទ្យា និងការគ្រប់គ្រងថ្លៃដើមផលិត ដើម្បីធានាបាននូវប្រាក់ចំណេញ»។ នេះបើតាមឯកឧត្តមបណ្ឌិត កៅ ថាច។
ឯកឧត្តមបណ្ឌិតបានរំលឹកជូនកសិករថា វិស័យកសិកម្មប្រឈមនឹងកត្តាជាច្រើន និងងាយរងគ្រោះខ្លាំងពីកត្តាខាងក្រៅ ដូចជា ការប្រែប្រួលអាកាសធាតុ គ្រោះរាំងស្ងួត ទឹកជំនន់ និងការបំផ្លាញពីសត្វល្អិត-ជំងឺផ្សេងៗ ដែលអាចបណ្តាលឱ្យខាតបង់ ប្រសិនបើមិនអនុវត្តទៅតាមបច្ចេកទេសត្រឹមត្រូវ។ ARDB និងសមាគមបណ្តាញកសិករតេជោ បានដាក់ចេញនូវដំណោះស្រាយគាំទ្ររួមមាន៖ធនាគារ ARDB បន្តផ្តល់កម្ចីគាំទ្រដល់ខ្សែច្រវាក់ផលិតកម្មកសិកម្មទាំងមូល រាប់ចាប់ពីការដាំដុះ ការចិញ្ចឹមសត្វ វារីវប្បកម្ម ការកែច្នៃផលិតផលកសិកម្ម និងអាជីវកម្មកសិ-ឧស្សាហកម្ម។
ទន្ទឹមនឹងនេះ ដើម្បីជាដំណោះស្រាយ ប្រជាពលរដ្ឋក៏អាចដាក់ប្រាក់សន្សំនៅ ARDB ប្រកបដោយសុវត្ថិភាព និងភាពជឿជាក់បំផុត ដើម្បីបង្កើតទម្លាប់ហិរញ្ញវត្ថុរឹងមាំ ព្រោះសព្វថ្ងៃនេះធនាគារក៏មានសេវាកម្ម ប្រើប្រាស់ប្រព័ន្ធឌីជីថលលឿនរហ័ស និងមានសុវត្ថិភាពតាមរយៈកម្មវិធី ARDB Mobile App មានមុខងារច្រើន ភ្ជាប់ផលិតផលកសិករទៅកាន់ទីផ្សារផ្ទាល់ ដើម្បីផ្តល់ភាពងាយស្រួលក្នុងការធ្វើប្រតិបត្តិការហិរញ្ញវត្ថុ និងការទូរទាត់ក្នុងអាជីវកម្មផងដែរ។
ហេតុដូច្នោះកសិករគួរផ្លាស់ប្តូរផ្នត់គំនិតក្នុងការធ្វើកសិកម្មដោយផ្តោតលើការគ្រប់គ្រងថ្លៃដើមផលិត ការកត់ត្រារាល់ការចំណាយ និងទិន្នផល ការជ្រើសរើសពូជដែលមានគុណភាព ការប្រើប្រាស់ជី និងថ្នាំកសិកម្មតាមបច្ចេកទេស ដើម្បីបង្កើនទិន្នផលទទួលបានប្រាក់ចំណេញ៕
Account
Security
Favourite Content