សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជា បានអនុម័តជាគោលការណ៍លើកម្មវិធីសាកល្បងលើកលែងទិដ្ឋាការ (Visa Exemption Pilot Program) សម្រាប់ភ្ញៀវទេសចរចិនរយៈពេល ៤ ខែ ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦។
គម្រោងសាកល្បងលើកលែងទិដ្ឋាការសម្រាប់ភ្ញៀវទេសចរចិន ក្រសួងទេសចរណ៍ បានដាក់ឱ្យដំណើរការជាផ្លូវការនូវយុទ្ធនាការ «ទស្សនាកម្ពុជា នារដូវកាលបៃតង» ចាប់ពីខែឧសភា ដល់ខែតុលា ដែលជារដូវកាលដ៏ពិសេសសម្រាប់ភ្ញៀវទេសចរក្នុងការទទួលយកបទពិសោធន៍ថ្មីៗ និងស្វែងយល់ពីសម្រស់ធម្មជាតិ និងវប្បធម៌កម្ពុជាពីទស្សនវិស័យថ្មី ដោយមានកញ្ចប់ផ្សព្វផ្សាយពិសេសស្របតាមយុទ្ធនាការ ៦ គួរ រួមមាន៖ គួរចង់ឃើញ , គួរស្នាក់នៅ, គួរភ្លក្ស , គួរទស្សនា, គួរសាកល្បង , គួរទិញ។
លោកជំទាវ ហ៊ុន ដានី អ្នកនាំពាក្យក្រសួងទេសចរណ៍ បានប្រាប់ AMS Economy ថា៖ «ដើម្បីអនុវត្តគម្រោងលើកលែងទិដ្ឋាការសម្រាប់ភ្ញៀវទេសចរចិននេះឱ្យបានជោគជ័យ គឺឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានធ្វើកិច្ចការងារនេះតាមរយៈកិច្ចសហប្រតិបត្តិការជាមួយគ្រប់ផ្នែក និងគ្រប់ភាគីពាក់ព័ន្ធទាំងអស់ សំដៅធ្វើយ៉ាងណាឱ្យការអនុវត្តនេះប្រកបដោយគុណភាព ប្រសិទ្ធភាព។ ពោល គឺដើម្បីទាក់ទាញភ្ញៀវទេសចរចិនឱ្យមកកម្សាន្តនៅកម្ពុជា កាន់តែច្រើនឡើងតាមរយៈការអនុវត្តគម្រោងសាកល្បងនេះ។
លោកជំទាវបានបន្តថា៖
«ទាំងសេវាកម្ម ទាំងសម្បទាទេសចរណ៍ រួមទាំងការធ្វើដំណើរនៅតាមច្រកទ្វារអន្តរជាតិផងដែរ គឺកម្ពុជាបានត្រៀមរួចរាល់នៅក្នុងការរង់ចាំទទួលស្វាគមន៍ភ្ញៀវទេសចរចិនដែលមកពីគោលដៅណាក៏បានដែរ សំខាន់គឺឱ្យតែគាត់កាន់លិខិតឆ្លងដែនប្រភេទ PRC គឺកម្ពុជារង់ចាំស្វាគមន៍ដោយភាពកក់ក្តៅបំផុត»។
លោកជំទាវបន្ថែមថា គម្រោងសាកល្បងនេះ នឹងទទួលបានជោគជ័យក្រោមកិច្ចខិតខំប្រឹងប្រែងពីគ្រប់ភាគីពាក់ព័ន្ធទាំងអស់ ជាពិសេសគឺឯកឧត្តមរដ្ឋមន្ត្រី បានធ្វើការផ្សព្វផ្សាយដោយផ្ទាល់ផងដែរនៅឯប្រទេសចិនតាមរយៈព្រឹត្តិការណ៍ទេសចរណ៍ ហើយនៅក្នុងព្រះរាជាណាចក្រកម្ពុជា ក្រសួងទេសចរណ៍ក៏បានសហការជាមួយស្ថានទូតចិននៅក្នុងការផ្សព្វផ្សាយពីគម្រោងសាកល្បងនេះឱ្យបានទូលំទូលាយដល់ប្រជាពលរដ្ឋចិនបានជ្រាប
សូមជម្រាបថា ជាមួយនិងការខិតខំប្រឹងប្រែងនៅក្នុងគម្រោងនេះ ក្រសួងទេសចរណ៍សង្ឃឹមថា ការអនុវត្តវិធីសាស្ត្រនេះនឹងទទួលបានជោគជ័យ ប៉ុន្តែជោគជ័យកម្រិតណា ឬក៏ទទួលបានភ្ញៀវទេសចរចិននៅក្នុងចំនួនណានោះ នៅមិនទាន់អាចសន្មត់បាននោះទេ ដោយសារតែបច្ចុប្បន្ននេះ ពិភពលោកកំពុងតែស្ថិតនៅក្នុងស្ថានភាពមួយដ៏លំបាក ប្រឈមនឹងកត្តាវិបត្តិសេដ្ឋកិច្ច កត្តាការប្រកួតប្រជែងខាងភូមិសាស្ត្រនយោបាយ ក៏ដូចជាសង្គ្រាមនៅមជ្ឈិមបូព៌ាផងដែរ ដែលទាំងនេះជា អាចជាឧបសគ្គ ឬក៏ជាបញ្ហាប្រឈមខាងក្រៅ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA)ប្រចាំកម្ពុជា បានប្រាប់ ASM Economy ថា ៖ ការធ្វើយុទ្ធនាការលើកលែងទិដ្ឋាការសម្រាប់ទេសចរចិន វាមិនមែនគ្រាន់តែជាគោលនយោបាយនោះទេ ប៉ុន្តែជាការផ្សព្វផ្សាយ និងត្រូវការការចូលរួមទើបវាទទួលបានផលជោគជ័យ។
