សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ លោកប្រធានាធិបតីនៃសាធារណរដ្ឋប្រជាមានិតចិន ស៊ី ជីនពីង បានអញ្ជើញមកបំពេញទស្សនកិច្ចផ្លូវការនៅក្នុងប្រទេសកម្ពុជារយៈពេល២ថ្ងៃ គឺនៅថ្ងៃទី១៧ និង ១៨ ខែមេសា ឆ្នាំ២០២៥ ។ នៅក្នុងដំណើរទស្សនកិច្ចរបស់ប្រធានាធិបតីចិននៅប្រទេសកម្ពុជានាពេលនេះដែរ អ្នកវិនិយោគ និងអ្នកជំនាញក្នុងវិស័យអចលនទ្រព្យបានរំពឹងថា កម្ពុជា នឹងអាចទទួលបានការវិនិយោគថ្មីៗបន្ថែមទៀតពីប្រទេសចិន ។
អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាភិបាលនៃក្រុមហ៊ុន Sam SN Group និងជាអ្នកជំនាញអចលនទ្រព្យនៅកម្ពុជាបានមានប្រសាសន៍ថា ដំណើរទស្សនកិច្ចរបស់ ឯកឧត្តម ស៊ី ជីនពីង ប្រធានាធិបតីចិន មកកាន់កម្ពុជា គឺជាដំណើរទស្សនកិច្ចមួយបង្ហាញពីទំនាក់ទំនងទ្វេរភាគីរវាងកម្ពុជា និងចិន និងជាការបង្ហាញទៅកាន់អ្នកវិនិយោគនៃប្រទេសចិនទាំងអស់ឱ្យចាប់អារម្មណ៍ងាកមកវិនិយោគនៅកម្ពុជាកាន់តែច្រើនបន្ថែមទៀត ។
អ្នកឧកញ៉ាបន្តថា ៖
«ដំណើរទស្សនកិច្ចរបស់ប្រធានាធិបតីចិនមកកាន់ប្រទេសកម្ពុជានាពេលនេះ បានបង្ហាញពីភាពរឹងមាំនៃសេដ្ឋកិច្ចរបស់កម្ពុជា និងជំរុញវិនិយោគិនចិន ក៏ដូចជាវិនិយោគិនពីប្រទេសផ្សេងទៀតឱ្យចូលមកបណ្ដាក់ទុនវិនិយោគនៅក្នុងប្រទេសកម្ពុជា។ វត្តមានរបស់ប្រមុខថ្នាក់ដឹកនាំកំពូលនៃប្រទេសមហាអំណាចសេដ្ឋកិច្ចមួយនេះ នឹងអាចទាក់ទាញបាននូវវិនិយោគិនចិនបន្ថែមទៀត ខណៈដែលបច្ចុប្បន្ននេះ វិនិយោគិនចិន បានឈរនៅលើលំដាប់កំពូលក្នុងនាមជាអ្នកវិនិយោគច្រើនជាងគេនៅក្នុងប្រទេសកម្ពុជាស្រាប់រួចទៅហើយ»។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance Real Estate ក៏បានឱ្យដឹងផងដែរថា ការធ្វើដំណើរទស្សនកិច្ចរបស់ប្រធានាធិបតីចិន ស៊ី ជីនពីង ក្រៅពីជួយបង្កើនទំនាក់ទំនងការទូតរវាងប្រទេសទាំងពីរ វាក៏នឹងជួយដល់ការវិនិយោគជាច្រើនដល់កម្ពុជានៅពេលខាងមុខនេះ ពីព្រោះក្រោមការដឹកនាំរបស់សម្ដេចតេជោ អតីតនាយករដ្ឋមន្ត្រី និងសម្ដេចធិបតី ជានាយករដ្ឋមន្ត្រីនាពេលបច្ចុប្បន្ន បានខិតខំប្រឹងប្រែងក្នុងការស្វែងរកការវិនិយោគពីបណ្ដាប្រទេសនានាមកកាន់កម្ពុជា ក្នុងនោះចិនក៏ជាប្រទេសមួយដែលមានអ្នកវិនិយោគច្រើនកំពុងបណ្ដាក់ទុនវិនិយោគនៅកម្ពុជា ។
លោកបន្តថា ៖
«ការពង្រឹងទំនាក់ទំនងការទូតរវាងប្រទេសចិន និងកម្ពុជា នឹងផ្ដល់ទំនុកចិច្តកាន់តែខ្លាំងដល់វិនិយោគិនចិន ហើយការមកដល់នៃមេដឹកនាំកំពូលរបស់ចិននៅកម្ពុជានេះដែរ ក៏បានបង្ហាញឱ្យឃើញពីទំនាក់ទំនងនៃប្រទេសកម្ពុជា – ចិន កាន់តែស្អិតល្មួតថែមទៀត» ។
គួរបញញជាក់ថា បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗនេះ ចាប់តាំងពីឆ្នាំ១៩៩០ ដល់ដើមឆ្នាំ២០២៥ នេះ ទុនវិនិយោគរបស់ចិននៅកម្ពុជាមានទំហំទឹកប្រាក់ប្រមាណ៣៦ពាន់លានដុល្លារអាមេរិក ដោយក្នុងរយៈពេល៥ឆ្នាំចុងក្រោយនេះ ចិនបានឈរលំដាប់លេខរៀងទី១ ជាវិនិយោគិនដែលបានដាក់ទុនវិនិយោគនៅកម្ពុជាច្រើនជាងគេ ។ សម្រាប់ឆ្នាំ២០២៤កន្លងទៅនេះ ការវិនិយោគមកពីប្រទេសចិន ក៏ស្ថិតនៅលេខរៀងទី១ ដោយចិនបានដាក់ទុនវិនិយោគក្នុងទំហំទឹកប្រាក់ប្រមាណ ៣,៤ពាន់លានដុល្លារអាមេរិក ឬស្មើប្រមាណជិតពាក់កណ្ដាលនៃទុនវិនិយោគសរុប( ៤៩,៨២%) ៕
Account
Security
Favourite Content