សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្របនឹងការវិនិយោគឧស្សាហកម្មរោងចក្រ សហគ្រាសនៅក្នុងខេត្តកំពង់ស្ពឺ កាន់តែមានចំនួនច្រើនឡើងៗ បានធ្វឱ្យដីធ្លីនៅតំបន់មួយចំនួនដែលពីមុនប្រើប្រាស់សម្រាប់ជាកសិកម្ម ដាំដំណាំផ្សេងៗនោះ មកជាដីសម្រាប់ឧស្សាហកម្មសហគ្រាសនានាវិញជាក់ស្ដែងដីនៅតំបន់មួយក្នុងខេត្តកំពង់ស្ពឺកំពុងប្រែក្លាយពីដីកសិកម្មទៅជាដីឧស្សាហកម្មដ៏មានសក្ដានុពល ។
លោក ញ៉ាញ់ ជាបហ៊ង ប្រធានមន្ទីរធនធានទឹក និងឧត្តុនិយមខេត្តកំពង់ស្ពឺ ថ្លែងនៅក្នុងសន្និសីទស្ដីពីវឌ្ឍនភាពខេត្តកំពង់ស្ពឺកាលពីពេលថ្មីៗនេះបានឱ្យដឹងថា កាលពីមុនក្នុងស្រុកគងពិសី ប្រជាពលរដ្ឋដែលមានដីធ្លីធំៗបាននាំគ្នាដាំដំណាំនានាសម្រាប់រកប្រាក់ចំណូលផ្គត់ផ្គង់គ្រួសារដូចជារដូវកាលនេះជាដើម ពួកគាត់នាំគ្នាដាំដំណាំឪឡឹក សម្រាប់លក់នៅលើទីផ្សារ ហើយខែវស្សាពួកគាត់ដាំដំណាំស្រូវឬដំណាំផ្សេងៗទៀត ប៉ុន្តែមកដល់ពេលនេះ នៅក្នុងស្រុកគងពិសីវាលែងជាតំបន់កសិកម្មទៀតហើយ គឺបានប្រែក្លាយពីដីកសិកម្មទៅជាដីឧស្សាហកម្ម និងធ្វើឱ្យតម្លៃដីធ្លីនៅក្នុងស្រុកនោះមានតម្លៃខ្ពស់ផងដែរ ។
លោកបន្តថា បច្ចុប្បន្ន ដីដែលពួកគាត់ធ្លាប់ធ្វើកសិកម្មដាំដំណាំនានានោះ បានប្រែទៅជាដីសម្រាប់សង់រោងចក្រ ដីសម្រាប់សង់ឃ្លាំងស្តុកទំនិញរបស់រោងចក្រនានាស្របនឹងតំបន់នោះ កាន់តែមានការទាក់ទាញលើការវិនិយោគឧស្សាហកម្ម សហគ្រាសផងដែរ។
ឯកឧត្តម វ៉ី សំណាង អភិបាលខេត្តកំពង់ស្ពឺ បានថ្លែងនៅក្នុងសន្និសីទនោះផងដែរថា យោងទៅលើកត្តាសុខសន្តិភាពបានទាក់ទាញឱ្យវិនិយោគក្នុងនិងក្រៅប្រទេសបណ្ដាក់ទុនវិនិយោគជាហូរហែ ក្នុងនោះដែរ ខេត្តកំពង់ស្ពឺ ទទួលបានគម្រោងវិនិយោគលើឧស្សាហកម្មរោងចក្រច្រើនមួយក្នុងចំណោមបណ្ដាខេត្តនានាទូទាំងប្រទេស ជាក់ស្ដែងកាលពីប៉ុន្មានថ្ងៃមុននេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មីៗចំនួន៥បោះទីតាំងនៅខេត្តកំពង់ស្ពឺ ដូច្នេះ កំពង់ស្ពឺនឹងទទួលបានការវិនិយោគជាបន្តបន្ទាប់ទៀត ។
ឯកឧត្តមអភិបាលខេត្តបានធានាអះអាងចំពោះសុវត្ថិភាពរបស់វិនិយោគិនដែលចូលមកក្នុងទឹកដីនៃខេត្តកំពង់ស្ពឺ ដោយនឹងសម្របសម្រួលជូនវិនិយោគិនទាំងនោះដើម្បីឱ្យការវិនិយោគរបស់ពួកគាត់កាន់តែមានភាពរលូន ។
អ្នកជំនាញនៃវិស័យអចលនវត្ថុកម្ពុជាជាច្រើនបានមើលឃើញថា ខេត្តកំពង់ស្ពឺជាតំបន់ដែលមានសក្ដានុពលខ្ពស់ក្នុងការទាក់ទាញវិនិយោគលើឧស្សាហកម្មនានា ដោយសារតែទីតាំងនេះអំណោយផលខ្ពស់ក្នុងការដឹកទំនិញចេញនិងចូលកន្លែងផលិតនិងនាំចេញទៅកាន់ទីផ្សារអន្តរជាតិវិញ ពីព្រោះជាតំបន់ដែលមានភាពងាយស្រួលក្នុងការដឹកជញ្ជូនទំនិញទៅកាន់កំពង់ផែអន្តរជាតិ និងដឹកពីកំពង់ផែចូលកន្លែងផលិតវិញ និងងាយស្រួលក្នុងការដឹកជញ្ជូនទៅកាន់ច្រកព្រំដែនកម្ពុជាថៃជាដើម ៕
Account
Security
Favourite Content