សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ និងធនាគារ ជីប ម៉ុង បានសហការគ្នាជួយទៅដល់សហគមន៍កសិកម្មទំនើបតាមរយៈការផ្តល់ទុនកម្ចីការប្រាក់ទាបសំដៅចូលរួមអភិវឌ្ឍកសិកម្មទំនើប និងលើកស្ទួយវិស័យកសិកម្មជាតិ ។
ធនាគារ ជីប ម៉ុង និងក្រសួងកសិកម្ម រុក្ខាប្រមាញ់ និងនេសាទ (MAFF) ថ្ងៃទី២៦ ខែសីហា ឆ្នាំ២០២៥ បានប្រកាសជាផ្លូវការនូវកិច្ចសហការជាយុទ្ធសាស្ត្រ តាមរយៈពិធីចុះហត្ថលេខាលើអនុស្សរណៈនៃការយោគយល់គ្នា ដើម្បីអភិវឌ្ឍសហគមន៍កសិកម្មទំនើប ក៏ដូចជាអភិវឌ្ឍសេដ្ឋកិច្ចជនបទ ដើម្បីឈានទៅដល់ការសម្រចគោលដៅអភិវឌ្ឍសេដ្ឋកិច្ចជាតិរបស់ប្រទេសកម្ពុជាឱ្យកាន់តែមានភាពឯករាជ្យ រឹងមាំ និងទទួលបាននិរន្តរ៍ភាព។
ឯកឧត្តម ឌិត ទីណា រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈនៃការយោគយល់គ្នាជាមួយធនាគារ ជីប ម៉ុង ខមមើសល ប៊ែង ម.ក ស្តីពីកិច្ចសហប្រតិបត្តិការភាពជាដៃគូរៀបចំកញ្ចប់ថវិកាសម្រាប់ផ្ដល់ទុនកម្ចីការប្រាក់ទាបជូនសហគមន៍កសិកម្មទំនើប កាលពីព្រឹកថ្ងៃទី២៦ ខែសីហា ឆ្នាំ២០២៥ នៅទីស្តីការក្រសួងកសិកម្ម។
ឯកឧត្តមរដ្ឋមន្ត្រី បានមានប្រសាសន៍ថា ៖
«ក្នុងបរិបទនៃបញ្ហាតម្លៃស្រូវបច្ចុប្បន្ន ការត្រៀមកញ្ចប់ទុនកម្ចីនេះនឹងជួយពុកម៉ែបងប្អូនប្រជាកសិករ ដែលបានរងផលប៉ះពាល់ផងដែរក្នុងការស្ដារឡើងវិញនៅរដូវក្រោយតាមរយៈការចូលរួមសហគមន៍កសិកម្មទំនើប ដើម្បីទទួលទុនកម្ចីដែលមានអត្រាការប្រាក់ទាបជាងការខ្ចីរៀងៗខ្លួននៅខាងក្រៅកន្លងមក។ ការចូលរួមអភិវឌ្ឍសហគមន៍កសិកម្មទំនើប នឹងជួយបង្កបង្កើនផលក្នុងសហគមន៍ ការប្រមូលទិញជី ថ្នាំ និងពូជរួមគ្នាដែលនឹងជួយកាត់បន្ថយចំណាយដើម»។
ឯកឧត្តមរដ្ឋមន្រ្តី បានថ្លែងអំណរគុណដ៏ជ្រាលជ្រៅចំពោះអ្នកឧកញ៉ា លាង ម៉េង អគ្គនាយកធនាគារ ជីប ម៉ុង សម្រាប់ការឈានចូលក្នុងវិស័យកសិកម្មតាមរយៈកិច្ចសហប្រតិបត្តិការនេះ ក៏ដូចជាការជួយប្រមូលទិញកសិផលកន្លងមក និងចំណាប់អារម្មណ៍ទៅមុខក្នុងការវិនិយោគលើការកែច្នៃកសិផលក្នុងស្រុក ដែលនឹងជួយលើកស្ទួយភាពប្រកួតប្រជែងក្នុងវិស័យកសិកម្មកម្ពុជា។
