សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានជំរុញឱ្យសិក្សា រៀបចំរាជធានីភ្នំពេញ ឱ្យកាន់តែទំនើប មានភាពស៊ីវិល័យ និងកាន់តែមានសោភ័ណភាព ប្រកបដោយភាពទាក់ទាញ ដោយមានបញ្ចូលការប្រើប្រាស់បច្ចេកវិទ្យាថ្មីៗ ដែលមានលក្ខណៈទំនើប វៃឆ្លាត និងសន្សំសំចៃខ្ពស់ ។
សម្ដេចធិបតី ហ៊ុន ម៉ាណែត បានមានប្រសាសន៍ថា អាជ្ញាធរពាក់ព័ន្ធត្រូវរៀបចំនូវហេដ្ឋារចនាសម្ព័ន្ធរូបវ័ន្តក្នុងរាជធានីភ្នំពេញ ដូចជាការបំពាក់កាំមេរ៉ាសុវត្ថិភាព អំពូលសូឡា និងប្រព័ន្ធស្រោចស្រពស្វ័យប្រវត្តិនៅតាមសួនច្បារសាធារណៈ ដើម្បីឱ្យទីក្រុងភ្នំពេញកាន់តែមានភាពទាក់ទាញ ប្រណីត និងស័ក្តិសមជាទីក្រុងឆ្លាតវៃ ។
សម្ដេចក៏បានជំរុញឱ្យរដ្ឋបាលសាលារាជធានីភ្នំពេញ ដាំដុះដើមឈើបន្ថែមដើម្បីបង្កើតបៃតង កាត់បន្ថយកម្ដៅ និងឧស្ម័នផ្ទះកញ្ចក់ ជាពិសេសនៅតំបន់ដែលមានការដ្ឋាន និងតំបន់ដែលត្រូវស្ថាបនាហេដ្ឋារចនាសម្ព័ន្ធថ្មី ដូចករណីដែលធ្លាប់បានធ្វើកន្លងមកហើយនូវការដាំដើមឈើបន្ថែមនៅតំបន់គល់ស្ពានជ្រោយចង្វាត្រើយខាងលិច គម្រោងស្ពានអាកាសមរតកតេជោជាដើម ។ រដ្ឋបាលរាជធានីភ្នំពេញក៏ត្រូវខិតខំជំរុញការអនុវត្តផែនការវិនិយោគហេដ្ឋារចនាសម្ព័ន្ធ ដូចជាប្រព័ន្ធលូ និងប្រព័ន្ធរំដោះទឹកសម្រាប់ការបញ្ចៀសការជន់លិចដោយជំនន់ទឹកភ្លៀងនៅតំបន់មួយចំនួនក្នុងភូមិសាស្ត្ររាជធានីភ្នំពេញ សំដៅធ្វើយ៉ាងណាឱ្យទីក្រុងភ្នំពេញកាន់តែមានភាពធន់ទៅនឹងការប្រែប្រួលអាកាសធាតុ ។
សម្ដេចធិបតី ក៏បានជំរុញឱ្យមន្ត្រីគិតគូររៀបចំ និងអនុវត្តន៍ឱ្យបានតឹងរ៉ឹងចំពោះគម្រោងផែនការដែលបានដាក់ចេញ ដូចជារៀបចំសេវារថយន្តសាធារណៈតភ្ជាប់ពីតំបន់មួយទៅតំបន់មួយ ។ រាល់គម្រោងបុរី នៅក្នុងរាជធានីភ្នំពេញ ត្រូវទុកដីសម្រាប់រៀបចំសួនច្បារ ហេដ្ឋារចនាសម្ព័ន្ធក្នុងបុរីឱ្យបានធំទូលាយ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានជំរុញឱ្យអាជ្ញាធរថ្នាក់ក្រោមជាតិ ជាពិសេសរដ្ឋបាលខេត្តក្រុង រៀបចំទីក្រុង ដោយមិនមែនតែទីក្រុងភ្នំពេញនោះទេ ដែលក្នុងនោះរួមមានដូចជាការរៀបចំឱ្យមានផ្លូវថ្នើរជើងនៅក្នុងទីក្រុងដើម្បីជំរុញឱ្យពលរដ្ឋដើរបានច្រើន រៀបចំសួនច្បារសម្រាប់ពលរដ្ឋអាចហាត់ប្រាណនៅពេលព្រឹក និងពេលល្ងាច សំដៅដល់ការលើកកម្ពស់សុខុមាលភាពប្រជាពលរដ្ឋរស់នៅក្នុងទីក្រុង ។
សូមបញ្ជាក់ដែរថា បច្ចុប្បន្ន រដ្ឋបាលរាជធានីភ្នំពេញ កំពុងអភិវឌ្ឍន៍ផ្លូវថ្មើរជើង និងផ្សាររាត្រីចំនួនពីរតំបន់នៅកណ្ដាលក្រុងភ្នំពេញ ដើម្បីជំរុញឱ្យពលរដ្ឋបានដើរច្រើនជាងមុន ទាក់ទាញភ្ញៀវទេសចរ ជាតិ – អន្តរជាតិបន្ថែមទៀត មកទស្សនា និងដើរកម្សាន្តនៅក្នុងរាជធានីភ្នំពេញ ។ គម្រោងនេះ នឹងត្រូវពន្លឿនឱ្យបានរួចរាល់នៅមុនដំណាច់ឆ្នាំ២០២៤ខាងមុខនេះ ៕
Account
Security
Favourite Content