សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ក្រុមហ៊ុន Samsung Electronics គ្រោងបោះទុនវិនិយោគ ១,៥ ពាន់លានដុល្លារ ដើម្បីសាងសង់រោងចក្រតេស្តបន្ទះឈីបពាក់កណ្តាលចម្លង (semiconductor) មួយនៅក្នុងប្រទេសវៀតណាម ក្នុងគោលបំណងសម្រួលដល់ការខ្វះខាតបន្ទះឈីបអង្គចងចាំជាសកល។ នេះបើយោងតាមការរាយការណ៍ពីរ៉យទ័រ។
យោងទៅតាមឯកសារដែលបានស្នើរទៅអាជ្ញាធរ បានឱ្យដឹងដា វានឹងក្លាយជារោងចក្រសាកល្បងបន្ទះឈីបដំបូងរបស់ Samsung នៅប្រទេសវៀតណាម។ រោងចក្រថ្មីនេះចាប់ផ្តើមដំណើរការសាងសង់រួចហើយនៅក្នុងសួនឧស្សាហកម្មនៃខេត្តថៃង្វៀន ដែលមានចម្ងាយ ៦០ គីឡូម៉ែត្រភាគខាងជើងនៃទីក្រុងហាណូយ ហើយគ្រោងនឹងចាប់ផ្តើមប្រតិបត្តិការនៅក្នុងខែវិច្ឆិកា ឆ្នាំ ២០២៧។
រោងចក្រនេះនឹងផ្តោតលើការផលិតបន្ទះឈីបជំនាន់មុនប្រភេទ DRAM និង NAND។ ទោះបីឈីបជំនាន់មុនមិនសូវសំខាន់សម្រាប់ខ្សែសង្វាក់ផ្គត់ផ្គង់បច្ចេកវិទ្យា AI ក្តី ប៉ុន្តែវាក៏ស្ថិតក្នុងការខ្វះខាតខ្លាំងផងដែរ ដោយសារអ្នកផលិតធំៗលះបង់សមត្ថភាពផលិតរបស់វា និង បង្វែរទៅពង្រីកសមត្ថភាពផលិតបន្ទះឈីប AI។ រោងចក្រថ្មីនេះនឹងមានសមត្ថភាពផលិតប្រចាំឆ្នាំក្នុងការផ្គត់ផ្គង់ឈីបប្រភេទ DRAM ចំនួន ១៥៣,៣ ពាន់លានហ្គីហ្គាប៊ីត និងឈីបប្រភទេ NAND ២៥៥,៦ ពាន់លានហ្គីហ្គាប៊ីត។
គម្រោងវិនិយោគនេះត្រូវបានអនុម័តដោយអាជ្ញាធរវៀតណាមកាលពីខែមីនា ហើយក្រុមហ៊ុន Samsung មានបំណងនឹងយកប្រាក់ចំណេញដែលទទួលបានពីគម្រោងនេះ (ប្រសិនបើមាន) រហូតដល់ទៅប្រហែល ២,៥ ពាន់លានដុល្លារទៅវិនិយោគសាងសង់រោងចក្រទីពីរមួយទៀតនាពេលអនាគត។ ទោះបីជាយ៉ាងណាក៏ដោយ គេទាន់មិនទាន់ច្បាស់នៅឡើយទេថា តើរោងចក្រទីមួយនេះទទួលបានលិខិតអនុញ្ញាតចាំបាច់ទាំងអស់ហើយឬនៅ ខណៈដែលការចរចាជាមួយអាជ្ញាធរកំពុងតែបន្តនៅឡើយ។
បុគ្គលិក និងវិស្វកររបស់ Samsung ជាង ២០០ នាក់កំពុងធ្វើការនៅការដ្ឋានគម្រោងនេះចាប់តាំងពីខែមេសាមកម្ល៉េះ។ ជាទូទៅ នៅក្នុងប្រទេសវៀតណាម ក្រុមហ៊ុននានាតែងតែចាប់ផ្តើមដំណើរការឈូសឆាយ និងរៀបចំគ្រឹះដីសាងសង់ជាបណ្តើរៗ ក្នុងអំឡុងពេលដែលពួកគេកំពុងរង់ចាំលិខិតអនុញ្ញាតផ្នែកបរិស្ថាន។
យ៉ាងណាមិញ Samsung គឺជាអ្នកវិនិយោគបរទេសធំជាងគេនៅក្នុងប្រទេសវៀតណាមរួចហើយ ដោយមានបានបោះទុនវិនិយោគសរុបជាង ២៣ ពាន់លានដុល្លារអស់រយៈពេលជាច្រើនទសវត្សរ៍មកហើយទៅលើរោងចក្រជាច្រើន។ មិនត្រឹមតែប៉ុណ្ណោះ រោងចក្រថ្មីដែលកំពុងបានសាងសង់នេះស្ថិតនៅជាប់កន្លែងយដែលក្រុមហ៊ុន Samsung Electronics ផលិតស្មាតហ្វូន និងថេប្លេត។
ទន្ទឹមនឹងនេះ វៀតណាមក៏ជាតួអង្គសំខាន់មួយនៅក្នុងឧស្សាហកម្មដំឡើង និងកែច្នៃបន្ទះឈីបសកលផងដែរ ដែលប្រើប្រាស់កម្លាំងពលកម្មច្រើន និងបច្ចេកវិទ្យាមិនសូវស្មុគស្មាញខ្លាំង បើធៀបនឹងការផលិតបន្ទះឈីបពីដើមទី។ វៀតណាមគឺជាកន្លែងដំឡើង វិចខ្ចប់ និងសាកល្បងរបស់ក្រុមហ៊ុនបច្ចេកវិទ្យាធំៗជាច្រើនរួមមាន ក្រុមហ៊ុន Intel, Amkor Technology និង Hana Micron ជាដើម៕
Account
Security
Favourite Content