សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងដំណើរទស្សនកិច្ចរបស់ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅសហរដ្ឋអាមេរិក បានស្នើ និងលើកទឹកចិត្តឱ្យក្រុមហ៊ុនផលិតសម្លៀកបំពាក់ម៉ាកល្បីលំដាប់ពិភពលោកមួយ មកបណ្ដាក់ទុនវិនិយោគ និងពង្រីកផលិតកម្មនៅក្នុងប្រទេសកម្ពុជា ស្របពេលដែលកម្ពុជាបានផ្ដល់នូវការអនុគ្រោះធំធេងដល់វិនិយោគិនបរទេសនានា ។
ក្នុងជំនួបជាមួយជាមួយតំណាងក្រុមហ៊ុន Levi Strauss & Co របស់អាមេរិក ឯកឧត្តម ស៊ុន ចាន់ថុល បានលើកទឹកចិត្តឱ្យក្រុមហ៊ុនមួយនេះពិនិត្យលទ្ធភាពក្នុងការបណ្ដាក់ទុនវិនិយោគពង្រីកវិសាលភាពផលិតកម្មរបស់ខ្លួននៅកម្ពុជា តាមរយៈកិច្ចសម្រួលលើការងារវិនិយោគពីសំណាក់ក្រុមប្រឹក្សាអភិវឌ្ឍន៍កម្ពុជា ក៏ដូចជាភាគីពាក់ព័ន្ធ ដែលអាចធានាបាននូវបរិយាកាសវិនិយោគប្រកបដោយភាពអនុគ្រោះបំផុត ។
នៅក្នុងឱកាសនោះដែរ ឯកឧត្តមឧបនាយក ក៏បានជម្រាបជូនអំពីបច្ចុប្បន្នភាពនៃការផលិត និងផ្គត់ផ្គង់ថាមពលនៅក្នុងប្រទេសកម្ពុជា ដែលក្នុងនោះ ៦២ភាគរយនៃថាមពលសរុបដែលបានប្រើប្រាស់សម្រាប់ការផ្គត់ផ្គង់ គឺជាប្រទេសថាមពលស្អាត និងកកើតឡើងវិញ ។
ឯកឧត្តមបានលើកឡើងផងដែរថា ដើម្បីសម្រេចបាននូវចក្ខុវិស័យផែនការរបស់រាជរដ្ឋាភិបាលក្នុងការក្លាយខ្លួនជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០ កម្ពុជាត្រូវធ្វើពិពិធកម្មសេដ្ឋកិច្ច និងទីផ្សារ ដោយស្វែងរកការវិនិយោគណាដែលផ្ដល់តម្លៃបន្ថែមខ្ពស់ដល់កម្មករនិយោជិត ជាពិសេសអាចផ្ដល់នូវចំណេះ ជំនាញ ដល់កម្មករ និយោជិតកម្ពុជា និងអាចផ្ដល់ប្រាក់កម្រៃខ្ពស់បន្ថែមទៀត ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចេញផ្សាយកាលពីពេលថ្មីៗនេះឱ្យដឹងថា ក្នុងរយៈពេល៨ខែកម្ពុជាទទួលបានទុនវិនិយោគប្រមាណជិត៥ពាន់លានដុល្លារអាមេរិកពីគម្រោងវិនិយោគនានាដែលបានអនុម័ត ដោយក្នុងនោះភាគច្រើនជាគម្រោងវិនិយោគរបស់វិនិយោគិនចិនលើវិស័យឧស្សាហកម្ម ។
តាមរយៈការបណ្ដាក់ទុនវិនិយោគលើវិស័យឧស្សាហកម្មជាពិសេស រោងចក្រ សហគ្រាសផលិតសម្លៀកបំពាក់ វាយនភណ្ឌ និងសម្ភារៈដទៃទៀតនេះដែរ ក៏បានធ្វើឱ្យតម្រូវការដីសម្រាប់សង់រោងចក្រ និងឃ្លាំងនៅកម្ពុជាមានកំណើនគួរកត់សម្គាល់ផងដែរ ។
ដោយឡែក សម្រាប់ការវិនិយោគរបស់សហរដ្ឋអាមេរិកនៅក្នុងប្រទេសកម្ពុជា បានកត់សម្គាល់ថា មានកម្រិតតិចតួចនៅឡើយ ប៉ុន្តែសហរដ្ឋអាមេរិក គឺជាប្រទេសដែលនាំចូលទំនិញពីកម្ពុជាច្រើនជាងគេ ក្នុងចំណោមបណ្តាប្រទេសដែលទិញទំនិញពីកម្ពុជា ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាឱ្យដឹងថា ក្នុងរយៈពេល៨ខែដើមឆ្នាំនេះ ការនាំចេញទំនិញពីកម្ពុជាទៅកាន់សហរដ្ឋអាមេរិក មានទឹកប្រាក់ចំនួន ៦,៧៤ពាន់លានដុល្លារអាមេរិក ឬស្មើនឹងប្រមាណ៣៨,៤ភាគរយនៃទំហំនាំចេញសរុប និងមានកំណើនប្រមាណ១០,៤ភាគរយ ធៀបនឹងរយៈពេលដូចគ្នាកាលពីឆ្នាំ២០២៣កន្លងទៅ ៕
Account
Security
Favourite Content