សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ក្នុងគោលបំណងការពារអាយុជីវិតមនុស្សជាអាទិភាពខ្ពស់ រួមជាមួយនឹងទ្រព្យសម្បត្តិផ្សេងៗពីហានិភ័យនៃគ្រោះអគ្គីភ័យនៅតាមសំណង់អាគារផ្សេងៗជាយថាហេតុ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំពិភាក្សាជាមួយវិស័យឯកជនដែលពាក់ព័ន្ធនឹងវិស័យសំណង់ រួមជាមួយមន្រ្តីនៃគណៈស្ថាបត្យករកម្ពុជា ដើម្បីប្រមូលធាតុចូល និងចេញជាគោលការណ៍ណែនាំពីសុវត្ថិភាពអគ្គីភ័យលើវិស័យសំណង់អគារ។
ឯកឧត្តម ហង្ស សុតសំភារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការនៃគណៈស្ថាបត្យករកម្ពុជា បានមានប្រសាសន៍ប្រាប់ AMS Economy ថា អគ្គីភ័យ គឺជាហានិភ័យសាធារណៈដ៏ធ្ងន់ធ្ងរ ដែលប៉ះពាល់ដោយផ្ទាល់ដល់អាយុជីវិតប្រជាពលរដ្ឋ ទ្រព្យសម្បត្តិ សុវត្ថិភាពសង្គម និងស្ថិរភាពសេដ្ឋកិច្ច។
ឯកឧត្តមបន្តថា ក្នុងបរិបទដែលព្រះរាជាណាចក្រកម្ពុជាកំពុងរីកចម្រើនយ៉ាងឆាប់រហ័សក្នុងវិស័យសំណង់ និងនគរូបនីយកម្ម ការគ្រប់គ្រងហានិភ័យអគ្គីភ័យលើសំណង់ បានក្លាយជាគោលការណ៍ណែនាំដែលត្រូវការភាពច្បាស់លាស់ អាចអនុវត្តបានក្នុងក្របខណ្ឌទូទាំងប្រទេសឱ្យមានប្រសិទ្ធភាព។
ឯកឧត្តមរដ្ឋលេខាធិការបានសង្កត់ធ្ងន់ថា ៖
«គោលការណ៍ណែនាំនេះ ត្រូវបានរៀបចំឡើងដើម្បីទប់ស្កាត់ បង្ការ ការពារ និងការគ្រប់គ្រងគ្រោះអគ្គីភ័យលើសំណង់គ្រប់ប្រភេទ ទាំងសំណង់ខ្ពស់ និងសំណង់ជាន់ផ្ទាល់ដី។ គោលការណ៍ណែនាំនេះ បានកំណត់តួនាទី និងភារកិច្ចរបស់ស្ថាប័នពាក់ព័ន្ធយ៉ាងច្បាស់ ព្រមទាំងតម្រូវការបទដ្ឋានបច្ចេកទេសសំខាន់ៗ សម្រាប់ការរចនា ការសិក្សាគម្រោងប្លង់ ការសាងសង់ និងការត្រួតពិនិត្យ»។
ដោយឡែក នៅក្នុងកិច្ចប្រជុំកាលពីថ្ងៃដើមសប្ដាហ៍កន្លងទៅនេះ រួមមានខ្លឹមសារស្នូលសំខាន់ៗដែលផ្តោតលើ៥ចំណុច ៖ ទី១- កិច្ចការពារជីវិតមនុស្សជាអាទិភាពខ្ពស់ និងហានិភ័យផ្សេងៗ, ទី២- ការលើកកម្ពស់គុណភាព និងសុវត្ថិភាពសំណង់ ស្របតាមច្បាប់ បទប្បញ្ញត្តិ និងស្តង់ដាជាតិ-អន្តរជាតិ, ទី៣- ពង្រឹងសមត្ថភាពការត្រួតពិនិត្យ និងការអនុវត្តច្បាប់ និងបទដ្ឋានបច្ចេកទេស, ទី៤- ការត្រៀមខ្លួន និងការឆ្លើយតបឱ្យមានប្រសិទ្ធភាពក្នុងស្ថានភាពបន្ទាន់ និងទី៥- ការកសាងសមត្ថភាព និងការចូលរួមយ៉ាងសកម្មពីស្ថាប័នរដ្ឋ វិស័យឯកជន សហគមន៍ ដៃគូរអភិវឌ្ឍ និងសង្គមទូទៅ។
ការអនុវត្តគោលការណ៍ណែនាំនេះនឹងរួមចំណែកយ៉ាងសំខាន់ក្នុងការកាត់បន្ថយហានិភ័យអគ្គីភ័យ ការពារជីវិត និងទ្រព្យសម្បត្តិ បង្កើនសុវត្ថិភាពសាធារណៈ និងលើកកម្ពស់ភាពជឿជាក់លើវិស័យសំណង់ ជាពិសេស ស្របតាមទិសដៅអភិវឌ្ឍជាតិប្រកបដោយចីរភាពកម្ពុជាឆ្នាំ២០៣០។
សូមជម្រាបថា ក្នុងរយៈពេល១១ខែ ឆ្នាំ២០២៥កន្លងទៅនេះ គ្រោះអគ្គីភ័យបានកើតឡើងជាង ៧០០ លើក នៅទូទាំងប្រទេស ដែលបណ្តាលឱ្យមានមនុស្សស្លាប់ និងរបួសជាង ៧០នាក់ បំផ្លាញផ្ទះសម្បែងជាង ៦៧០ខ្នង ព្រមទាំងទ្រព្យសម្បត្តិមួយចំនួនទៀត៕
Account
Security
Favourite Content