ភ្នំពេញ ៖ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បាន​រកឃើញថា បច្ចុប្បន្ននេះ មានអ្នករកស៊ី​ក្នុងវិស័យ​​អចលនទ្រព្យ​ ប្រមាណ​ជាង៤០០​ក្រុម កំពុងធ្វើអាជីវកម្ម​​ដោយ​គ្មាន​ច្បាប់អនុញ្ញាតពី​និយ័ត​ករ​អាជីវកម្មអចលនវត្ថុ​ និង​បញ្ចាំ​ ដែលធ្វើឱ្យ​ប៉ះពាលដល់​ការប្រកួត​ប្រជែង​របស់ក្រុមហ៊ុនស្របច្បាប់​នៅក្នុង​ព្រះរាជាណាចក្រកម្ពុជា ។​

លោក​ សន សៀប ប្រធានសមាគមអ្នកវាយតម្លៃ​ និងភ្នាកងារ​អចលនវត្ថុកម្ពុជា បានឱ្យដឹងថា គិតត្រឹមពេល​នេះ សមាគមអ្នកវាយតម្លៃ និង​ភ្នាក់ងារអចលវត្ថុកម្ពុជា បានស្រាវជ្រាវ​រក​ឃើញ​មាន​ក្រុមអ្នករកស៊ី​ក្នុងវិស័យ​អចលនទ្រព្យរហូតដល់ជាង​៤០០​ក្រុម កំពុងសកម្មភាពក្នុងវិស័យនេះ​ដោយមិនមានច្បាប់អនុញ្ញាត ឬអាជ្ញា​បណ្ណពីនិយ័តករ​អាជីវកម្ម​អ​ច​ល​ន​វត្ថុ​​ និង​បញ្ចាំ​ ហើយចំនួន​នេះនឹង​មានកា​រកើនឡើ​ង​បន្ថែមទៀតខណៈដែលបច្ចុប្បន្ននេះសមា​គមក៏​​​កំពុង​ធ្វើការ​សិក្សា​ស្រាវជ្រាវ​បន្ថែម ។

លោក​បន្តថា ៖

«ដើម្បី​លុប​បំបាត់​ក្រុមហ៊ុន និងក្រុមអ្នក​រកស៊ី​ក្នុងវិស័យអចលនទ្រព្យ​ដែលគ្មានច្បាប់អនុញ្ញាត​ត្រឹម​ត្រូវ​ពីនិយ័តករ​អាជីវកម្មអចលនវត្ថុ​ និងបញ្ចាំ​​នោះ សមា​គ​ម​អ្នក​វាយ​តម្លៃ និងភ្នាក់ងារអចលវត្ថុកម្ពុជា បានចាប់ដៃគ្នា​ជាមួយនិយ័តករ​អាជីវកម្មអចលនវត្ថុ​ និងបញ្ចាំ​​នោះ ដើម្បីស្វែងរក​​ក្រុមហ៊ុន និង​អ្នក​ដែលធ្វើ​អាជីវកម្ម​ដែលមិនមាន​ច្បាប់​អនុញ្ញាត និង​​ដើម្បីស្ដារ​ ក៏ដូចជា​ជំរុញ​ការអភិវឌ្ឍវវិស័យ​អ​ច​ល​ន​ទ្រ​ព្យ​​នៅកម្ពុជា​បន្ទាប់ពីរង​ផលប៉ះពាល់​ដោយសារ​តែវិបត្តិកូវីដ​១៩ បញ្ហា​សេដ្ឋកិច្ច​ពិភពលោកនាពេល​កន្លងមក»។

អ្នក​ឧកញ៉ា សំ សុខនឿន អគ្គ​នាយកក្រុមហ៊ុន​អចលនទ្រព្យ KW Sam SN បាន​មានប្រសាសន៍ផងដែរថា​ ៖

