សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការយកចិត្តទុកដាក់គិតគូរអំពីការលើកស្ទួយជីវភាពមន្ត្រីរាជការ ជាមូលដ្ឋានគ្រឹះដើម្បីកសាងមនសិការមន្ត្រីរាជការស៊ីវិលល្អ រឹងមាំ វាងវៃ ឆ្លាតវៃ និងជាកម្លាំងចលករសម្រាប់បម្រើប្រទេសជាតិ និងប្រជាជន ។ នេះជាការថ្លែងរបស់ឯកឧត្តម សាយ សំអាល់ នៅក្នុងវគ្គ បណ្ដុះបណ្ដាលស្ដីពីសមិទ្ធផលនិងទិសដៅការងារសំណង់ កាលពីថ្ងៃទី ២៦ សីហា ២០២៥ នៅទីស្ដីការក្រសួង ក្រសួងរៀបចំដែនដី នគរូបនីយកម្ម និងសំណង់ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ដើម្បីអនុវត្តការងារដោយរលូនក្រៅពីផែនទីឯកភាពការងារ ទិសដៅនិងគោលនយោបាយហើយនោះ គឺត្រូវគិតគូរអំពីជីវភាពមន្ត្រី ហើយក៏ត្រូវកសាងសង្គម រៀបចំដែនដី នគរូបនីយកម្ម និងសំណង់ ឱ្យមានមនោសញ្ចេតនាច្រើន,ចេះគោរពស្រឡាញ់រាប់អានពឹងពាក់គ្នាទៅវិញទៅមក ។
ឯកឧត្តមឧបនាយករដ្ឋមន្ត្រី បានគូសបញ្ជាក់ថា ៖ ឈរលើគោលការណ៍គិតគូរអំពីជីវភាពមន្ត្រី ក្រសួងរៀបចំដែនដី នគរូបនីយកម្ម និងសំណង់ នឹងសហការជាមួយធនាគារអេស៊ីលីដា ក្នុងការផ្ដល់អត្រាការប្រាក់ទាបដល់មន្ត្រី។ ដោយឡែក ចំពោះមន្ត្រីដែលមានជីវភាពលំបាក ក្រសួងនឹងផ្ដល់ប្រាក់រង្វាន់ទ្វេដងដើម្បីជួយសម្រួលជីវភាព ហើយក្រៅពីផ្ដល់ជូនថ្លៃសម្រាលកូន ថ្លៃចាក់វ៉ាក់សាំងដល់ទារកហើយនោះក្រសួងនឹងផ្ដល់ជូនថ្លៃទឹកដោះគោបន្ថែមសម្រាប់ទារកជាកូនរបស់មន្ត្រីក្នុងរយៈពេលមួយឆ្នាំ ដោយឡែក មន្ត្រីដែលមានកូនដល់ ៥នាក់ ក្រសួងនឹងផ្តល់ជូនប្រាក់រង្វាន់បន្ថែមទៀត ។
ឯកឧត្តមឧបនាយករដ្ឋមន្ត្រី យល់ឃើញថា អ្វីដែលជាផែនទីឯកភាពការងាររបស់ក្រសួង និងភូមិសាស្ត្រនយោបាយរបស់គណបក្សប្រជាជនកម្ពុជាដើម្បីឱ្យដំណើរការទៅមុខដោយរលូននោះ គឺធនធានមន្ត្រី ដូច្នេះ ឯកឧត្តមចង់ឃើញមន្រ្តីរាជការនៃក្រសួងរៀបចំដែនដី នគរូបនីយកម្ម និងសំណង់ ក្នុងអាណត្តិទី៧ នេះមានជីវភាពធូរធារ មានកាយសម្បទាមាំមួន មានចរិយាមារយាទល្អ មានភាពស្មោះត្រង់ ចេះយកអាសារគ្នាទៅវិញទៅមក ដែលនោះគឺជាមូលដ្ឋានគ្រឹះក្នុងការកសាងក្រសួងកាន់តែមានភាពរីកចម្រើនទៅថ្ងៃអនាគត។ ឯកឧត្តមឧបនាយករដ្ឋមន្ត្រី ក៏បានសង្កត់ធ្ងន់ថា ជីវភាពមន្ត្រីគឺជាមូលដ្ឋានគ្រឹះដើម្បីកសាងមនសិការមន្ត្រីរាជការស៊ីវិលល្អ រឹងមាំ វាងវៃនិងឆ្លាតវៃ ជាកម្លាំងចលករសម្រាប់បម្រើប្រទេសជាតិនិងប្រជាជន។
នាឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានថ្លែងអំណរគុណដល់ឯកឧត្តម ថេង ចន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដែលតែងតែបានរៀបចំវគ្គបណ្ដុះបណ្ដាលដល់យុវជនរបស់ក្រសួងជាប់ជាប្រចាំ ដែលនេះមិនមែនជាការងារសាមញ្ញពេកទេ ដើម្បីជំរុញណែនាំដល់យុវជនឱ្យមានការគិតគូរស្រដៀងគ្នា និងនាំមកនូវការឯកភាពជាតិរួមគ្នា។
ឯកឧត្តមឧបនាយករដ្ឋមន្ត្រី បានបញ្ជាក់ថាការដឹកនាំស្ថាប័នគឺត្រូវធ្វើទៅតាមគំនិតរួមរបស់សង្គមជាតិ ហើយឯកឧត្តមបានបណ្ដុះផ្នត់គំនិតដល់យុវជនក៏ដូចជាមន្ត្រីក្រោមឱវាទក្រសួង ក្នុងការកសាងសំណង់ផ្សេងៗត្រូវចេះគិតគូរអំពីការសាងសង់បន្ទប់ទឹកឱ្យបានត្រឹមត្រូវ ត្រូវគិតអំពីសង្គម គិតពីគុណតម្លៃ គិតពីអរិយធម៌,ភាពអៀនខ្មាស់,ទំនៀមទម្លាប់នោះទើបសង្គមក្លាយជាភូមិឋានក្សេមក្សាន្តបាន ៕
Account
Security
Favourite Content