សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីកិច្ចដំណើរការរាជរដ្ឋាភិបាលអាណត្តិថ្មីទី៧អស់រយៈពេលជាង៣ខែកន្លងមកនេះ ជាការកត់សម្គាល់ឃើញមានក្រុមហ៊ុនបរទេសជាច្រើនចូលមកកម្ពុជាស្វែងរកការវិនិយោគ និងសិក្សាពីសក្ដានុពលវិនិយោគលើវិស័យនានា ដោយក្នុងនោះវិនិយោគិនចិនមានចំនួនច្រើនជាងគេ។ ជាក់ស្ដែងនៅដើមសប្ដាហ៍ទី១នៃខែធ្នូ ២០២៣នេះ មានក្រុមហ៊ុនចិនចំនួន៦ផ្សេងទៀតបានមកសិក្សាពីឱកាស និងសក្ដានុពលវិនិយោគលើវិស័យសុខាភិបាល ថាមពលឥន្ធនៈ និងកសិកម្មនៅក្នុងប្រទេសកម្ពុជា ។
ក្រុមហ៊ុនមកពីប្រទេសខេត្តជី លីនប្រទេសចិនទាំង៦ដែលបានមកដល់ប្រទេសកម្ពុជាបានជួបជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១នៃក្រុមប្រឹក្សាអភិវឌ្ឍន៍កម្ពុជាដើម្បីជជែក និងស្វែងយល់ពីឱកាសវិនិយោគនៅកម្ពុជា ។
នៅក្នុងជំនួបស្វែងយល់ពីការវិនិយោគមួយនេះ ក្នុងគោលបំណងស្វែងយល់អំពីគោលនយោបាយ និងបទប្បញ្ញត្តិនានាពាក់ព័ន្ធនឹងការវិនិយោគនៅកម្ពុជា ដោយក្នុងនោះភាគីទាំងពីរបានជជែកពិភាក្សាលើគម្រោងវិនិយោគលើវិស័យសុខាភិបាល ថាមពលឥន្ធនៈ និងគម្រោងដាំថ្នាំរុក្ខជាតិប្រើប្រាស់ជាឱសថបុរាណជាដើម។
នៅក្នុងជំនួបនោះឯកឧត្តមឧបនាយករដ្ឋមន្ត្រី ស៊ុន ចាន់ថុល បានស្នើសុំឱ្យបណ្ដាក្រុមហ៊ុនទាំងអស់ដែលមានបំណងវិនិយោគលើវិស័យនានានៅកម្ពុជា សូមរៀបចំដាក់ពាក់ស្នើសុំគម្រោងវិនិយោគដោយភ្ជាប់មកជាមួយការសិក្សាលម្អិតរបស់ខ្លួនមកកាន់ក្រុមប្រឹក្សាអភិវឌ្ឍន៍កម្ពុជាដើម្បីពិនិត្យអនុវត្តនីតិវិធីបន្ត ។
ឯកឧត្តមឧបនាយករដ្ឋមន្ត្រី ក៏បានជម្រាបជូនអំពីបេសកកម្មរបស់ក្រុមប្រឹក្សាអភិវឌ្ឍន៍កម្ពុជាក្នុងការជួយសម្របសម្រួលសំណើសុំគម្រោងវិនិយោគនានា ជាមួយក្រសួង-ស្ថាប័នពាក់ព័ន្ធ ជូនដល់បណ្ដាក្រុមហ៊ុននានា សំដៅធ្វើយ៉ាងណាលើកទឹកចិត្តវិនិយោគិន បង្កើនការបណ្ដាក់ទុនវិនិយោគនៅកម្ពុជា ។
លោកឧកញ៉ា គីម ហ៊ាង ប្រធាន KW Cambodia បានលើកឡើងថា ឆ្នាំ២០២៤ខាងមុខនេះ ជាឆ្នាំដែលវិស័យឧស្សាហកម្ម កសិកម្ម ទេសចរណ៍ និងអចលនទ្រព្យងើបឡើងវិញ ។ ឆ្នាំ ២០២៤នេះដែរ ក៏នឹងចាត់ទុកជាពេលវេលានៃការរត់ម៉ារ៉ាតុង ហើយអ្នកណារត់លឿនជាងអ្នកនោះនឹងឈ្នះ។ វាមានន័យថា ឆ្នាំ២០២៤ ខាងមុខ វិស័យដែលរងផលប៉ះពាល់ដោយសារតែកូវីដ១៩ វិបត្តិសង្គ្រាមរុស្ស៊ីអ៊ុយក្រែន និងសង្គ្រាមដែលទើបកើតឡើងថ្មីៗក៏នឹងត្រូវបញ្ចប់ ហើយដល់ពេលវេលាដែលត្រូវឆ្ពោះទៅមុខជាបន្ត ។
លោកបានជឿជាក់លើសមាសភាពអ្នកដឹកនាំរាជរដ្ឋាភិបាលអាណត្តិថ្មី ដែលអាចជំរុញកំណើនសេដ្ឋកិច្ច ទាក់ទាញការវិនិយោគថ្មីៗពីខាងក្រៅ និងសម្រួលដល់ការវិនិយោគសម្រាប់អ្នកខាងក្នុងឱ្យកាន់តែមានដំណើរការល្អប្រសើរ ។
ជាការកត់សម្គាល់ ក្រោយការបង្កើតរាជរដ្ឋាភិបាលអាណត្តិទី៧ វិនិយោគិនចិនជាវិនិយោគិនបរទេសដែលមានសកម្មភាពសិក្សា ស្វែងយល់ពីឱកាសនិងសក្ដានុពលវិនិយោគនៅកម្ពុជាខ្លាំងជាងគេ ទាំងវិនិយោគិនចិនដែលកំពុងបណ្ដាក់ទុនវិនិយោគនៅកម្ពុជាស្រាប់ និងវិនិយោគិនចិនថ្មីៗដែលមិនទាន់បានដាក់ទុនវិនិយោគនៅកម្ពុជានៅឡើយ ៕
Account
Security
Favourite Content