បរទេស ៖ យោងតាមប្រភពព័ត៌មានពី Business Insider បានរាយការណ៍ថា រុស្ស៊ីបានទទួលស្គាល់ថា សេដ្ឋកិច្ចរបស់ខ្លួនឈានដល់ដំណាក់កាលប៊ិះនឹងដួលរលំកាលពីឆ្នាំមុន ប៉ុន្តែខ្លួនបានយកឈ្នះលើទណ្ឌកម្មទាំងនោះ ហើយកំពុងបន្តស្ថិតនៅលើផ្លូវសម្រាប់កំណើនដ៏រឹងមាំនៅឆ្នាំនេះ។

កាលពីប៉ុន្មានថ្ងៃចុងក្រោយនេះ អ្នកនាំពាក្យវិមានក្រឹមឡាំង លោក Dmitry Peskov បាននិយាយទៅកាន់ទីភ្នាក់ងារព័ត៌មានរដ្ឋរបស់រុស្ស៊ី TASS ថា នៅពេលដែលមានការគំរាមកំហែងដល់ការដួលរលំនៃសេដ្ឋកិច្ច រុស្ស៊ីត្រូវប្រមូលធនធាន និងកម្លាំងផ្ទៃក្នុងទាំងអស់ ដើម្បីទប់ទល់ពីការដួលរលំ។ ទន្ទឹមនឹងនោះ​ សម្ពាធសេដ្ឋកិច្ចកើតឡើងដោយសារទណ្ឌកម្ម បន្ទាប់ពីការលុកលុយរបស់រុស្ស៊ីលើអ៊ុយក្រែន។ ការដាក់ទណ្ឌកម្មទាំងនោះរួមមានការដកទុនបម្រុងរូបិយប័ណ្ណបរទេសចេញពីរុស្ស៊ីប្រហែល ៣០០ ពាន់លានដុល្លារ ការបញ្ឈប់ធនាគារមួយចំនួនរបស់រុស្ស៊ីពីបណ្តាញ SWIFT ការអនុវត្តលើការហាមឃាត់ និងការកំណត់តម្លៃប្រេងរបស់រុស្ស៊ី ៦០ ដុល្លារក្នុងមួយបារ៉េល ដែលជាប្រភពចំណូលកំពូលមួយរបស់ប្រទេស។

លោក Peskov បានបន្ថែមថា យ៉ាងណាមិញ រុស្ស៊ីបានងើបឡើងវិញដោយជោគជ័យ ហើយឥឡូវនេះកំពុងឈានចូលដំណាក់កាលរីកចម្រើន។ ស្របពេលនេះដែរ វិមានក្រឹមឡាំងកំពុងព្យាករណ៍ថា កំណើនរបស់រុស្ស៊ីអាចកើនឡើងដល់ទៅ ៣ ភាគរយនៅឆ្នាំនេះ ដែលលើសពី ២,២ ភាគរយនៃការព្យាករណ៍ដោយមូលនិធិរូបិយវត្ថុអន្តរជាតិ IMF ។ ការសម្រេចចិត្តប្រកបដោយភាពឈ្លាសវៃនៃការដឹកនាំរបស់ប្រទេស និងការងាររបស់រដ្ឋាភិបាល អាចធ្វើឲ្យរុស្ស៊ីទៅឆ្ពោះទៅរកស្ថិរភាពសេដ្ឋកិច្ចវិញ ដោយមិននឹកស្មានដល់។

សេចក្តីថ្លែងការណ៍នេះគឺជាការទទួលស្គាល់ដ៏កម្រមួយអំពីប្រសិទ្ធភាពនៃទណ្ឌកម្មមកលើរុស្ស៊ី ដែលបានបង្ហាញពីការមិនគោរពចំពោះការរឹតបន្តឹងពាណិជ្ជកម្មរបស់លោកខាងលិច។ កាលពីឆ្នាំ២០២២ ប្រធានាធិបតីរុស្ស៊ី Vladimir Putin បានលើកឡើងការរឹតបន្តឹងរបស់លោកខាងលិចសំខាន់ៗដូចជាការកំណត់តម្លៃប្រេង ៦០ ដុល្លារថាជា រឿងឆោតល្ងង់មួយ ហើយបានប្តេជ្ញាថានឹងសងសឹកដោយការកាត់បន្ថយផលិតកម្មប្រេង ដែលគំរាមកំហែងដល់ការដឹកជញ្ជូន និងការឡើងថ្លៃតម្លៃប្រេង។

ទោះបីជាមានការអះអាងពីកំណើនសេដ្ឋកិច្ចដ៏រឹងមាំនៅក្នុងប្រទេសរុស្ស៊ីក៏ដោយ អ្នកជំនាញ និងអ្នកសង្កេតការណ៍បានសម្តែងការងឿងឆ្ងល់អំពីអនាគតសេដ្ឋកិច្ចរបស់ប្រទេសនេះ ដោយរុស្ស៊ីបានបង្ហាញពីបញ្ហាហិរញ្ញវត្ថុដែលខ្លួនគ្រោងនឹងយកថវិកាសម្រាប់ប្រើប្រាស់លើយោធាកម្រិតខ្ពស់បំផុតនៅឆ្នាំ 20២០ – ២៤ ។ លើសពីននេះ វិស័យសំខាន់ៗដូចជា ឧស្សាហកម្មរថយន្តរបស់រុស្ស៊ីបានដួលរលំស្ទើរតែទាំងស្រុងក្នុងរយៈពេលមួយឆ្នាំកន្លងមកនេះ ខណៈដែលអតិផរណានៅតែបន្តផ្ទុះឡើង ហើយធនាគារកណ្តាលកំពុងព្យាយាមបង្កើនតម្លៃប្រាក់រូប៊លរបស់រុស្ស៊ី ដែលបានធ្លាក់ចុះកាលពីឆ្នាំមុន។

អ្នកជំនាញមួយចំនួនបាននិយាយថា រុស្ស៊ីអាចនឹងត្រូវឆ្ពោះទៅរកអនាគតដ៏អាក្រក់ ខណៈដែលសេដ្ឋកិច្ចរបស់ខ្លួនបន្តធ្លាក់ចុះពីសង្គ្រាមប្រឆាំងនឹងអ៊ុយក្រែន។ យោងតាមអ្នកស្រាវជ្រាវ Yale លើកឡើងថា សេដ្ឋកិច្ចរបស់ប្រទេសនេះអាចនឹងដល់ដំណាក់កាលដួលរលំ ដោយសារតែសង្រ្គាមបានប្រើប្រាស់ធនធានដែលមានស្រាប់ស្ទើរតែទាំងអស់៕