សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សង្គមបច្ចុប្បន្នកាន់តែរីកចម្រើន រីឯរបស់ប្រើប្រាស់ក៏កាន់តែសម្បូរបែប និងគ្រប់តាមតម្រូវការ។ វត្តមាននៃសម្ភារៈទំនើបៗបានទាក់ទាញចិត្តអ្នកប្រើប្រាស់ឲ្យចំណាយប្រាក់យ៉ាងច្រើនសន្ធឹកសន្ធាប់ ដើម្បីបានរបស់នោះមកប្រើប្រាស់។
យ៉ាងណាក៏ដោយ ភាពទំនោរទៅលើសម្ភារៈនិយមនេះក៏មិនទាស់ខុសនោះដែរ អ្វីដែលសំខាន់គឺស្ថិតនៅត្រង់លទ្ធភាពជាក់ស្ដែងរបស់បុគ្គលម្នាក់ៗទៅវិញទេ។ នេះបើតាមការលើកឡើងរបស់កញ្ញា លឹម ឆរិកា និពន្ធនាយិកានៃស្ថាប័នកាក់សេន នាឱកាសចែករំលែកចំណេះដឹងផ្នែកហិរញ្ញវត្ថុកាលពីពេលកន្លងទៅ។
កញ្ញាបានបន្តឱ្យដឹងទៀតថា មនុស្សច្បាស់ជាមានការចង់បាន ហើយជីវិតរស់នៅប្រចាំថ្ងៃគឺមានតម្រូវការមិនអាចខ្វះបានទេ ប៉ុន្តែយើងត្រូវថ្លឹងថ្លែងមើលវិញអំពីស្ថានភាពហិរញ្ញវត្ថុខ្លួនឯងប្រចាំថ្ងៃជាមុនសិន។
កញ្ញាបន្តសង្កត់ធ្ងន់ថា យុវវ័យ ច្រើនតែជាវ័យដែលងាយរងឥទ្ធិពលពីសង្គម ពោលគឺនៅពេលដែលពួកគេឃើញអ្នកនៅជុំវិញខ្លួនប្រើប្រាស់សម្ភារៈទំនើបៗ ជាហេតុធ្វើឱ្យរូបគេក៏ចង់មានរបស់ទាំងនោះ ប្រើដែរ ហើយនេះជាមូលហេតុដែលអូសទាញយុវជនឱ្យចេញឆ្ងាយពីការមានសុខភាពហិរញ្ញវត្ថុល្អ។
ស្រដៀងគ្នានេះ កញ្ញា រិន សិទ្ធិនារី ដែលជាវាគ្មិនចែករំលែកចំណេះដឹងហិរញ្ញវត្ថុមួយរូបទៀតក៏បានឱ្យដឹងផងដែរ ពីបទពិសោធន៍របស់កញ្ញាផ្ទាល់។ កញ្ញា បានលើកទឹកចិត្តឱ្យមានការពិនិត្យមើលលើរបស់ដែលចង់ទិញនោះ ថាតើវាគ្រាន់តែដើម្បីភាពហ៊ឺហា ឬក៏ដើម្បីជាជំនួយដល់ការប្រកបការងារណាមួយ។ ប្រសិនបើវាជាសម្ភារៈសម្រាប់ជំនួយដល់ការងារ កញ្ញាលើកទឹកចិត្តឱ្យទិញ ប៉ុន្តែប្រសិនបើគ្រាន់តែបម្រើឱ្យភាពឡូយឆាយ ទាំងដែលខ្លួនមិនមានលទ្ធភាពគ្រប់គ្រាន់ទេ គួរតែគិតពិចារណាទប់ចិត្តសិន។
យ៉ាងណាក៏ដោយ ប្រសិនបើពិតជាមានតម្រូវការ តែមិនមានលទ្ធភាព គេក៏នៅតែអាចប្រើប្រាស់កម្ចីបាន ប៉ុន្តែត្រូវប្រាកដថា នោះជាកម្ចីផ្លូវការ ដែលមានធនាគារជាតិជាអាជ្ញាធរ។
ទាក់ទិននឹងរឿងនេះដែរ លោក គ្រួច សត្យា នាយកនៃនាយកដ្ឋានធនាគារកិច្ច និងសារជីវកម្មនៃ ធនាគារ Maybank បានឱ្យដឹងថា ការជ្រើសរើសប្រើប្រាស់កម្ចីនៅស្ថាប័នផ្លូវការដូចជា ធនាគារ និងមីក្រូហិរញ្ញវត្ថុ នឹងជួយជាប្រយោជន៍ដល់ប្រជាជនបានច្រើន។ ជួយបានច្រើន ព្រោះមុនពេលផ្ដល់កម្ចី គ្រឹះស្ថានហិរញ្ញវត្ថុផ្លូវការនឹងត្រូវការសិក្សា ដើម្បីវាយតម្លៃទៅលើលទ្ធភាពសងត្រឡប់របស់អតិថិជនយ៉ាងល្អិតល្អន់ ដែលការសិក្សានេះនឹងជួយដល់ភាគីទាំងសងខាង គឺធនាគារ និងអតិថិជន។
លោក គ្រួច សត្យា បានបន្តមានប្រសាសន៍ទៀតថា៖
«ប្រសិនបើគ្រឹះស្ថានហិរញ្ញវត្ថុផ្លូវការ វាយតម្លៃអតិថិជនរូបណាមួយថាមិនមានលទ្ធភាពគ្រប់គ្រាន់ក្នុងការប្រើប្រាស់ប្រាក់កម្ចីទេ ក៏មិនគួរនឹងងាកទៅចងការប្រាក់ក្រៅផ្លូវការដែរ។»
លោកបន្តថា គ្រឹះស្ថានហិរញ្ញវត្ថុផ្លូវការទាំងអស់គឺមានភារកិច្ចគោរពតាមគោលការណ៍របស់ធនាគារជាតិ មិនឱ្យដាក់ការប្រាក់ឱ្យលើសពី១៨% ក្នុងមួយឆ្នាំនោះទេ ដែលទំហំការប្រាក់ប៉ុណ្ណេះ គឺសមស្រប សម្រាប់ឱ្យអតិថិជនមានលទ្ធភាពក្នុងការសងត្រឡប់។ ដូច្នេះបើការប្រាក់ក្រោម ១៨% មិនអាចជាប់ការវាយតម្លៃផង ទម្រាំតែប្រើកម្ចីក្រៅផ្លូវការដែលមាន ការប្រាក់ខ្ពស់ទៀត តើនឹងមានលទ្ធភាពណាដើម្បីសងត្រឡប់ទៅគេវិញ? នេះបើតាមការបញ្ជាក់បន្ថែមរបស់លោក គ្រួច សត្យា។
ជារួម លោកក៏យល់ស្របថា តម្រូវការក្នុងការប្រើប្រាស់សម្ភារៈនិយមគឺមិនខុសទេ ប៉ុន្តែប្រសិនបើមិន ខ្លួនមានលទ្ធភាព ហើយនៅតែប្រើប្រាស់កម្ចីក្រៅផ្លូវការដើម្បីទិញ វាអាចនឹងនាំឱ្យបុគ្គលនោះធ្លាក់ចូលទៅក្នុងបញ្ហាបំណុលលើសលុប៕
Account
Security
Favourite Content