«រយៈ​​ពេល​កន្លងមកនេះ យើង​សង្កេតឃើញថា​មានក្រុមហ៊ុន​និងធ្វើអាជីវកម្ម​អចលនទ្រព្យ​ជាច្រើន​ ​បាន​ធ្វើអា​ជីវ​កម្ម​ដោយ​មិនមានអាជ្ញា​បណ្ណ ដោយក្នុងនោះមាន​ក្រុមហ៊ុនអភិវឌ្ឍន៍ដីឡូត៍ ក្រុមហ៊ុន​សាងសង់​ផ្ទះល្វែង​ និង​​​ក្រុមហ៊ុន​ភ្នាក់ងារអចលនវត្ថុ​ជាដើម»។​

អ្នក​ឧកញ៉ា​បន្តថា​ ការធ្វើអាជីវកម្ម​អចលនទ្រព្យ​ដោយមិនមានអាជ្ញា​បណ្ណរបស់ក្រុមហ៊ុន​ និងក្រុមឈ្មួញ​មួយ​ចំនួន បានធ្វើ​ឱ្យ​ប៉ះពាល់​ដល់អតិថិជនដែល​បាន​ប្រើប្រាស់​ឬ​ទិញ​អចលន​ទ្រព្យ​​ពីសំណាក់​ក្រុមហ៊ុន​ និងអ្នក​អភិវឌ្ឍន៍អចលនទ្រព្យ​ដែលមិនមានអាជ្ញា​បណ្ណ​ពីនិយ័តករ​អាជីវកម្ម​អចលនវត្ថុ ​និង​បញ្ចាំ​ ។ មិនតែប៉ុណ្ណោះ​​វា​ក៏ធ្វើឱ្យប៉ះពាល់​ដល់​វិស័យ​អចល​ន​ទ្រព្យ​​ទាំង​មូល នឹងធ្វើឱ្យបាត់បង់ទំនុកចិត្ត​ពីអ្នក​វិនិយោគ​ក្នុង​និង​ក្រៅប្រ​ទេ​​ស​​ ​និងអាច​ធ្វើឱ្យប៉ះពាដល់​ក្រុមហ៊ុន​ធ្វើអាជីវកម្ម​ដែលមានច្បាប់​ទម្លាប់ត្រឹមត្រូវ​ផងដែរ​ ។

អ្នកឧកញ៉ា​បន្ថែមថា ​ការធ្វើ​អាជីវកម្ម​ពីសំណាក់​ក្រុមអ្នក​ធ្វើអាជីវកម្ម​ឬអ្នកដើរ​តួ​ជា​ភ្នាក់ងារអចលនវត្ថុ​ ដោ​យ​មិនមានច្បាប់​​មិនមានអាជ្ញា​បណ្ណ ក៏​ធ្វើឱ្យបាត់ចំណូល​ពន្ធមួយផ្នែក ពីព្រោះ​តែ​ក្រុមទាំ​ងនេះ​ ធ្វើអា​ជីវកម្ម​ មិន​មាន​ច្បាប់ មិនបានបង់ពន្ធ​ទៅឱ្យ​រដ្ឋ​ត្រឹមត្រូវដូចអ្នកដែលមានអាជ្ញាបណ្ណ​នោះឡើយ ។​ ក្រុមអ្នករកស៊ី​​វិស័យ​អចលនទ្រព្យដោយមិនមានអាជ្ញា​បណ្ណ មិន​មានច្បាប់ គឺមិនខ្វល់ពីគម្រោងនោះ ជា​គម្រោង​យ៉ា​ង​ណា​នោះ​ទេ ​ដោ​យពួ​​កគេ​ ដឹងតែពីលក់​ឱ្យ​តែបានកម្រៃជើង​សារ គឺមិនគិតពី​ផលប៉ះពាល់​នៅ​ពេលអនាគត​នោះឡើយ ។​ ជាក់​ស្ដែង​ កន្លងមកមានពលរដ្ឋជាច្រើន បានទិញដី តែមិនបានដី ទិញផ្ទះតែមិនបានផ្ទះនិ​ងបាន​បន្សល់​ទុក​​នូវ​បញ្ហា​មកដល់​បច្ចុប្បន្ននេះ ៕