ភ្នំពេញ ៖ ថ្នាក់ដឹកនាំនៃក្រសួងរៀបចំដែនដី នគរូបនីយកម្ម និងសំណង់ បានណែនាំឱ្យមានការរួមគ្នាថែរក្សាសុខសន្តិភាពឱ្យនៅស្ថិតស្ថេរគង់វង្ស និងលើកទឹកចិត្តស្ថាបត្យករ ឬវិស្វករ បើកចិត្តឱ្យទូលាយ ទទួលយកភាពច្នៃប្រឌិត ដើម្បីជំរុញឱ្យស្ថាបត្យកម្មខ្មែរនាសហសម័យរបស់កម្ពុជាកាន់តែរីកចម្រើន។

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងជាប្រធាន ស.ស.យ.ក រាជធានីភ្នំពេញ បានបញ្ជាក់ថា ដំណើររបស់កម្ពុជាចាប់ពីពេលនេះតទៅថ្ងៃមុខនឹងមានភាពងាយស្រួល ល្អប្រសើរ ហើយរលូនទៅមុខ ប្រសិនបើយើងរួមគ្នាថែរក្សាសុខសន្តិភាពឱ្យនៅស្ថិតស្ថេរគង់វង្ស។

ក្នុងជំនួបសំដែងការគួរសម និងស្ដាប់អំពីរបាយការណ៍បណ្ដុះបណ្ដាលការងារ ស.ស.យ.ក នៅសាកលវិទ្យាល័យភូមិន្ទវិចិត្រសិល្បៈ កាលពីថ្ងៃទី៥ ខែធ្នូ ឆ្នាំ២០២៤ នាទីស្តីការក្រសួង ឯកឧត្តម បានចាត់ទុកថា ការកសាងអគារទីស្ដីការគណៈរដ្ឋមន្ត្រី ក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងមហាផ្ទៃ និងអគ្គបញ្ជាការ គឺជាការរស់រានឡើងវិញនៃស្ថាបត្យកម្មខ្មែរនាសហសម័យ។ ជាមួយគ្នានេះ ឯកឧត្តមក៏បានផ្ដល់អនុសាសន៍លើការងារបណ្ដុះបណ្ដាលធនធានមនុស្សក្នុងវិស័យស្ថាបត្យកម្ម និងនគរោបនីយវិទ្យាផងដែរ។

ទន្ទឹមនេះ ឯកឧត្តមឧបនាយករដ្ឋមន្ត្រី បានស្នើឱ្យថ្នាក់ដឹកនាំសាកលវិទ្យាល័យភូមិន្ទវិចិត្រសិល្បៈ ពិនិត្យលទ្ធភាព សហការ រៀបចំផែនការទៅអនាគត ដើម្បីជំរុញឱ្យស្ថាបត្យកម្មខ្មែរនាសហសម័យរបស់កម្ពុជា កាន់តែរីកចម្រើន ខណៈកម្ពុជាយើងមានស្ថាបត្យកម្មប្រកបដោយអរិយធម៌ ទំនៀមទំលាប់ ប្រពៃណីខ្មែរ ប្រណិត ល្អឥតខ្ចោះ គ្រាន់តែយើងនៅមិនទាន់បានប្រែក្លាយអោយវិស័យនេះវិវឌ្ឍទៅតាមសម័យកាល ដោយសារមានរឿងអកុសលដែលយើងធ្លាប់បានឆ្លងកាត់ជាច្រើនក្នុងរយៈពេលកន្លងមក។

ក្នុងជំនួបនេះ ឯកឧត្តម ក៏បានលើកទឹកចិត្តស្ថាបត្យករ ឬវិស្វករ ដែលជាអ្នកឆ្លាក់ដួងព្រលឹងជាតិទៅអនាគត គួរពិចារណារប្តូរយុទ្ធសាស្ត្រ បើកចិត្តទទួលយកភាពច្នៃប្រឌិត បន្ថែមការយកចិត្តទុកដាក់លើបំណិនជីវិតអមជាមួយការសិក្សាជំនាញមួយផ្នែកទៀត ដើម្បីបង្កលក្ខណៈឱ្យការបណ្តុះបណ្តាលធនធានផ្នែកស្ថាបត្យកម្មដ៏កម្រនេះអាចរីកលូតលាស់បានកាន់តែប្រសើរប្រកបដោយគុណភាព។

ជាមួយគ្នានេះ ឯកឧត្តមឧបនាយករដ្ឋមន្ត្រី បានបន្តចែករំលែកនូវបទពិសោធន៍ ព្រមទាំងបានផ្តល់នូវអនុសាសន៍ជូនដល់ថ្នាក់ដឹកនាំសាកលវិទ្យាល័យ ដើម្បីលើកទឹកចិត្តឱ្យមានការច្នៃប្រឌិត ជំរុញអ្នកជំនាញ និស្សិត ចូលរួមសិក្សា និងផ្តល់យោបល់ក្នុងការរៀបចំទីតាំងលំហសាធារណៈនានា ដោយចាត់ទុកថាជាការរៀបចំផ្ទះសំបែងនិងស្រុកទេសរបស់យើងឱ្យបានស្របទៅតាមតម្រូវការ និងសម័យកាល។

ជាចុងក្រោយ ឯកឧត្តម បានបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ និងសាកលវិទ្យាល័យភូមិន្ទវិចិត្រសិល្បៈនឹងសហការគ្នារៀបចំធ្វើជាវិចិត្រសាល ដោយអាចធ្វើនៅក្រសួង ឬមន្ទីរពិសោធន៍ ដើម្បីផ្ដល់ឱកាសដល់អ្នកមានសមត្ថភាពទេពកោសល្យអាចចូលរួមបង្ហាញស្នាដៃ ហើយនេះក៏ជាយុទ្ធសាស្ត្រជំរុញលើកតម្កើងធនធានមនុស្សផ្នែកស្ថាបត្យកម្មដែលមានស្នាដៃសំរាប់ចូលរួមអភិវឌ្ឍសង្គមជាតិ៕