ភ្នំពេញ ៖ កម្ចីពីមីក្រូហិរញ្ញវត្ថុតែងតែចូលរួមលើកកម្ពស់ជីវភាពគ្រួសារប្រជាពលរដ្ឋតាមរយៈការផ្តល់ដើមទុនដើម្បីពង្រីកមុខរបររកស៊ី និងជួយបង្កើនប្រាក់ចំណូល ហើយកម្ចីពីមីក្រូហិរញ្ញវត្ថុនេះទៀតសោត ក៏ជាប្រភពទុនដ៏សំខាន់សម្រាប់អាជីវកម្ម និងសិប្បកម្ម ក្នុងការពង្រីកខ្លួនឱ្យកាន់តែធំជាងមុន និងជួយបង្កើនប្រាក់ចំណូលផងដែរ។

អ្នកស្រី លន សុខលីម ម្ចាស់សិប្បកម្មកាត់ដេរសំលៀកបំពាក់ខ្នាតតូច ដែលស្ថិតនៅភូមិលេខ៣ ស្រុកស្វាយរលំ ខេត្តកណ្តាល បានរៀបរាប់ថា ដំបូងឡើយ អ្នកស្រីគឺជាកម្មការនីរោងចក្រ ប៉ុន្តែក្រោយពេលអ្នកស្រីមានផ្ទៃពោះមិនអាចធ្វើការនៅរោងចក្របាននោះ អ្នកស្រីបានសម្រេចចិត្តដាក់ម៉ាស៊ីនដេរចំនួន ១ នៅផ្ទះ ដើម្បីប្រកបរបរតិចតួចជាលក្ខណៈគ្រួសារនៅផ្ទះ។

អ្នកស្រីបានឱ្យដឹងទៀតថា អាជីវកម្មខ្នាតតូចមួយនេះបានចាប់ផ្តើមតាំងពីឆ្នាំ២០១៦ ដែលគិតរហូតមកដល់ពេលបច្ចុប្បន្នមានរយៈពេលជាង ៧ ឆ្នាំហើយ ។ ការពង្រីកអាជីវកម្មដោយផ្តើមចេញពីម៉ាស៊ីនដេរចំនួន១ បង្កើនរហូតដល់ចំនួន ៦គ្រឿង ក្លាយជាសិប្បកម្មខ្នាតតូចនៅក្នុងតំបន់ គឺមានប្រតិបត្តិការទទួលកាត់ដេរខោអាវចំនួនត្រឹមតែ ៤ ទៅ ១០ ឡូតិ៍ប៉ុណ្ណោះជាមួយដើមទុន ៥០០ ដុល្លារអាមេរិក ប៉ុន្តែបច្ចុប្បន្ន អ្នកស្រីមានម៉ាស៊ីនដេររហូតចំនួន ៣០ និងមានបុគ្គលិកដែលជាជាងដេរចំនួន ១០ នាក់។

អ្នកស្រីបានលើកឡើងថា ដោយសារមានបញ្ហាថវិកាសម្រាប់ពង្រីកអាជីវកម្ម ណាមួយផ្ទះក៏មានសភាពទ្រុឌទ្រោម អ្នកស្រីចាប់ផ្តើមពិភាក្សាជាមួយគ្រួសារ ដើម្បីស្វែងរកទុនបន្ថែម ហើយសម្រេចចិត្តប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុមួយ ដើម្បីជួសជុលផ្ទះ ហើយនៅសល់ទុនបន្តិចបន្តួចទៀតទុកសម្រាប់ពង្រីកអាជីវកម្ម។

អ្នកស្រី សុខលីម បានបញ្ជាក់ថា ៖

«នៅពេលដែលខ្ញុំទទួលបានប្រាក់ចំណូលពីសិប្បកម្ម ខ្ញុំតែងតែចាត់ចែងថវិកាសម្រាប់បង់ទូទាត់ទៅកាន់គ្រឹះស្ថានមីក្រូហិរញ្ញវត្ថុជាមុន បន្ទាប់មកខ្ញុំចាប់បែងចែកទៅលើការចំណាយអាទិភាពបន្ទាប់ទៀត ដូចជា ថ្លៃទឹក ភ្លើង ការសិក្សារបស់កូន ហើយខ្ញុំក៏មិនភ្លេចនោះទេក្នុងការចាត់ចែងមួយចំណែកសម្រាប់សន្សំសម្រាប់គ្រាអាសន្ន»។