អ្នកឧកញ៉ា លាង ម៉េង អគ្គនាយក ធនាគារ ជីប ម៉ុង បានលើកឡើងថា ៖ កិច្ចសហការដ៏មានតម្លៃនេះ គឺជាជំហានថ្មីមួយដ៏សំខាន់សម្រាប់ធនាគារ ជីប ម៉ុង ក្នុងការចូលរួមលើកកម្ពស់វិស័យកសិកម្មជាតិឲ្យកាន់តែរីកចម្រើន ស្របទៅតាមទស្សនវិស័យរបស់ក្រសួងកសិកម្ម រុក្ខាប្រមាញ់ និងនេសាទ។
អ្នកឧកញ៉ា បានមានប្រសាសន៍បញ្ជាក់ថា ៖
«ធនាគារ ជីប ម៉ុង ជាធនាគារខ្មែរ ចង់ឃើញកសិកម្មនៅខ្មែរខ្លាំង និងរីកចម្រើន ដូច្នេះយើងខ្ញុំបានត្រៀមកញ្ចប់ប្រាក់បម្រុងទុកសម្រាប់គាំទ្រសហគមន៍កសិកម្មទំនើបដើម្បីបានទុនទាន់ពេល និងមានមន្រ្តីឥណទាននៅទូទាំង២៥ខេត្តក្រុង អាចជួយប្រឹក្សាឱ្យការប្រើប្រាស់កម្ចីចំគោលដៅ។ កម្ចីសម្រាប់សហគមន៍កសិកម្មទំនើបនេះ នឹងផ្តល់ជូនក្នុងអត្រាការប្រាក់៨%ក្នុងមួយឆ្នាំ និងមិនតម្រូវឱ្យមានទ្រព្យបញ្ចាំនោះទេ»។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ដែលជាហត្ថលេខីនៃអនុស្សរណៈនៃការយោគយល់គ្នានេះ បានមានប្រសាសន៍ថា៖ ការចូលរួមរបស់ធនាគារ ជីប ម៉ុង នៅពេលនេះ ជាការចូលរួមយ៉ាងសំខាន់ក្នុងវិស័យកសិកម្ម ជាពិសេសការគាំទ្រនូវសហគមន៍កសិកម្មទំនើប ដើម្បីអនុញ្ញាតឱ្យបងប្អូនប្រជាកសិករជាសមាជិក អាចមានដើមទុនកម្ចី ដែលមានការប្រាក់ទាប ដោយមិនត្រូវឱ្យមានវត្ថុបញ្ចាំ។
ឯកឧត្តមបានលើកឡើងថា៖ កន្លងមកការប្រាក់គឺជាឧបសគ្គមួយដែលធ្វើឱ្យថ្លៃដើមផលិតរបស់កសិករកើនខ្ពស់។ ឧទាហរណ៍ កសិករទៅទិញជី និងពូជ ដោយជំពាក់ក្នុងអត្រាការប្រាក់ថ្លៃ។ ដូច្នេះការអនុញ្ញាតឱ្យកសិករមានដើមទុនបង្វិលគ្រប់គ្រាន់ក្នុងអត្រាការប្រាក់ទាប ពិតជាបានជួយកាត់បន្ថយថ្លៃដើមដល់កសិករបានច្រើន និងអនុញ្ញាតឱ្យបងប្អូនកសិករ ជាពិសេសក្នុងពេលជួបការលំបាកដូចជាខាតបង់ដោយសារស្រូវធ្លាក់ថ្លៃ មានលទ្ធភាពស្តារការធ្វើកសិកម្មរបស់ពួកគាត់មកវិញប្រកបដោយទំនុកចិត្ត៕
Account
Security
Favourite Content