ភ្នំពេញ៖ ប្រទេសកម្ពុជាកំពុងបង្កើនល្បឿនក្នុងការកសាងបរិស្ថានឌីជីថលដែលមានសុវត្ថិភាព និងទំនុកចិត្តខ្ពស់ ដើម្បីរៀបចំគ្រឹះឱ្យបានរឹងមាំសម្រាប់សេដ្ឋកិច្ចឌីជីថល។ តាមរយៈការរៀបចំកម្មវិធី «មន្ទីរពិសោធន៍ទំនុកចិត្តទិន្ន​ន័យ​​កម្ពុជា» ដែលជាព្រឹត្តិការណ៍ទី២នៃយុទ្ធនាការ «អនុភាពបច្ចេកវិទ្យាខ្មែរ» ដើម្បីជួបជុំភាគីពាក់ព័ន្ធសំខាន់​ៗ ឈានទៅលុបបំបាត់គម្លាតរវាងអ្នករៀបចំគោលនយោបាយ និងការអនុវត្តជាក់ស្តែង ក្នុងគោលដៅបង្កើនទំនុកចិត្តជូនប្រជាពលរដ្ឋ ម្ចាស់អាជីវកម្ម និងវិនិយោគិន។

ព្រឹត្តិការណ៍នៃកម្មវិធី មន្ទីរពិសោធន៍ទំនុកចិត្តទិន្នន័យកម្ពុជា Cambodia Data Trust Lab បានផ្តោតលើសកម្ម​ភាពជាក់ស្តែង ដោយបែងចែកជា ២ផ្នែក គឺការប្រកាសបង្ហាញរបស់អ្នកជំនាញ និងកិច្ចពិភាក្សានៅលើឆាកក្នុងបន្ទប់ធំ ព្រមទាំងសិក្ខាសា​លាបច្ចេកទេសអនុវត្តជាក់ស្តែង ដែលដឹកនាំដោយក្រុមហ៊ុនចំនួន ៣ រួមមាន ៖ ទី១-Tech​no​vage Solution ផ្តោតលើភាពធន់នៃប្រព័ន្ធសាយប័រ, ទី២-DataU Academy បង្ហាញពីការត្រៀមឱ្យរួចរាល់ក្នុងការប្រើប្រាស់ទិន្នន័យ និងទី៣- ក្រុមហ៊ុន Daun Penh Cloud ផ្តោតលើការផ្លាស់ប្តូររបៀបនៃការប្រើប្រាស់ប្រព័ន្ធក្លោដ ។

ឯកឧត្តមបណ្ឌិត សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន ក្រ​សួង​ប្រៃសណីយ៍ និងទូរគមនាគមន៍ បានថ្លែងថា មិនមែនគ្រាន់តែជាព្រឹត្តិការណ៍បច្ចេកវិទ្យាសុទ្ធសាធនោះទេ វាគឺជាកិច្ចពិភាក្សាដើម្បីកសាងសេដ្ឋកិច្ចឌីជីថលមួយ ដែលប្រជាពលរដ្ឋទុកចិត្តលើបច្ចេកវិទ្យា អាជីវកម្មទុកចិត្តលើប្រព័ន្ធឌីជីថល និងវិនិយោគិនទុកចិត្តលើកម្ពុជា ព្រោះនៅទីបញ្ចប់ ការរៀបចំលើការផ្លាស់ប្តូរឌីជីថលមិនមែនត្រឹមតែអំពីបច្ចេកវិទ្យានោះទេ ប៉ុន្តែវាគឺជា “ទំនុកចិត្ត” ជាចម្បង។ ការទទួលខុសត្រូវ គឺហួសពីការពង្រីក និងការតភ្ជាប់ ប៉ុន្តែក៏ត្រូវតែជួយបង្កើតបរិស្ថានមួយដែលបច្ចេកវិទ្យាឌីជីថលអាចយកមកប្រើប្រាស់ដោយសុវត្ថិភាព ដោយមានការទទួលខុសត្រូវ និងទំនុកចិត្ត។ ដូច្នេះ ប្រទេសកម្ពុជាកំពុងជំរុញធាតុផ្សំសំខាន់ៗនៃក្របខ័ណ្ឌទំនុកចិត្តឌីជីថលរបស់ខ្លួនជាបណ្តើរៗ។

