សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អគារការិយាល័យនៅក្នុងរាជធានីភ្នំពេញប្រមាណជា ៣៦ភាគរយ នៅទំនេរ និងកំពុងត្រូវការអតិថិជនដើម្បីមកជួល ខណៈអ្នកជំនាញវិស័យអចលនទ្រព្យនៅកម្ពុជាបានលើកឡើងថា ទីផ្សារមួយនេះ នៅតែពឹងផ្អែកលើវិនិយោគិនបរទេស ក្នុងពេលវិនិយោគិន និងធុរជនក្នុងស្រុកមានអត្រាតិចតួចដែលប្រើប្រាស់ការិយាល័យស្តង់ដារនៅតាមអគារនានា ។
កញ្ញា សុខ ហេងពេជ្រមុន្នី ប្រធានផ្នែកសេវាកម្មលក់រាយនៃក្រុមហ៊ុនអចលនទ្រព្យ APS បានថ្លែងប្រាប់បណ្ដាញព័ត៌មាន AMS ឱ្យដឹងថា រហូតមកដល់បច្ចុប្បន្ននេះ អគារិយាល័យស្តង់ដារនៅក្នុងរាជធានីភ្នំពេញ ប្រើប្រាស់មិនទាន់អស់ទេ ដោយនៅមានទំនេរច្រើន ដោយសារតែក្នុងរយៈពេលប៉ុន្មានឆ្នាំមកនេះ ការវិនិយោគលើអគារការិយាល័យក្នុងរាជធានីភ្នំពេញមានកំណើនឡើងខ្ពស់ ហើយតម្រូវការនៃការប្រើប្រាស់មានកំណើនតិចតួច ។
កញ្ញាបន្តថា វិនិយោគិន ឬធុរជនក្នុងស្រុកមួយចំនួនធំនៅបន្តប្រើប្រាស់ផ្ទះល្វែង ផ្ទះវីឡា ឬផ្ទះពាណិជ្ជកម្មធ្វើជាការិយាល័យក្រុមហ៊ុន ឬស្នាក់ការរបស់ខ្លួន ពីព្រោះផ្ទះល្វែង ផ្ទះវីឡា ឬផ្ទះពាណិជ្ជកម្ម អាចឱ្យពួកគេប្រើប្រាស់ពហុមុខងារ ដូចជាប្រើប្រាស់ជាកន្លែងសម្រាប់បុគ្គលិកស្នាក់នៅផង និងជាកន្លែងបំពេញការងារផង ។ សម្រាប់ការិយាល័យស្តង់ដារដូចជានៅតាមអគារខ្ពស់ៗក្នុងរាជធានីភ្នំពេញ មានការគ្រប់គ្រងតឹងរឹងពីម្ចាស់អគារ ដោយកំណត់ម៉ោងចេញចូល និងកំណត់ការប្រើប្រាស់ថាមពលជាដើម ខុសពីផ្ទះល្វែង ផ្ទះវីឡា អាចចេញចូលម៉ោងណាក៏បាន មិនមានការរឹតបន្តឹងពីម្ចាស់ផ្ទះនោះទេ ។
កញ្ញាបន្ថែមថា ៖
«បច្ចុប្បន្ន ការិយាល័យកម្រិត B និង C មានតម្រូវការ និងប្រើប្រាស់ច្រើនជាងគេ ព្រោះវាមានតម្លៃសមរម្យ ខណៈការិយាល័យកម្រិត A មានតែក្រុមហ៊ុនធំៗមកពីក្រៅប្រទេស ឬក្រុមហ៊ុនក្នុងស្រុកធំៗដែលមានចំនួនតិចតួចកំពុងប្រើប្រាស់»។
លោក ចេង វុទ្ធី អគ្គនាយកក្រុមហ៊ុនអចលនទ្រព្យ INVA Real Estate បានលើកឡើងថា អគារការិយាល័យស្តង់ដារនៅកម្ពុជាដែលស្ថិតក្នុងអគារខ្ពស់ៗ តាំងពីមុនរហូតមកដល់បច្ចុប្បន្ននេះ នៅតែបន្តឹងពឹងលើបរទេស ព្រោះបរទេសគេមានទម្លាប់ប្រើប្រាស់អគារបែបនេះយូរមកហើយតាំងពីនៅប្រទេសគេម្ល៉េះ ។ ងាកមកកម្ពុជា សហគ្រិន ឬអ្នកដែលទើបចាប់ផ្ដើមអាជីវកម្ម នៅតែបន្តប្រើប្រាស់ការិយាល័យតាមផ្ទះល្វែង ផ្ទះវីឡា ដែលស្រដៀងគ្នានឹងទម្លាប់ការរស់នៅរបស់ពលរដ្ឋខ្មែរ គឺចូលចិត្តរស់នៅផ្ទះជាប់ដីជាងរស់នៅក្នុងអគារសហកម្មសិទ្ធិ ឬខុនដូ ។
លោកបន្តថា ៖
«ក្នុងរយៈពេលប៉ុន្មានឆ្នាំមកនេះ ដោយសារវិនិយោគិនលើសហគ្រាសធុនតូច និងមធ្យម មកពីខាងក្រៅប្រទេស ហាក់នៅមានចំនួនតិចតួច ដូច្នេះហើយទើបមើលឃើញថា ការប្រើប្រាស់ការិយាល័យស្តង់ដារនៅសល់ទំនេរច្រើន ដែលត្រូវការឱ្យម្ចាស់កែប្រែការិយាល័យទាំងនោះ ដើម្បីប្រើប្រាស់ទីតាំងនោះរកប្រភពចំណូលបន្ថែម»។
យោងតាមរបាយការណ៍របស់ក្រុមហ៊ុន APS បានឱ្យដឹងថា គិតត្រឹមឆមាសទី១ ឆ្នាំ២០២៦ ការផ្គត់ផ្គង់អគារិយាល័យនៅលើទីផ្សារក្នុងរាជធានីភ្នំពេញ មានទំហំសរុប ១,២លានម៉ែត្រការ៉េ ដោយមានអ្នកប្រើប្រាស់បច្ចុប្បន្នត្រឹមតែ ៦៤ភាគរយប៉ុណ្ណោះ ។ តាមរបាយការណ៍ដដែលបានបង្ហាញថា តម្លៃនៃអគារការិយាល័យគិតជាមធ្យមសម្រាប់កម្រិត A ស្ថិតនៅចន្លោះ ២០ ទៅ ២៥ដុល្លារអាម៉េរិកក្នុងមួយម៉ែត្រការ៉េ, កម្រិត B មានតម្លៃចន្លោះពី ១៥ ទៅ ២០ដុល្លារក្នុងមួយម៉ែត្រការ៉េ និងកម្រិត C មានតម្លៃចន្លោះពី ១០ ទៅ ១៥ដុល្លារអាម៉េរិកក្នុងម៉ែត្រការ៉េ ៕
Account
Security
Favourite Content