សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ថ្មីៗនេះ មានរបាយការណ៍ជាច្រើនបានលើកឡើងដូចគ្នាថា រដ្ឋាភិបាលក្រុងវ៉ាស៊ិនតោនបានឈានដល់កិច្ចព្រមព្រៀងព្រាងមួយដែលនឹងអនុញ្ញាតឱ្យប្រទេសអារ៉ាប៊ីសាអូឌីត អាចអភិវឌ្ឍកម្មវិធីនុយក្លេអ៊ែរដោយផ្ទាល់ខ្លួន ព្រមទាំងចម្រាញ់សារធាតុអ៊ុយរ៉ានីញ៉ូមនៅក្នុងស្រុកទៀតផង។
កាសែត RT បានដកស្រង់ចេញពីបណ្តាញទូរទស្សន៍ CNN និងប្រភពដែលជិតស្និទ្ធផ្សេងទៀតពាក់ព័ន្ធទៅនឹងកិច្ចចរចាថា កិច្ចព្រមព្រៀងនេះត្រូវបានរៀបចំរួចរាល់ហើយ ដោយបច្ចុប្បន្នកំពុងរង់ចាំការចុះហត្ថលេខាពីប្រធានាធិបតីអាមេរិក Donald Trump ប៉ុណ្ណោះ។ អ្វីដែលគួរឱ្យកត់សម្គាល់ កិច្ចព្រមព្រៀងដែលបានស្នើឡើងនេះ មិនតម្រូវឱ្យអារ៉ាប៊ីសាអូឌីតអនុវត្តតាមស្តង់ដាបន្ថែម (Additional Protocol) ដែលជាកាតព្វកិច្ចតម្រូវរបស់ទីភ្នាក់ងារថាមពលបរមាណូអន្តរជាតិ (IAEA) នោះទេ។
Additional Protocol គឺជាក្របខ័ណ្ឌការពារកម្រិតខ្ពស់ក្នុងការផ្តល់សិទ្ធិយ៉ាងទូលាយដល់ក្រុមការងារអធិការកិច្ច ដើម្បីចូលពិនិត្យមើលទីតាំងនានា សំដៅទប់ស្កាត់ និងស្វែងរកសកម្មភាពនុយក្លេអ៊ែរដែលមិនបានប្រកាសជាសាធារណៈ។
ប្រភពដដែលបានកត់សម្គាល់ដែរថា តាមរយៈការអនុញ្ញាតឱ្យមានសកម្មភាពចម្រាញ់អ៊ុយរ៉ានីញ៉ូមនៅក្នុងស្រុកមួយនេះ វានឹងក្លាយទៅជាកិច្ចព្រមព្រៀងដែលផ្តល់ឱ្យទីក្រុងរីយ៉ាដ(Riyadh) នូវលទ្ធភាពទទួលបានបច្ចេកវិទ្យាចម្រាញ់អ៊ុយរ៉ានីញ៉ូមដូចគ្នាទៅនឹងបច្ចេកវិទ្យាដែលតែងតែចោទដាក់គ្នារវាងលោកខាងលិច និងអ៊ីរ៉ង់ អស់រយៈពេលជាច្រើនទសវត្សរ៍មកហើយនោះ។
យ៉ាងណាក៏ដោយ បើទោះបីជាមានការរិះគន់ពីក្រុមអ្នកជំនាញខាងគ្រប់គ្រងអាវុធក្តី ប៉ុន្តែអារ៉ាប៊ីសាអូឌីតបានអះអាងថា ក្នុងនាមជាប្រទេសហត្ថលេខីនៃសន្ធិសញ្ញាមិនរីកសាយភាយអាវុធនុយក្លេអ៊ែរ Nuclear Non-Proliferation Treaty (NPT) ខ្លួនមានសិទ្ធិគ្រប់គ្រាន់ក្នុងការចម្រាញ់អ៊ុយរ៉ានីញ៉ូម ដើម្បីធ្វើពិពិធកម្មប្រភពថាមពលក្នុងស្រុក និងផ្គត់ផ្គង់គម្រោងបន្សុទ្ធទឹកសមុទ្រ រួមទាំងការរក្សាទុកប្រេងឆៅបន្ថែមទៀតសម្រាប់ការនាំចេញទៅក្រៅប្រទេស។
ដោយឡែក ក្រុមអ្នករិះគន់បានលើកឡើងថា បើទោះជាយ៉ាងណាក៏ដោយ ការរំលងមិនអនុវត្តស្តង់ដា (Additional Protocol)ដ៏តឹងរ៉ឹងរបស់ IAEA នឹងអាចធ្វើឱ្យស្តង់ដាររមិនរីកសាយភាយអាវុធនៅក្នុងតំបន់មានភាពទន់ខ្សោយ និងអាចជំរុញឱ្យប្រទេសដទៃទៀតនៅមជ្ឈិមបូព៌ាទាមទារការសម្បទានផ្នែកនុយក្លេអ៊ែរស្រដៀងគ្នានេះកើនឡើងជាមិនខាន៕
Account
Security
Favourite Content