ក្រចេះ ៖ នៅថ្ងៃទី១៦ ខែកញ្ញា ឆ្នាំ២០២៤ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងគណៈប្រតិភូ បានអញ្ជើញចុះធ្វើទស្សនកិច្ចនៅតំបន់ពហុកសិកម្មស្នួល ដែលជាគម្រោងកសិកម្មដ៏ធំ និងទំនើបរបស់ THACO AGRI ក្នុងប្រទេសកម្ពុជា ក្រោមកិច្ចទទួលស្វាគមន៍ដោយ លោក Nguyen Ngoc Anh Tu – អគ្គនាយករងប្រចាំតំបន់ពហុកសិកម្មស្នួល រួមជាមួយថ្នាក់ដឹកនាំតំបន់ពហុកសិកម្មស្នួលជាច្រើននាក់។

ក្នុងដំណើរទស្សនកិច្ចនេះ គណៈប្រតិភូបានចុះមើលស្ថានភាពជាក់ស្តែងសកម្មភាពផលិតកម្ម និងអាជីវកម្មរបស់ THACO AGRI នៅតំបន់ពហុកសិកម្មស្នួល រួមមាន៖ រោងចក្រផលិតចេក BP1.B , តំបន់លំនៅដ្ឋានបុគ្គលិក កម្មករនិយោជិត, កសិដ្ឋានចិញ្ចឹមគោជាដើម។

ឯកឧត្តមនាយឧត្តមសេនីយ៍ សៅ សុខា បានសម្តែងការរីករាយ និងចាប់អារម្មណ៍ចំពោះលទ្ធផលដែល THACO AGRI សម្រេចបាននៅតំបន់ពហុកសិកម្មស្នួល។ គម្រោងនេះមិនត្រឹមតែលើកកម្ពស់ផលិតភាពកសិកម្មប៉ុណ្ណោះទេ ថែមទាំងរួមចំណែកយ៉ាងសំខាន់ដល់ការអភិវឌ្ឍន៍សេដ្ឋកិច្ច និងសង្គមក្នុងតំបន់ផងដែរ។ ជាពិសេស ឯកឧត្តម បានបញ្ជាក់អំពីសារៈសំខាន់លើការរស់នៅរបស់កម្មករនិយោជិត។

ឯកឧត្តមបានមានប្រសាសន៍ថា មូលដ្ឋានសម្រាប់ការសាងសង់ និងអភិវឌ្ឍន៍ប្រកបដោយនិរន្តរភាពគឺត្រូវយកចិត្តទុកដាក់នូវភារកិច្ចស្នូល និងអនុវត្តចំនួន ៧ចំណុចរួមមាន៖ ហូបចុក ស្លៀកពាក់ ស្នាក់នៅ សុខភាព អប់រំរៀនសូត្រ មធ្យោបាយធ្វើដំណើរ និងកម្សាន្តសប្បាយ។ ទាំងនេះក៏ជាកត្តាដែលក្រុមហ៊ុន THACO AGRI បាន និងកំពុងផ្តោតការយកចិត្តទុកដាក់លើការវិនិយោគនៅតំបន់ពហុកសិកម្មស្នួល។

បច្ចុប្បន្ននេះ តំបន់ពហុកសិកម្មស្នួលបានបង្កើតការងារមានស្ថិរភាពដល់បុគ្គលិក កម្មករនិយោជិតជាង ៥០០០នាក់។ ក្នុងនោះមានកម្មករខ្មែរចំនួន ៤៥០០នាក់។ ក្នុងគោលដៅនាំមកនូវការរស់នៅល្អបំផុតដល់និយោជិត តំបន់ពហុកសិកម្មស្នួលបានសាងសង់លំនៅដ្ឋានចំនួន ១៥៧០ បន្ទប់ ផ្តល់អាហារ ៣ ពេលដោយឥតគិតថ្លៃដល់កម្មករ បើកហាងលក់ទំនិញប្រើប្រាស់ចាំបាច់ មានផ្តល់ទំនិញប្រើប្រាស់សម្បូរបែបជាង ១០០០ មុខ ដើម្បីឱ្យកម្មករអាចទទួលបាននូវទំនិញដែលមានគុណភាពជាច្រើនប្រភេទ និងសេវាកម្មលក់ចល័ត។

