សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមរយៈគោលនយោបាយរបស់រាជរដ្ឋាភិបាលដែលជំរុញឱ្យក្រសួងរៀបចំដែនដី នគរូបនីយកម្ម និងសំណង់ ប្រើប្រាស់ធនធានអចលនទ្រព្យដែលពលរដ្ឋទទួលបាន ដើម្បីប្រែក្លាយជាឧត្តមប្រយោជន៍សម្រាប់ពលរដ្ឋជាមួយនឹងក្ដីរំពឹងថា ប្រជាពលរដ្ឋនឹងមានជីវភាពកាន់តែល្អប្រសើរ។ នេះជាការលើកឡើងរបស់ ឯកឧត្តម ឧបនាយករដ្ឋមន្ត្រី សាយ សំអាល់ ក្នុងពិធីប្រកាសចែកវិញ្ញាបនបត្រសម្គាល់ម្ចាស់អចលនវត្ថុ និងមោឃភាពបណ្ណសម្គាល់សិទ្ធកាន់កាប់ប្រើប្រាស់ដីធ្លី (បណ្ណស្លាបមាន់) ឬបណ្ណសម្គាល់សិទ្ធកាន់កាប់អចលនវត្ថុ ជូនបងប្អូនពលរដ្ឋ ស្ថិតនៅភូមិត្រុំ ឃុំឡាមិញ ភូមិយ៉ាសម ភូមិស៊ើង ភូមិចែត ភូមិគ្លិ ភូមិយ៉ែម និងភូមិស្មាច់ ឃុំស៊ើង ស្រុកបរកែវ ខេត្តរតនគីរី នាព្រឹកថ្ងៃទី២១ ខែកក្កដា ឆ្នាំ២០២៥ ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ការវាស់វែងដីធ្លីបង្ហើយ គឺជាកិច្ចការសំខាន់សម្រាប់កម្ពុជា។ ជំហានបន្ទាប់ ក្រសួងរៀបចំដែនដី នគរូបនីយកម្ម និងសំណង់ ត្រូវមានភារកិច្ចយកធនធានអចលនទ្រព្យដែលប្រជាពលរដ្ឋទទួលបាននេះដើម្បីប្រែក្លាយជីវភាពប្រជាពលរដ្ឋឱ្យប្រសើរឡើង និងប្រើប្រាស់ធនធាននេះដើម្បីជាឧត្តមប្រយោជន៍សម្រាប់ពួកគាត់បន្ថែមទៀត។
ក្នុងឱកាសនេះ ឯកឧត្តមក៏បានចូលរួមអបអរសាទរចំពោះលទ្ធផលដែលសម្រេចបាន និងបានគូសបញ្ជាក់ថា គោលនយោបាយចុះបញ្ជីដីធ្លីបង្ហើយគឺជាគោលនយោបាយរបស់សម្ដេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃកម្ពុជា ដែលបានដាក់ចេញនៅដើមអាណត្តិទី៧ នេះ ឱ្យក្រសួងរៀបចំដែនដី នគរូបនីយកម្ម និងសំណង់ ខិតខំប្រឹងប្រែងធ្វើយ៉ាងណាអនុវត្តការងារនេះឱ្យឆ្លើយតបទៅនឹងគោលនយោបាយរបស់រាជរដ្ឋាភិបាលដើម្បីបញ្ចប់ការវាស់វែងដីធ្លីនៅទូទាំងប្រទេស។ ទាក់ទិននឹងការវាស់វែងដីធ្លីបង្ហើយនេះ ឯកឧត្តមបានបញ្ជាក់ថា នេះគឺជាជំហានមួយស្ថិតក្នុងដំណើរដ៏វែងឆ្ងាយដែលបានចាប់ផ្ដើមការធ្វើកំណែទម្រង់ដីធ្លីដោយសម្ដេចអគ្គមហាសេនាបតីតេជោ ហ៊ុន សែន តាំងពីឆ្នាំ១៩៨៥ មកម៉្លេះ។
ឯកឧត្តមបន្ថែមថា ៖
«ក្នុងការវាស់វែងដីធ្លីនេះគឺបានប្រើប្រាស់កម្លាំងសរុបជាច្រើន ដោយក្នុងនោះត្រូវប្រើប្រាស់កម្លាំងដែលមានស្រាប់, បំពាក់សម្ភារៈ , ថវិកា និងត្រូវមានការជួយអន្តរាគមន៍គ្នាទៅវិញទៅមកពីគ្រប់ភាគីពាក់ព័ន្ធ។ ជាក់ស្ដែង នៅដើមអាណត្តិទី៧ យើងនៅសល់ប្រមាណ ៥លានក្បាលដីដែលត្រូវចុះបញ្ជីដីធ្លីបង្ហើយ ហើយមកទល់ពេលនេះយើងនៅសល់ត្រឹមតែ ១៧ម៉ឺនក្បាលដីទៀតប៉ុណ្ណោះដែលត្រូវវាស់វែង ដូច្នេះ យុទ្ធនាការចុះបញ្ជីដីធ្លីបង្ហើយនេះនឹងត្រូវចប់សព្វគ្រប់ក្នុងពេលឆាប់ៗខាងមុខ ហើយនេះប្រហែលជាលើកទីមួយក្នុងប្រវត្តិសាស្ត្ររបស់ប្រទេសកម្ពុជាដែលយើងបានចុះបញ្ជីដីធ្លីបានចប់សព្វគ្រប់សរុបប្រមាណ ១៣លានក្បាលដីនៅទូទាំងប្រទេស ដោយកិច្ចការនេះទាមទារឱ្យមានការឯកភាពជាតិ និងការស្រុះស្រួលគ្នា នោះទើបអាចបញ្ចប់ការងារចុះបញ្ជីដីធ្លីបានជោគជ័យ»។
ឯកឧត្តម ឧបនាយករដ្ឋមន្ត្រី បានកត់សម្គាល់ឃើញថា ខេត្តរតនគិរី មានសក្តានុពលខ្លាំងលើវិស័យកសិកម្ម ដូច្នេះ ឯកឧត្តមបានលើកទឹកចិត្តដល់អាជ្ញាធរខេត្ត មន្ត្រីជំនាញពាក់ព័ន្ធ ឱ្យគិតគូរពិចារណាក្នុងការជំរុញប្រជាកសិករឱ្យបង្កើនការដាំដុះដំណាំកសិកម្មសម្រាប់ឆ្លើយតបនឹងតម្រូវការទីផ្សារ ដើម្បីបង្កើនសេដ្ឋកិច្ចគ្រួសារ និងសេដ្ឋកិច្ចជាតិ។ សូមគូសបញ្ជាក់ថា ខេត្តរតនគីរី គឺជាខេត្តមួយក្នុងចំណោមខេត្តទាំង៣ រួមមាន៖ ខេត្តរតនគីរី ខេត្តកំពង់ធំ និងខេត្តកោះកុង ដែលបាន និងកំពុងតែវាស់វែងបញ្ចប់ ៕
Account
Security
Favourite Content