ជាចុងក្រោយ អ្នកស្រី លន សុខលីម បានលើកឡើងយ៉ាងខ្លីថា មុនសម្រេចប្រើប្រាស់កម្ចី គឺប្រើប្រាស់កម្ចីនោះឱ្យចំគោល ដើម្បីកុំឱ្យវាទៅជាបំណុលអាក្រក់។

លោក​ជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានថ្លែងថា វិស័យហិរញ្ញវត្ថុ ពិតជាដើរតួនាទីយ៉ាងសំខាន់ចំពោះសេដ្ឋកិច្ច និងសង្គមជាតិ តាមរយៈការផ្តល់លទ្ធភាពទទួលបានហិរញ្ញវត្ថុដល់ប្រជាពលរដ្ឋគ្រប់ស្រទាប់ និងអាជីវកម្មតូចធំគ្រប់ប្រភេទ។ ក្នុងរយៈ​ពេល​ប៉ុន្មានទសវត្យរ៍​ចុងក្រោយនេះ វិស័យនេះបានក្លាយជាកម្លាំងចលករដ៏សំខាន់មួយក្នុងការចូលរួម​ចំណែកដល់ការជួយជំរុញសេដ្ឋកិច្ចកម្ពុជាឱ្យមានកំណើនជាបន្តបន្ទាប់។

លោកជំទាវបានថ្លែងបន្តថា ៖

«ទោះជាយ៉ាងណា ស្របពេលដែលបរិបទសេដ្ឋកិច្ច និងសង្គមប្រែប្រួល យើងត្រូវរួមគ្នាកសាងធនធានមនុស្សតាមរយៈការបញ្ជ្រាបចំណេះដឹងផ្នែកហិរញ្ញវត្ថុដល់ប្រជាពលរដ្ឋទៅតាមភាពចំាបាច់ និងលទ្ធភាពដែលយើងម្នាក់ៗអាចធ្វើបាន។ សមាគមមីក្រូហិរញ្ញវត្ថុកម្ពុជា រួមជាមួយគ្រឹះស្ថានដែលជាសមាជិក ដោយមានការគាំទ្រពីធនាគារជាតិនៃកម្ពុជា បាន និងកំពុងអនុវត្តគម្រោង កម្មវិធី និងសកម្មភាពជាច្រើន ដើម្បីពង្រឹងវិស័យធនាគារ និងហិរញ្ញវត្ថុឱ្យរីកចម្រើនប្រកបដោយចីរភាព»។

យោងតាមរបាយការណ៍របស់សមាគមមីក្រូហិរញ្ញវត្ថុកម្ពុជា មកទល់បច្ចុប្បន្ន ពលរដ្ឋកម្ពុជា ប្រមាណ ១លាន ៥សែននាក់​កំពុងប្រើប្រាស់ឥណទានរបស់គ្រឹះស្ថានមីក្រូហិរញ្ញវត្ថុ ក្នុងទំហំប្រាក់ប្រមាណ ៥.១ ប៊ីលានដុល្លារ គិតត្រឹមត្រីមាសទី២ ឆ្នាំ២០២៤។  ចំណែកការដាក់ប្រាក់បញ្ញើនៅតាមបណ្តាគ្រឹះស្ថានមីក្រូហិរញ្ញវត្ថុវិញ គិតត្រឹមត្រីមាសទី២ ឆ្នាំ២០២៤ ចំនួនអតិថិជនដែលបានដាក់បញ្ញើ មានប្រមាណជាង​ ១.៩៩លាននាក់ ជាមួយទំហំទឹកប្រាក់ជាង ២.២១ពាន់លានដុល្លារ បើធៀបទៅនឹងត្រីមាសទី១នៃឆ្នាំនេះ មានការកើនឡើងប្រមាណ១%៕