ភ្នំពេញ ៖ ចាប់តាំងពីការបង្កើតមក ធនាគារសហគ្រាសធុនតូច និងមធ្យម កម្ពុជា (ធនាគារ SME) បានបញ្ចេញប្រាក់កម្ចីជាង ៤៣២ លានដុល្លារ ដល់សហគ្រាសធុនតូច និងមធ្យមចំនួន ៣ ២៦០ ដើម្បីពង្រឹង និងពង្រីកអាជីវកម្ម អំឡុង និងក្រោយជំងឺរាតកូវីដ១៩។ នេះបើយោងតាមរបាយការណ៍របស់ធនាគារ SME។

ធនាគារ SME ត្រូវបានបង្កើតឡើងក្នុងខែកុម្ភៈ ឆ្នាំ ២០២០ ហើយផ្តល់ប្រាក់កម្ចីដោយផ្ទាល់ និងតាមរយៈគម្រោងសហហិរញ្ញប្បទានជាមួយគ្រឹះស្ថានហិរញ្ញវត្ថុចូលរួម (PFI) ចំនួន ៣៣ នាពេលបច្ចុប្បន្ន។ ដោយឡែក គិតត្រឹមថ្ងៃទី ២៧ ខែធ្នូ ក្នុងឆ្នាំ២០២២  ធនាគារ SME បានផ្តល់ប្រាក់កម្ចីដោយផ្ទាល់ចំនួន ៥១,៣១ លានដុល្លារដល់សហគ្រាសចំនួន ២២៧ ខណៈដែល ៣៨១ លានដុល្លារត្រូវបានផ្តល់តាមរយៈ PFIs ដល់អាជីវកម្មចំនួន ៣ ០៣៣ ។

ប្រាក់កម្ចីសរុបចំនួន ៤១ លានដុល្លារ ត្រូវបានផ្តល់ទៅឱ្យសហគ្រាសដែលទាក់ទងនឹងវិស័យទេសចរណ៍ចំនួន ២៨៨ ក្រោមគម្រោងសហហិរញ្ញប្បទានស្ដារទេសចរណ៍ (TRCS) ចំនួន ១៥០ លានដុល្លារ រហូតមកដល់បច្ចុប្បន្ន ចាប់តាំងពីប្រាក់កម្ចីបានចាប់ផ្តើមដំណើរការ កាលពីខែកក្កដា។

លើសពីនេះ រាជរដ្ឋាភិបាលកម្ពុជាតាមរយៈធនាគារ SME គ្រោងបញ្ចេញថវិកាប្រមាណ ១០០ លានបន្ថែមទៀតនៅឆ្នាំ ២០២៣ ខាងមុខននេះ ដើម្បីគាំទ្រដល់សហគ្រាសធុនតូច និងមធ្យម ក្នុងការទទួលបានទុនគ្រប់គ្រាន់ និងពង្រីកអាជីវកម្ម។​​ នេះបើយោងតាមការបញ្ជាក់របស់មន្រ្តីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ។      

ឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលធនាគារ SME បានបញ្ជាក់បែបនេះ អំឡុងពេលសន្និសីទសារព័ត៌មានស្តីពី

“ផ្សព្វផ្សាយ ជាសាធារណៈអំពីសមិទ្ធផលនៃការអនុវត្តគម្រោងសហិរញ្ញប្បទានទ្រទ្រង់សហគ្រាសធុនតូចនិងមធ្យម និងពិធីប្រគល់លិខិតថ្លែងអំណរគុណជូនគ្រឹះស្ថានហិរញ្ញវត្ថុចូលរួមកាលពីចុងឆ្នាំ២០២២ នេះ”

ឯកឧត្តមបានលើកឡើងថា ក្នុងករណី ដែលស្ថានភាពសេដ្ឋកិច្ចនៅបន្តជួបការលំបាក រាជរដ្ឋាភិបាលនឹងបន្តពិនិត្យលទ្ធភាពក្នុងបង្កើតគម្រោងសហហិរញ្ញប្បទានថ្មី ប៉ុន្តែសម្រាប់ឆ្នាំក្រោយទៀតនេះ យើងមានកម្មវិធីផ្តល់ជាកម្ចីផ្ទាល់ពីធនាគារ SME ដោយមិនឆ្លងតាមគ្រឹះស្ថានហិរញ្ញវត្ថុចូលរួម នៅក្នុងវិស័យអទិភាព ដូចជាកម្មវិធីពាក់ព័ន្ធជាមួយសហគ្រិនស្រ្តី, វិស័យអទិភាពដូចជា វិស័យកសិឧស្សាហកម្ម ការកែច្នៃជាដើម ក្នុងអត្រាការប្រាក់ទាបសម្រាប់ពួកគាត់ ហើយមានកម្មវិធីមួយទៀត សម្រាប់អាជីវកម្ម Start up។

ឯកឧត្តមបានឡើងដូច្នេះថា ៖

“សហគ្រាសធុនតូច និងមធ្យមនៅកម្ពុជា ភាគច្រើននៅតែមានតម្រូវការទុនច្រើនដើម្បីគាំទ្រ និងពង្រីកអាជីវកម្មរបស់ពួកគេ”

សូមរំលឹកផងដែរថា ធនាគារ SME បានទទួល​អាជ្ញាប័ណ្ណ​ផ្លូវការ​ជា​ធនាគារពាណិជ្ជ ពី​ធនាគារ​ជាតិ​នៃកម្ពុជា នៅថ្ងៃ​ទី២៧ ខែកុម្ភៈ​ ឆ្នាំ២០២០។ ធនាគារនេះគឺ​ស្ថិត​ក្រោមការ​គ្រប់​គ្រង​របស់​ក្រសួង​សេដ្ឋកិច្ច​ និ​ងហិរញ្ញវត្ថុ ដែលមានគោលបំណងចម្បងក្នុងការផ្ដល់​ជា​ហិរញ្ញប្បទាន​ដល់​សហគ្រាសធុន​តូច និង​មធ្យម (SME) នៅក្នុង​ស្រុក​។ ធនាគារមួយ​នេះ​មាន​បេសកម្មផ្ដល់​ជា​សេវាហិរញ្ញប្បទាន និង​សេវាកម្មធនាគារពាណិជ្ជប្រកប​ដោយ​ប្រសិទ្ធភាព និងនិរន្ដរភាព ក្នុ​ង​ភាព​ជា​ដៃគូសហការដ៏​ល្អ​ ដើម្បីបំពេញ​តម្រូវ​ការ​របស់​អាជីវករ បូក​រួម​ទាំង​ផ្ដល់​ការ​គាំទ្រ និង​ជា​ជំនួយ​ដល់​អាជីវកម្មធុនតូច និ​ងមធ្យមនៅក្នុង​ស្រុកទាំងអស់​ដើម្បី​បង្កើតពិពិធកម្មនៃសេវាកម្ម ក៏​ដូច​ជា​ពង្រឹងវិស័យ​នាំចេញ​នាំចូ​ល​៕