ដោយឡែក ចំពោះវិស័យសុខភាព និងអប់រំ តំបន់ពហុកសិកម្មស្នួលតែងតែយកចិត្តទុកដាក់ខ្ពស់លើស្មារតី និងកាយសម្បទារបស់កម្មករ។ តំបន់ពុកសិកម្មស្នួលបានសាងសង់បន្ទប់ពិគ្រោះ និងពិនិត្យ តាមតំបន់លំនៅដ្ឋាននីមួយៗ ដើម្បីត្រៀមផ្តល់សេវាពិនិត្យ និងព្យាបាលឱ្យកម្មករនៅពេលចាំបាច់ ព្រមទាំងមានកម្មវិធីពិនិត្យសុខភាពប្រចាំឆ្នាំ ជាពិសេស ជួយត្រួតពិនិត្យស្ថានភាពជំងឺរបស់កម្មករភ្លាមៗប្រសិនបើមាន។

បច្ចុប្បន្ននេះ តំបន់ពហុកសិកម្មស្នួល បានបង្កើត​សាលារៀនបឋមសិក្សាចំនួន ៨ ថ្នាក់សម្រាប់សិស្សជាង ២៥០ នាក់ ជាមួយនឹងកម្មវិធីសិក្សាស្របតាមប្រព័ន្ធអប់រំកម្ពុជា ជួយឱ្យកូនៗរបស់បុគ្កលិក កម្មករ និយោជិតមានការអភិវឌ្ឍន៍យ៉ាងពេញលេញ បន្ថយបន្ទុកឪពុកម្តាយ។ ទន្ទឹមនឹងនោះ តំបន់ពហុកសិកម្មស្នួលក៏បានរៀបចំវគ្គបណ្ដុះបណ្ដាលបច្ចេកទេសជាប្រចាំសម្រាប់កម្មករដែលទើបជ្រើសរើសថ្មី និងវគ្គបណ្ដុះបណ្ដាលជំនាញពីការដាំដុះ និងការចិញ្ចឹមសត្វ សម្រាប់ក្រុមអ្នកបច្ចេកទេសដើម្បីជួយបង្កើនប្រសិទ្ធភាពផលិតកម្ម។ លើសពីនេះទៅទៀត តំបន់ពហុកសិកម្មស្នួលក៏មានរៀបចំរថយន្តដឹកជញ្ជូនកម្មករពីកន្លែងស្នាក់នៅទៅកន្លែងធ្វើការផងដែរ។ ជាមួយគ្នានេះ ដើម្បីធ្វើឱ្យជីវភាពរស់នៅរបស់កម្មករកាន់តែមានន័យ តំបន់ពហុកសិកម្មស្នួលក៏បានរៀបចំការប្រកួតកីឡា និង​សកម្មភាព​វប្បធម៌សម្រាប់បុគ្គលិក កម្មករបន្ទាប់ពីសម្រាកការងារ បង្កើតបរិយាកាសរស់នៅក្នុងសហគមន៍ដ៏រីករាយ ពង្រឹងការទំនាក់ទំនង និងប្រាស្រ័យទាក់ទងគ្នា។

យោងតាមយុទ្ធសាស្ត្រអភិវឌ្ឍន៍ THACO AGRI នឹងបន្តជំរុញការវិនិយោគលើវិស័យកសិកម្មនៅភាគឦសាននៃព្រះរាជាណាចក្រកម្ពុជា ហើយដើម្បី​បំពេញ​តម្រូវការ​ និងពង្រីក​ផលិតកម្ម​អាជីវកម្ម តំបន់ពហុកសិកម្មស្នួលត្រូវការ​ជ្រើសរើស​បុគ្គលិក កម្មករ ​និយោជិតចំនួន ៣៥០០​នាក់បន្ថែមទៀត​។ ជារួម ដំណើរទស្សនកិច្ចរបស់ ឯកឧត្តមនាយឧត្តមសេនីយ៍ សៅ សុខា បានបញ្ជាក់ពីកិច្ចសហប្រតិបត្តិការវាងសហគ្រាស និងរាជរដ្ឋាភិបាលកម្ពុជាក្នុងវិស័យកសិកម្ម។ THACO AGRI បានចូលរួមចំណែកយ៉ាងសំខាន់ក្នុងការកសាង និងអភិវឌ្ឍន៍កសិកម្មទំនើប និងនិរន្តរភាពនៅប្រទេសកម្ពុជា៕