លោកបញ្ជាក់ថា ៖
«តែកាលណាបើយើងគ្រាន់តែមានគោលនយោបាយ យើងខ្វះការផ្សព្វផ្សាយ ឬក៏យើងផ្សព្វផ្សាយវាមិនបានដល់ ទោះមានគោលនយោបាយដ៏ល្អយ៉ាងណា ក៏វានឹងមិនបានផ្តល់ផលទៅតាមការចង់បានរបស់យើងដែរ ជាពិសេសនៅក្នុងសម័យកាលដែលមានការប្រកួតប្រជែង»។
លោកថា សម័យកាលនេះ វាស្ថិតនៅក្នុងសម័យកាលដែលពិភពលោកមិនមានភាពច្បាស់លាស់។ ការដែលពិភពលោកមិនមានភាពច្បាស់លាស់ ការធ្វើទីផ្សារទេសចរណ៍មានតម្រូវការខ្ពស់ណាស់ ហើយវាក៏ត្រូវការការប្រកួតប្រជែងខ្ពស់ដេរ។ ដូច្នេះ បើត្រូវការការប្រកួតប្រជែងខ្ពស់ និងចង់បានផលចេញពីគោលនយោបាយ ទាល់តែខិតខំប្រឹងប្រែងឱ្យបានខ្លាំងក្លា។
លោក ហ៊ុយ ឈិន ជាប្រតិបត្តិករទេសចរណ៍ បានលើកឡើងថា ៖ ការលើកលែងទិដ្ឋាការសម្រាប់ជនជាតិចិន លោកគិតថាជាវិធីសាស្ត្រល្អ។ នេះជាការផ្សព្វផ្សាយឱ្យជនជាតិចិនបានដឹង ហើយលោករំពឹងថា ទេសចរចិននឹងមកទស្សនាកម្ពុជាបន្ថែមទៀត។
សូមបញ្ចាក់ថា នៅក្នុងកម្មវិធី Cambodia Travel Match 2026 Mini-Series ដើម្បីជំរុញការផ្សព្វផ្សាយ និងជំរុញទេសចរណ៍កម្ពុជាទៅកាន់ពិភពលោក កាលពីថ្ងៃទី២៧ ខែឧសភា ឯកឧត្តម ហួត ហាក់ រដ្ឋមន្ត្រីទេសចរណ៍ បានលើកឡើងថា ៖ តាមរយៈយុទ្ធនាការរយៈពេល ៤ខែនេះ កម្ពុជា រំពឹងទុកថាអាចទាក់ទាញភ្ញៀវទេសចរចិនបន្ថែមឱ្យបានចំនួនយ៉ាងហោចណាស់ ៥០ម៉ឺននាក់ ដែលរាជរដ្ឋាភិបាល និងវិស័យឯកជនកម្ពុជាបានត្រៀមខ្លួនរួចរាល់ក្នុងការត្រៀមទទួលភ្ញៀវទេសចរ ។
ឯកឧត្តម បានបញ្ជាក់ថា ៖
«នេះជាការសម្រេចចិត្តជាប្រវត្តិសាស្ត្រសម្រាប់វិស័យទេសចរណ៍កម្ពុជា និងជាឱកាសដ៏សំខាន់សម្រាប់ប្រតិបត្តិករទេសចរណ៍ក្នុងការផ្សព្វផ្សាយ និងទាក់ទាញភ្ញៀវទេសចរបន្ថែមមកកម្ពុជា»។
យ៉ាងណាក៏ដោយ បើទោះជាមានភាពមិនច្បាស់លាស់នៅលើស្ថានការណ៍សេដ្ឋកិច្ច និងភូមិសាស្ត្រនយោបាយសកល រួមទាំងតំបន់ក្នុងឆ្នាំ២០២៥ ក៏ដោយ កម្ពុជានៅតែទទួលបានភ្ញៀវទេសចរអន្តរជាតិប្រមាណ ៥,៦ លាននាក់ ដែលបង្ហាញពីកំណើនប្រកបដោយគុណភាពនៃវិស័យទេសចរណ៍កម្ពុជា។ ដោយឡែក ក្នុងរយៈពេល ៤ ខែដំបូងនៃឆ្នាំ២០២៦ កម្ពុជា ទទួលបានភ្ញៀវទេសចរអន្តរជាតិជាង ១,៣ លាននាក់ ក្នុងនោះ ភ្ញៀវទេសចរចិនមានជាង ៣៣០ ០០០ នាក់ ឈរនៅលំដាប់ទី១ បន្ទាប់មកភ្ញៀវទេសចរវៀតណាម ប្រមាណ ៣១២ ០០០ នាក់ ឈរនៅលំដាប់ទី២ និងភ្ញៀវទេសចរមីយ៉ាន់ម៉ាជាង ១០ ០០០ នាក់៕
Account
Security
Favourite Content