ឯកឧត្តមបណ្ឌិត បានគូសបញ្ជាក់ថា៖

« យើងកំពុងបញ្ចប់ច្បាប់សន្តិសុខតាមអ៊ីនធឺណិត ច្បាប់ការពារទិន្នន័យផ្ទាល់ខ្លួន គោលនយោបាយគ្រប់គ្រងទិន្នន័យ និងគោលនយោបាយការងារលើពពក ដោយមានការរំពឹងទុកថា លិខិតបទដ្ឋានគតិយុត្តសំខាន់ៗទាំងនេះនឹងត្រូវបានចេញផ្សាយជាផ្លូវការនៅចុងឆ្នាំនេះ ឬដើមឆ្នាំខាងមុខ»។

សូមជ្រាបថា បច្ចុប្បន្ន កម្ពុជាកំពុងឈានជើងយ៉ាងលឿនទៅកាន់ដំណាក់កាលថ្មីមួយនៃការអភិវឌ្ឍឌីជីថល។ បច្ចេកវិទ្យាឌីជីថល កំពុងត្រូវបានធ្វើបរិយាបន្ន និងតភ្ជាប់យ៉ាងស៊ីជម្រៅទៅក្នុងវិស័យធនាគារ និងហិរញ្ញវត្ថុ ប្រតិបត្តិការអាជីវកម្ម សេវាសាធារណៈ និងជីវភាពរស់នៅប្រចាំថ្ងៃរបស់ប្រជាជន។ ហេដ្ឋារចនាសម្ព័ន្ធឌីជីថលរបស់កម្ពុជាកំពុងពង្រីកខ្លួន អាជីវកម្មនានាកំពុងធ្វើទំនើបកម្ម ហើយការគ្រប់គ្រងសេវាសាធារណៈក៏កំពុងប្រែក្លាយទៅជាឌីជីថលជាបន្តបន្ទាប់។

តាមរយៈបណ្ឌិត្យសភាបច្ចេកវិទ្យាឌីជីថលកម្ពុជា (CADT) មន្ត្រីរាជរដ្ឋាភិបាលប្រមាណ ២៥ ០០០នាក់ ត្រូវបានបណ្តុះបណ្តាលលើផ្នែកអក្ខរកម្មឌីជីថល និងជំនាញឌីជីថលចាំបាច់នានា រួមទាំង AI សន្តិសុខសាយប័រ និងជំនាញផ្សេងៗទៀត។ ជាមួយគ្នានេះ កម្មវិធី “Go Digital Cambodia” ដែលជាប៉ុស្តិ៍ផ្តល់ការយល់ដឹងផ្នែកឌីជីថល បានទាក់ទាញអ្នកគាំទ្រ (Followers/Subscribers) រហូតដល់ប្រមាណ ប្រាំសែន (៥០០ ០០០) នាក់។

សមិទ្ធផលទាំងនេះ ឯកឧត្តមបណ្ឌិត សំ សិទ្ធិសេរី បានកត់សម្គាល់ថា នេះទើបតែជាចំណុចចាប់ផ្តើមប៉ុណ្ណោះ ប៉ុន្តែវាគឺជាការលើកទឹកចិត្តដ៏ធំធេង ។ ការរៀបចំឱ្យមានការផ្លាស់ប្តូរឌីជីថលរបស់កម្ពុជា មិនមែនវាស់វែងត្រឹមតែចំនួនមនុស្សដែលបានភ្ជាប់បណ្តាញនោះទេ ប៉ុន្តែគួរតែវាស់វែងលើកម្រិតសុវត្ថិភាព ភាពជឿជាក់ និងផលិតភាពដែលប្រជាជនទទួលបានពីការភ្ជាប់ទំនាក់ទំនង នោះហើយជាយុទ្ធនាការ “Powered by Cambodia” ដែលជាគំនិតផ្តួចផ្តើមដ៏ល្អ និងនិរន្តរភាព៕